Isaya 9 - Baibo Busansulushi Bwa Libuku Ili

Mwaami ulaakwisa

¹ Nakubi boobo teshi kukabe munshinshe alimwi kuli baabo bakalinga kupenshekwa. Kalekale Lesa wakabombya cishi ca bene Sebuluni aca bene Nafutali, sombi muciindi citoosa balaakupa bulemu kucishi ca Galili uko kwikala baswamashi bakunsengwe. Nkokwaamba ayi cishi ciswa kuLweenge lwa Mediteleniyani kushika kucishi cili kwitala lya kwicwe lya Mulonga wa Joodani.

² Bantu bakalinga kweenda mumunshinshe, babona mumuni unene. Ee, abo bali mumunshinshe ushiya mbi uyoosha, mumuni wabamunikila.

³ NoBaami baLesa, mushobo wa bantu banu mwaufusha, Kusangalala kwa bantu banu mwakufusha. Balasangalala pameenso anu bweenka bantu mbobasangalala pakutebula. Ee, bweenka mbobasangalala basankwa pakubaana shakasaalwa.

⁴ Ncakwiila mwebo mwatyoloola lijoko ilyo lyalinga kubalemena. Mwatyoloola ankooli yalinga kubooma pashifushi. Ee, mushobo wa bantu walinga kulyatilila bantu banu mookoma, bweenka mbomwakakoma bene Midyani kale kale.

⁵ Nkwabilo sha bashilumamba isho nshebakalinga kusebensesha munkondo pantu pomwi ashakufwala shabo shoonse shinankeene bulowa shilaakutentwa mumulilo.

⁶ Ceebo mwaana washalwa pakati kesu, ee, twapekwa mwaana musankwa. Bweendeleshi boonse bulaakuba mumaansaakwe. Liina lyakwe unanokwiitwa ayi, “Shikupanda maano Mubotu,” “Lesa Shinkusu shoonse,” “Mushali musankwa wamuyayaya,” alimwi ayi, “Mwaami wa Luumuno.”

⁷ Nkusu shakwe sha bwaami aluumuno shilaakutolelela kukula. Ulaakwikala pacuuna cakwe Defedi ca bwaami akweendelesha bulelo bwakwe. Ulaakunoolela cabululami akoombolosha cakutanyengelela kuswa bobulya kushikila kwalyoonse alyoonse. Mwaami Lesa Shinkusu shoonse washinisha kwaamba ayi shintu ishi shoonse ulaakushicita.

Mwaami Lesa mbwaakapa bene Isilaeli mulandu

⁸ Mwaami Lesa watuma nkombe yakucenjesha kubamulunyungu lwakwe Jakobo. Ee, watuma nkombe kubene Isilaeli.

⁹ Ncakwiila bene Isilaeli boonse, abo bekala mundabala inene ya Samaliya balaakwishiba kwaamba ayi Lesa ngowacita boobo. Ono balo balalisumpula akwaamba ayi,

¹⁰ “Nabi maanda esu a ncelwa akawishikwa, tulaakuyaka amwi a mabwe akabeswa. Ee, nabi nshetwakayakisha ashisamu sha mukuyu shakatemwa, tulaakuyaka shiimbi sha shisamu sha sida.”

¹¹ Sombi Mwaami Lesa wabalamuna balwani babo ee, wababalamuna kwaamba ayi babalwaane.

¹² Kwicwe bene Silya akumbo bene Filisiti, boonse bakalakama kwaamba ayi bamine bene Isilaeli. Nakubi boobo bukali bwakwe teshi bukamaane, sombi lyaansa lyakwe lilaakunoocitandabete mukubapa mulandu.

¹³ Bene Isilaeli tabakwe kusanduka kuswa kushibiibi shabo. Nakubi kwaamba ayi Mwaami Lesa Shinkusu shoonse wakabatondesha bukali bwakwe, tabakwe kupilukila kuli nguwe.

¹⁴ Pabushiku bomwi Mwaami Lesa ulaakutondesha bukali bwakwe kubamatanjilili ba bene Isilaeli abantu babo. Ulaakusutula mutwi amucila wabo.

¹⁵ Basankwa bamanene alimwi balemekwa ngomutwi, mucila mbalaluki beeisha shakubeca.

¹⁶ Abo batanjilila bantu aba, babapilinganya. Abalo abo batanjililwa basowekwa.

¹⁷ Paceebo ceeco Mwaami Lesa teshi akakondwe abacikula bwangu babo alimwi teshi akafwitewo nkumbu bamukalubinje banakashi nabi bana banshiwa babo. Mukwiinga bantu boonse baba bamucita shibi alimwi tabalemeki Lesa. Pamilomo yoonse palaswabo maswi abiibi. Nakubi boobo bukali bwakwe teshi bukamaane, sombi lyaansa lyakwe lilaakunoocitandabete mukubapa mulandu.

¹⁸ Bubi bulanyaka anga ngumulilo, ee, mulilo ukonsha kutenta myuumfwa ashisonsoonya. Ncakwiila bulanyaka anga ngumulilo uli muluundu lunene, ee, mulilo usukumya bwiishi buunji.

¹⁹ Nceceeco bukali bwa Mwaami Lesa Shinkusu shoonse ncebwatentela cishi alimwi bantu baba nsheenkuni shitoobilimya mulilo uyo. Ono taaku nabi womwi weshi akafwite nkumbu mukwabo.

²⁰ Kululyo balacana shakulya, sombi tabakuti. Kucipiko balacana shakulya, sombi balafwa nsala. Ono batoolya abana babo bakushala beene!

²¹ Bene Manase abene Efuleemu babukilana beene abeene. Kuswawaawo bacatana pomwi akulwana bene Juda. Nakubi boobo bukali bwakwe teshi bukamaane, sombi lyaansa lyakwe lilaakunoocitandabete mukubapa mulandu.