Jelemiya 4 - Baibo Busansulushi Bwa Libuku Ili

Kusengwa kusanduka kuswa kushibiibi

¹ Mwaami Lesa utookwaamba ayi, “Nobene Isilaeli, na muli lwakupiluka kuli ndime, amupiluke. Na mukushe shibumbwabumbwa shanu shilensha bunya pameenso angu akutapambuka tubili munshila yangu,

² na kamulumbila cakushomeka, cabululami ee, cakubula kampenda ayi, ‘Bweenka mbocibete lushinisho ayi Mwaami Lesa ngumuumi,’ mishobo yoonse ilaakupekwa coolwe kuswa kuli ndime neMwaami Lesa. Ncakwiila boonse balaakunoosangalalila muli ndime.”

³ Mwaami Lesa utookwaambila bene Juda abene Jelusalemu ayi, “Amushinde shisuwa isho shitana kulimwawo kale. Mutanooshanga mbuto shanu mumyuumfwa.

⁴ Amushomeke kucipangano ncendakapanga amwebo nebo neMwaami Lesa. Nobene Juda abene Jelusalemu, amwaabe myoyo yanu kuli ndime. Na mubule kucita boobo, bukali bwangu bulaakunyaka anga ngumulilo ceebo ca shibiibi nshemwakacita. Ndushinisho bulaakunyaka cakubula aubushimya.

Mapensho kuswa kumatwa pacishi ca Juda

⁵ “Amwaambilishe muJuda akoolobesha muJelusalemu ayi, ‘Amulishe mapeenga mucishi coonse.’ Amoolobeshe kamwaamba ayi, ‘Amubungane pantu pomwi, tucicile kumandabala anene acite malinga.’

⁶ Amulishe mapeenga kulwiita bantu ayi bacicile kuSiyoni. Amucice bweenka bulya cakutacelwa kwaamba ayi mupuluke ceebo ntooleta mapensho abiibi kuswa kumatwa ee, ntooleta kunyonyoolwa kuyoosha.”

⁷ Inkalamu yasokomoka kuswa mucisakasaka moikala. Ncakwiila shikunyonyoola mishobo wanyamuka. Wanyamuka kwisa mukunyonyoola cishi ca Juda. Ulaakunyonyoola mandabala anu cakubula amuntu wikalaamo.

⁸ Paceebo ceeco amufwale masaka. Amulile akooloma ceebo bukali bwa Mwaami Lesa tabuna kuswaawo pali ndiswe.

⁹ Mwaami Lesa waamba ayi, “Pabushiku ubo mwaami abacinenenene bakwe balaakutyongola. Bapailishi balaakuloonda abalaluki balaakukankamana.”

¹⁰ Mpomunyaawo nebo ndaamba ayi, “Nobaami baLesa beShinkusu shoonse, anu bene Jelusalemu mwakabacenjeekabo mukubaambila ayi, ‘Mulaakuba muluumuno,’ nakubi boobo mupeeni uli panshingo shesu.”

¹¹ Paciindi ici bene Jelusalemu balaakwaambilwa ayi, “Muuwo ukasaala utoopupa kuswa patulundu tulaamfu tutacite bwiisu twa muluyanga kululama bantu bangu. Teshi muuwo wakupupulushishaako nabi kusalasha, sobwe.

¹² Sombi ngumuuwo wiindaawo nkusu uyo uswa kuli ndime. Nebo neMwaami Lesa ntoobapa milandu.”

Cishi ca Juda mbocakashingulukwa kubalwani

¹³ Amubone, utoosabo anga ngamakumbi, shikoci shakwe sha nkondo shitoosa buulukabo anga nkapupuulwa aalo maaki akwe aleenda lubilo kwiinda bamumbankwashi. Mapensho kuli ndiswe! Ncakwiila twamanaawo!

¹⁴ Nobene Jelusalemu amusanshe bubi kuswa mumyoyo yanu kwaamba ayi mupuluke. Ino mulaakucileka lili kuyeeya shibiibi?

¹⁵ Kuli liswi litookwaambilisha kuswa kuDani, ee, litokwaamba kutulundu twa kuEfuleemu ayi mapensho anene atoosa.

