Jobo 12 - Baibo Busansulushi Bwa Libuku Ili

Jobo mbwaakakumbula

¹ Mpomunyaawo Jobo wakakumbula ayi,

² “Ncakwiila mwebo ndimwe mwaamba mbuli muntu ucite busongo kwiinda bantu boonse alimwi mwaakufwa abwalo busongo bulaakuloba.

³ Sombi nebo ndicite maano bweenka mbuli ndimwe, nkokwaamba ayi nebo nshibete panshi kuli ndimwe napaceyuubo. Muntu uli woonse ulishi shintu ishi mwebo nshemutokwaamba.

⁴ Anu ono ndababo shikusekwa akubeensuma boonse nakubi kwaamba ayi ndi muntu ululeme utacite kampenda. Nebo ndakalinga kusenga kuli Lesa alakwe wakalinga kunkumbula.

⁵ Mwebo nomushiite kabotu mulaseka muntu uli mumapensho. Ncakwiila mulooma muntu utooyanda kuliwita.

⁶ Bapambi abantu bamwi bakalasha Lesa balekalabo muluumuno. Sombi balo mbantu bacinka manungo munkusu shabo beene ayi ngolesa wabo.

⁷ “Ono banyama balakonsha kumwiisha na mwabeepusha, Na mweepusha bayuni balakonsha kumulwiita.

⁸ Shintu shili mucishi ca panshi inga shamwiisha, ashalo nswi sha mumaanshi shilakonsha kumusansulwita.

⁹ Pashintu ishi shoonse taaku citeshi kwaamba ayi Mwaami Lesa ngowakacilenga.

¹⁰ Buumi bwa shilengwa shoonse buli mumaansaakwe. Ncakwiila abwalo buumi bwa bantu boonse ngoobucite.

¹¹ Sa matwi taashibi kubota kwa maswi, bweenka mulaka mbooshiba kubota kwa shakulya?

¹² “Sa te kucembela kulaamba busongo? Sa te citubya mumutwi ndushibo kufula?

¹³ Nakubi boobo Lesa taacitebo busongo, sombi ankusu alimwi Lesa taacitebo maano eenka, sombi alushibo.

¹⁴ Ncakwiila na wanyonyoola cimwi cintu, taaku weenga waciyakulula. Na waanga muntu, taaku nabi womwi ukonsha kumwaangulula.

¹⁵ Na wakasha mfula kuloka, ncakwiila kulababo cilanga. Na weesuminisha kuloka, ndushinisho cishi coonse cilaba mubulobe.

¹⁶ Lesa ngomwine nkusu abusongo, bantu bacenjeekwa abeshikubacenjeeka bali mumaansaakwe.

¹⁷ Ulanyaya beshikupanda maano busongo, abalo boomboloshi ulabalengesha kuba baluya.

¹⁸ Ulaakusha bamaami pabwaami bwabo alimwi akubalengesha kuba basha.

¹⁹ Ulabombya bapailishi alimwi abantu beshinkusu.

²⁰ Uloomusha beshikupanda maano abo bashomwa alimwi ulanyaya bamacembele busongo mbobacite.

²¹ Ulalengesha bantu balemekwa kumana bulemu, ncakwiila ulatimboola misampi ipamya beshinkusu.

²² Ulayubulula shishisitwe sha mumunshinshe ushiya mbi akubika patuba isho shakalinga kufukilitwe panshi peene.

²³ Ulakomenesha mishobo ya bantu akwiinyonyoola. Ulasumpula mishobo ya bantu akwiipalanganya.

²⁴ Ulalengesha bamatanjilili babo kuba bakaluyaluya, akubeengoosha muluundu mutaamu nabi kashila.

²⁵ Balaashaasha mumunshinshe mutaamu mumuni akubalengesha kutalantanta anga ngucakolwa.