Isaya 7 - Baibo Busansulushi Bwa Libuku Ili

Isaya mbwaakacenjesha mwaami Aasi

¹ Ono Aasi mwanaakwe Jotamu, mwishikulu wakwe Usiya, ndyaakalinga mwaami wa bene Juda, Lesini mwaami wa bene Silya alimwi aPeka mwanaakwe Lemaliya, mwaami wa bene Isilaeli, bakaya mukulwana ndabala inene ya Jelusalemu. Sombi bakaalilwa kwiikoma.

² Aasi, mwaami wa bene Juda, ndyaakalwiitikwa ayi bene Silya bapaankana abene Efuleemu, lakwe abantu bakwe bakatutuma abuumbi bweenka shisamu mboshitenkaanishikwa kumuuwo.

³ Lyalo Mwaami Lesa wakaambila Isaya ayi, “Webo amwanaako Shiya Jashubu muye mukakumane aAasi. Mulamucana munshila ilya kusebensela beshikutunga shisani, pafwaafwi amufolo uleta maanshi aswa mulishiba lya peculu.

⁴ Mwamucana mumwaambile ayi acenjele alimwi ekalike moyo. Ataloondi nabi kutyompwa kuyeeya bukali bwabo. Bukali bwa mwaami Lesini abantu bakwe bene Silya alimwi abwakwe Peka mwanaakwe Lemaliya bwamana ncito akubabo anga mbwiishi butoosuntookabo kushishiki shobilo.

⁵ Bene Silya, bene Efuleemu amwanaakwe Lemaliya batoopinga kukunyonyoola.

⁶ Bapangana ayi, ‘Atusaale cishi ca Juda, atucinyonyoole kwaamba ayi tucibaane. Lyalo tubike mwanaakwe Tabiilu kuba mwaami wabo.’

⁷ Sombi nebo neMwaami Lesa ndaamba ayi, ‘Ici teshi cicitikeewo, alimwi teshi cibewo boobo, sobwe!

⁸ Mukwiinga cishi ca Silya taciindiwo nkusu paDamasikasi ndabala inene iindaawo ya ncico. Ayalo ndabala ya Damasikasi tayiindiwo nkusu Lesini mwaami wa njiyo. Acalo cishi ca Isilaeli na kwiindebo myaaka ili 65 teshi cikanoocili cishi.

⁹ Cishi ca Isilaeli taciindiwo nkusu paSamaliya ndabala inene iindaawo ya ncico. Ayalo ndabala ya Samaliya tayiindiwo nkusu pamwaami Peka mwanaakwe Lemaliya. Ono na awebo ubule kuyuma mulushomo, ncakwiila teshi ukakomewo, sobwe.’ ”

Citondesho cakwe Imanuweli

¹⁰ Mpeeke kwiinda mumulaluki Isaya Mwaami Lesa wakaambila mwaami Aasi alimwi ayi,

¹¹ “Senga kuli ndime neMwaami Lesa, Lesa wako ayi nkupe citondesho. Cilakonsha kuswa panshi peene pamusena wa bafu nabi kwiculu.”

¹² Sombi Aasi wakakaka ayi, “Teshi musengeewo. Nshisuni kweelesha Mwaami Lesa.”

¹³ Mpomunyaawo Isaya wakaamba ayi, “Kutika ono webo owamulunyungu lwakwe Defedi! Sa kupensha bantu uku nkomucita teshi kuunji? Ono sa utooyanda kupensha aLesa wangu?

¹⁴ Paceebo ceeco Mwaami Lesa mwiine ulaakukupa citondesho. Ncakwiila mwanakashi utana kukumanawo kale amusankwa ulaakumita akushala mwaana musankwa eshi akanokwiitwa ayi Imanuweli.

¹⁵ Mukukomena kwakwe ulaakunoolyabo mandili abuuci kushikila akukula akusala cibotu acibiibi palwaakwe.

¹⁶ Sombi ico kacitana kushikila, shishi sha bamaami bobilo aba mbootooloonda shilaakucaalabo mumatongo.

¹⁷ Ono pali ndiwe, bantu bako apabamulunyungu lwa baiso, Mwaami Lesa ulaakuleta ciindi ca mapensho ico citana kubonekaawo kuswabo kuciindi bene Isilaeli ndibakapatukana abene Juda. Ncakwiila ulaakuleta mwaami wa bene Asilya.

¹⁸ “Bushiku ubo bwaakushikila, Mwaami Lesa ulaakulishila muloshi bene Ijipiti ayi bese kuswa kweela mulonga wa Nailo anga mbaloonshi, abalo bene Asilya ayi bese anga ninsuki.

¹⁹ Ashalo shilaakwisa akwikala mushinyika, mushimfwengo sha mumabwe, pacikupu coonse ca myuumfwa alimwi amumafulo oonse.

²⁰ “Munshiku isho Mwaami Lesa ulaakutamba shikucesa kuswa kwitala lya Mulonga wa Yufuletisi. Ee, ulaakutamba mwaami wa bene Asilya ayi ese acese misusu yanu, booya bwanu bwa pamubili akumukulula ndesu.

²¹ “Munshiku isho muntu weshi akanoofubitebo mpwishi yomwibo ampongo shobilo.

²² Ulaakunookama mukupa uunji cakubulabo balya. Ee, abo beshi bakacaale mucishi balaakunoolyabo mandili abuuci.

²³ “Munshiku isho mumusena woonse umo mwakalinga minyansa ili cuulu ikonsha kuulwa maali a silifa ali cuulu, mulaakubabo myuumfwa ashisonsoonya.

²⁴ Bantu pakunooya cifwima balaakunoonyamuna buta amifwi mukwiinga cishi coonse cilaakusulabo myuumfwa ashisonsoonya.

²⁵ Mutulundu moonse umo mwakalinga kulimwa teshi mukanooshikwa ceebo ca myuumfwa ashisonsoonya. Mulaakubabo mwakulita ŋombe ambelele.”