¹⁶ Litokwaamba ayi, “Amulwiite mishobo akwaambila ndabala ya Jelusalemu ayi, ‘Likoto lya bashilumamba beshikushinkila batoosa kuswa kucishi cakulaale. Bantu aba balaakunokoolobesha pakulwana mandabala a muJuda.

¹⁷ Balaakwaashingulukabo anga mbantu batoolindilila muunda, ceebo bangashukila. Nebo neMwaami Lesa ndaamba.’

¹⁸ “Bwikaalo bwanu amicito yanu nsheshamuletela mapensho aya. Mulandu uyu ngwakuliletela nobeene. Mapensho ngomwaliletela alalula abuumbi, ee, cakuyasabo akumyoyo yanu.”

Buumba bwakwe Jelemiya pabantu bene mishaabo

¹⁹ Buumba bwancaya, ee, buumba bwancaya! Ntokwaalabanganabo ceebo moyo wangu wacisa. Ncakwiila moyo wangu utookulunkunta cakuyanda kuncinkula. Nshikoonshi kuumunabo napaceyi ceebo ndanyuumfwa kulila kwa lupeenga ee, ndanyuumfwa ciyobeyobe ca nkondo.

²⁰ Mapensho ananootungenebo kalongo. Cishi coonse camana kunyonyoolwa. Matente angu anyonyoolwabo muciindi ciniini. Ayalo misumba yanyonyoolwabo cakufwambaana.

²¹ Nciindi cilaamfu buyani nceshi noocibona mbembela sha nkondo akunoonyumfwa mapeenga a nkondo kaalila?

²² Mwaami Lesa waamba ayi, “Bantu bangu mbaluya, tabenshiiwo. Mbaana bafwite mitwi, tabacite maano akunyumfwisha shintu. Balicibwenebo kucita shibiibi, sombi kucita shibotu kulabaalila.”

Jelemiya mbwaakabona kunyonyoolwa mucili anga nciloto

²³ Mpeeke ndakalangilisha pacishi ca panshi akubona ayi taaku mbocakalingaawo alimwi temwakalinga shintu. Ndakalanga kwiculu akubona ayi akwalo taaku mumuni nauceyi.

²⁴ Ndakalanga kutulundu akubona ayi tutootenkana. Ncakwiila tulundu toonse twakalinga kushanashana.

²⁵ Ndakalanga akubona ayi taaku muntu nabi womwi. Abayuni boonse bakamana kuuluka akuya.

²⁶ Mpeeke ndakalanga akubona ayi cishi cakalinga ca bulongo bubotu caba luyanga. Mandabala a mumo oonse akamana kunyonyoolwa ceebo ca bukali bwa Mwaami Lesa buyoosha.

²⁷ Ono Mwaami Lesa waamba ayi, “Cishi coonse cilaakuba luyanga, sombi teshi nkacinyonyoole cakumaninina.

²⁸ Aboobo cishi cilaakulila, alyalo liculu lilaakushiya. Ndakaamba kale, teshi nkaboole pesule. Ici ndakacaamba kale, teshi nkabooshemo moyo, sobwe.”

²⁹ Ono baakunyufwabo ciyobeyobe ca bashilumamba balwanina pamaaki abeshimata, bantu mumandabala oonse balaakucica. Bamwi balaakucicila muluundu, bamwi balaakulityaanisha pakati ka myaandami. Mandabala oonse alaakubula amuntu ukalaamo. Taaku muntu nabi womwi weshi akekalemo tubili.

³⁰ Utoocitanshi webo ondabala yakanyonyoolwa? Utoofwalilanshi shisani shifubelafubela akufwala shakulibotesha sha golodi? Ino walinanikilanshi shakulibotesha mumeenso? Bana utoolipenshabo kulibotesha. Abo bakalinga kukusuni, bakakusuula. Bulya batoopinga kukucaya.

³¹ Ntoonyumfwa mubila anga ngumwanakashi uli pankata. Ntoonyumfwa kutongela anga nkwa mwanakashi utootumbuka mwaana wakwiiya. Anu kwakalinga nkulila kwa ndabala ya Jelusalemu itoofoomashika akusenga lucafwo mukwaamba ayi, “Maawe ndawisuka, buumi bwangu bwaabwa mumaansa a bacayi!”