Isaya 8 - Baibo Busansulushi Bwa Libuku Ili

Mwanaakwe Isaya musankwa

¹ Ono Mwaami Lesa wakandwiita ayi, “Bwesa cakulembelaawo cinene ulembewo maswi aya mumabala anene anene ayi Maa Shalali Ashi Basi, nkokwaamba ayi kusaala kwakufwambaana, kubwesa buboni calubilo.

² Mpeeke ndaakwiita basankwa bashomeka bobilo kwaamba ayi bakabe bakamboni bangu. Basankwa abo nguUliya mupailishi aSakaliya mwanaakwe Jebelekiya.”

³ Mukuya kwanshiku bakaangu bakamita akushala mwaana musankwa. Mpeeke Mwaami Lesa wakaamba ayi, “Mutumbe ayi Maa Shalali Ashi Basi.

⁴ Mwaana uyu kaatana kucishiba kwaamba ayi, ‘Ma,’ nabi ayi, ‘Ta,’ buboni boonse bwa bene Damasikasi ashintu nsheshi shikasaalwe kubene Samaliya ulaakushitola mwaami wa bene Asilya.”

Mwaami wa bene Asilya utoosa

⁵ Mwaami Lesa wakandwiita alimwi ayi,

⁶ “Ceebo cakwaamba ayi bene Isilaeli bakaka maanshi akalikene muKalonga ka Shilowa akusangalala mumwaami Lesini alimwi amuli Peka mwanaakwe Lemaliya,

⁷ nebo neLesa ntooleta mwaami wa bene Asilya abashilumamba bakwe ayi balwane cishi ca Juda. Bantu abo balaakunoosa anga ngamaanshi asefuka muMulonga wa Yufuletisi.

⁸ Balaakupyanga cishi ca Juda anga ngamaanshi aanji asefuka cakushika munshingo akufwekelesha shintu shoonse.” Imanuweli! Nkokwaamba ayi Lesa uli aswebo! Mapapaminwa akwe afungulukite alaakutabilila cishi coonse.

⁹ Amubungane caboowa mwebo nomishobo imwi ya bantu! Nakubi boobo mulaakupwayoolwa! Amukutike mwebo noshishi sha kulaale. Amulibambile shankondo, sombi mulaakupwayoolwa! Ee, mulaakulibamba, sombi mulaakupwayoolwa!

¹⁰ Amupangane muyeeyo bwakucita, sombi teshi mukaswitilileewo. Cili coonse nceshi mubambe teshi cikasebenseewo mukwiinga Mwaami Lesa uli aswebo.

Mwaami Lesa mbwaakacenjesha mulaluki

¹¹ Mwaami Lesa wakancenjesha munkusu shakwe shiinji ayi nsheelete kukonkela shitoocita bantu aba. Wakaamba ayi,

¹² “Webo utanoonjila mumiyeeyo njebapangana. Utanooloonda nshebaloonda. Utatutumi ceebo ca boowa.

¹³ Koibaluka kwaamba ayi nebo neMwaami Lesa Shinkusu shoonse ndisalalite. Ndime ngooelete kuloonda akulemeka.

¹⁴ Nebo ndi anga ngumusena wakuyubaamo. Sombi kubene Isilaeli abene Juda ndaakuba anga ndibwe lisuntula bantu, ncakwiila mwaandami ulengesha bantu kuwa. Kubene Jelusalemu ndaakuba anga nkoose umo mweshi bakacatwe.

¹⁵ Bantu baanji balaakulisuntula alimwi baanji balaakuwa. Ee, balaakuwa akupwayoolwa. Balaakucatwa mukoose akutolwa busha.”

Kucenjesha pakucebusha kubafu

¹⁶ Mwebo nobashikwiiya bangu, mulyeelete kulama akusunga kabotu maswi ayo Lesa ngwaandwiita.

¹⁷ Mwaami Lesa walishisa kubamulunyungu lwakwe Jakobo. Nakubi boobo nebo ndicinkite manungo muli nguwe. Kulangila kwangu mweshi kunoobete.

¹⁸ Ono bulya ndime abaana Mwaami Lesa mbwaakampa. Mwaami Lesa Shinkusu shoonse ucite cuuna ca bwaami paKalundu ka Siyoni, watutuma kwaamba ayi tube nkombe yakwe yuumi kubene Isilaeli.

¹⁹ Sombi bantu balaakumulwiita ayi musenge maswi kuswa kubeshikwaamba abafu alimwi abeshikusonda abo babulubusha akutepeta pakwaamba. Tamweelete kuyaako. Sa te mulyeelete kwiipusha Lesa wanu? Anu inga mweepushanshi kubafu kwiipushisha boomi?

²⁰ Mulyeelete kubakumbula ayi, “Amukutike shintu nshaamwiisha Mwaami Lesa! Mutakutiki beshikusonda. Nshebamulwiita teshi shikamucafweewo.”

Ciindi ca mapensho

²¹ Ono bantu balaakwiingaila mucishi ca panshi kabatyongwete akufwa nsala. Muciindi ico balaakushingana mwaami wabo aLesa wabo ceebo ca nsala abukali. Balaakunoolanga kwiculu

²² akulanga panshi cakushilika, sombi balaakunoobwenebo mapensho amunshinshe ushiya mbi. Ono mweenka umo mweshi bakashindikilwe.