Isaya 6 - Baibo Busansulushi Bwa Libuku Ili

Mwaami Lesa mbwaakeeta Isaya kuba mulaluki

¹ Mumwaaka wakafwitaamo mwaami Usiya, ndakabona Mwaami Lesa kaashite pacuuna cakwe ca bwaami ico cakalinga peculu akusumpulwa. Mungaanjo wakwe wakalinga ulaamfu cakwisula ŋanda yakwe yoonse.

² Peculu lyakwe pakalinga baSelafu. Womwi womwi pakati kabo wakalinga kucite mapapaminwa ali osanwe alyomwi. Mapapaminwa obilo akalinga kufwekete pameenso, obilo kushimpanta aamwi obilo kaboolukishaako.

³ Bakalinga koolobeshana ayi, “Ulisalalite, Ulisalalite, Ulisalalite Mwaami Lesa Shinkusu shoonse! Cishi coonse ca panshi ciliswitebo bulemu bwakwe.”

⁴ Ono ceebo ca cilulumo ca maswi a baSelafu abo, shisamu sha kumulyango alwiimbi shakatenkaana. MuŊanda yakwe Lesa mwalo mwakesula bwiishi.

⁵ Mpeeke ndakalila akwaamba ayi, “Mapensho kuli ndime! Ono ndamanaawo mukwiinga ndi muntu utaambi shisalalite alimwi ndekala pakati ka bantu bataambi shisalalite. Ono alimwi ndaboona aMwaami wesu, ee, Mwaami Lesa Shinkusu shoonse.”

⁶ Mpomunyaawo Selafu womwi wakoolukila kuli ndime alikalangasha ilyo ndyaakabwesela kulumano kuswa pacipaililo.

⁷ Lyalo wakakumya mulomo wangu alikalangasha ilyo akwaamba ayi, “Bona, likalangasha ili lyakumya mulomo wako. Milandu yako yakushikwa pali ndiwe alimwi shibiibi shako shalekelelwa.”

⁸ Mpeeke ndakanyumfwa liswi lya Mwaami Lesa kalyaamba ayi, “Anu ngani ngweshi ntume? Anu ngani weshi abe shinkombe wesu?” Nebo ndakakumbula ayi, “Mpoondi Nkambo, amuntuume!”

⁹ Wakaamba ayi, “Koya kubantu aba mukubalwiita ayi, ‘Mulaakukutikishisha, sombi teshi mukanyumfwishishe, Mulaakulangilishisha, sombi teshi mukabonesheshe.’ ”

¹⁰ Wakandwiita alimwi ayi, “Lengesha bantu aba bushicimpamya, alimwi ubashinke matwi abo akucala meenso abo. Kwabula boobo inga kababonesha akunyumfwishisha, akuba amyoyo yakusuna kukutika kwaamba ayi basandukile kuli ndime ayi nebo mbashilike.”

¹¹ Mpeeke ndakeepusha ayi, “Kwaciindi cilaamfu buyani noBaami baLesa?” Alakwe wakakumbula ayi, “Kushikila mandabala anene oonse anyonyoolwe akubula ukalaamo. Kushikila maandaabo acaalebo kwakubula amuntu uliimo. Ee, kushikila myuunda yabo ikacaale matongo akushinka.

¹² Kushikila nebo neMwaami Lesa nkatume womwi awomwi kulaale, acalo cishi coonse cikacaalebo akuba luundu.

¹³ Ono nabi bantu baniini bakacaaleewo, abalo balaakunyonyoolwa. Sombi bweenka bucaala cishiki apo patemwa cisamu ca telebinti nabi ca mubanga, mbweeke ubo imbuto isalalite mbweshi ikacaaleemo anga ncishiki mucishi ici.”