Jobo 11 - Baibo Busansulushi Bwa Libuku Ili

Sofa mbwaakakumbula

¹ Mpomunyaawo Sofa mwine Naama wakakumbula ayi,

² “Sa kwaamba kwa bukaluyaluya takweelete kukumbulwa? Sa muntu ulaambwa ayi taacite mulandu kwiinda mukwaamba maswi aanji?

³ Webo Jobo, sa kwaamba shifwite kulacala milomo bamwi? Sa unanoocitekobo kutucelebula cakutakukumbula?

⁴ Webo ulaamba kuli Lesa ayi, ‘Mumaswi angu taamu kulubisha alimwi mwebo mulishi kwaamba ayi nshicite mulandu mumeenso anu.’

⁵ Ulicite coolwe Lesa taakwe kukumbulaawo. Ceebo naakwiinga wakukalalila cilensha nsoni,

⁶ akukwaambila bushishi buli mubusongo bwiine bwiine. Mukwiinga busongo bwiine bwiine bulicite nshila shobilo. Ono shiba ayi Lesa taatookupensha kweelana abweelete milandu yako.

⁷ “Sa inga wakonsha kwishiba shabushishi shakwe Lesa? Sa inga ulakonsha kwishiba peela busongo bwakwe Lesa Shinkusu shoonse?

⁸ Busongo bwakwe mbulaamfu kwiinda peela liculu, ono webo inga wacitanshi? Kuya panshi buleendilila pamusena wabafu, ono webo inga weshibanshi?

⁹ Kulaampa kwa mbubo kuleenda cishi ca panshi, mubufwaafwi buleenda lweenge lutaboneki nkolweela.

¹⁰ “Ono na Lesa wakucata akukoombolosha, anu ngani weenga wakonsha kumukasha?

¹¹ Bantu babeca, ndushinisho Lesa lakwe ulibeshi. Ee, shibiibi nshebacita ulashibona akushilabilila.

¹² Sombi nciyumu kulengesha baluya kuba basongo, kwiinda kutambisha mbongolo ya muluundu ayi ibombe.

¹³ “Anu webo Jobo, na ulisuni kululama mumoyo, lyaabe kuli Lesa akusenga ayi akunyumfwile nkumbu.

¹⁴ Kusha bubi ashilubo shili mumoyo wako. Mubuumi bwako boonse mubule bubi nabuceyi.

¹⁵ Ingaawo ndyeshi ukanookweenda kooinamukite mukutanoonyumfwa nsoni alimwi cakubula boowa.

¹⁶ Mpeeke mapensho ako ulaakwaaluba, bweenka maanshi atookunka mbwaaenda lubilo.

¹⁷ Ncakwiila buumi bwako bulaakubala anga ndisuba ndyeliba pakati ka mutwi. Mapensho ako alaakumana bweenka bumana munshinshe ndyebuca.

¹⁸ Ulaakunookala cakutalisukama alimwi cakulangila shibotu. Lesa ulaakunookulama akukupa luumuno mumoyo ayi wookeshe.

¹⁹ Taaku mulwani weshi akanookukonga, alimwi baanji balaakunoosenga ayi ubacaafwe.

²⁰ Sombi bamucita shibi balaakulemabo kulangoola lucafwo, teshi bakabeewo amusena wakulobokelaako. Nceshi bakanoolindilabo nkutula moyo.”