Isaya 57 - Baibo Busansulushi Bwa Libuku Ili

Lesa mbwaakatongooka kulambila shibumbwabumbwa

¹ Bantu bakwe Lesa abo bashomeka balafwa, nakubi boobo taaku nabi womwi ucibika kumaano. Bantu bashomeka balatolwa, sombi taaku ushiba kwaamba ayi baluleme balatolwa mukufunwa kububi.

² Abo bekala buumi bubotu balenjila muluumuno. Kufwa kwabo kulaba nkoona ayi bookeshe.

³ Ono amwise kuno mwebo nobamucita shibi moomboloshekwe. Mwebo tamupuseneewo abaloshi, beshibulale alimwi abafuule.

⁴ Anu mutooyeeya ayi ngani ngomutoosekanya? Anu mutooyeeya ayi ngani ngomutoowela? Sa te mwebo noonse tamubete bamulunyungu lwa baashu ee, baana ba babalya babeshi?

⁵ Mwebo mulasanina meenshanyama anu munshaashisamu sha mibanga, ee, kulila munshaacisamu cicite cimfule cibotu cifungulukite. Mulabenga abana banu muya tulonga kushibumbwabumbwa amunshaamabwe acengeme cakupanga cimfule cibotu.

⁶ Mulabwesa mabwe ateshimite kabotu kuswa mutulonga akwaalambila ayi mbalesa banu. Mulatila awaini apo ayi ncipo kuli mbabo akubaletela cipo ca shili anga ngamaila. Ono sa mutooyeeya ayi nebo ndikondetwe pashintu shoonse ishi?

⁷ Mwakalipangila amalo patulundu tulaamfu apo mpomucitila bulale. Apo mpomunya mpomuya mukubengela milambu.

⁸ Kwisule lya shisamu shicata shisasa shanu mwakabikaako shikoshanyo sha bakunsengwe Mulamfutatila, mwafuula shakufwala shanu akutanta pamalo anu abaabo mbomufwita, ee, abo mbomulipila kwaamba ayi moonaabo. Uko nkomunya mulalusutula lwa meenshanyama.

⁹ Mulalinaneeka mafuta eendaawo kununkila amafuta amwibo akuya mukulambila lesa Moleki. Kulangoola balesa abo mulacita kutuma beshinkombe banu kulaale ee, cakubatumabo nabi kushuumbwe kwiine.

¹⁰ Isho nshemucita shilamulemya, sombi taaku ndyemusuminaawo ayi taaku mboshibete. Mulayeeya ayi balesa banu balamupa nkusu, aboobo tamulefukiiwo.

¹¹ Ono Mwaami Lesa waamba ayi, “Anu mbalesanshi abo bamulenga boowa cakwaamba ayi nebo kamumbeca akundubililaakobo limwi? Sa nceebo cakwaamba ayi ndoomuna bunene ncemwacilekela kunoonda?

¹² Mwebo mulayeeya ayi ncemutoocita cililuleme, sombi micito yanu ndaakwiiyubulula alimwi shibumbwabumbwa teshi shikamucafweewo.

¹³ Ee, atukabone na shibumbwabumbwa shanu shilaakumucafwa mwaakushililila lucafwo! Ncakwiila muuwo ulaakushitola shoonse, ee, shilaakuululukabo kukuyoya kwa linkanda lyomwi. Sombi muntu uyo woonse uyubila muli ndime ulaakupekwa cishi ici pantu pomwi akalundu kangu kasalalite.”

Lesa mbwaakashomesha kucafwa bantu bakwe akubashilika

¹⁴ Mwaami Lesa waamba ayi, “Amubaleeke bantu baboolele. Amukushe cili coonse ceenga cashinkila bantu bangu munshila yabo.”

¹⁵ Usumpukite Lesa wakwiculu uyo, Lesa walyoonse alyoonse ucite liina lisalalite waamba ayi, “Nebo ndekala kwiculu kumusena usalalite, sombi ndekala abaabo balibombya alimwi basanduka kuswa kushibiibi shabo kwaamba ayi mbabooshelemo lushomo lwabo akulangila.

¹⁶ Teshi nkatolelele kumupa milandu nabi kunoopulwita bukali pali ndimwe. Na ndatolelela, bantu inga bafwa. Ee, inga bafwa bantu abo nebo nemwiine mbondakalenga.

¹⁷ Ndakalinga ndabakalalila ceebo ca shibiibi shabo alimwi abulyabi. Ndakabapa mulandu akubafutatila ceebo ndakakalala. Nakubi boobo bakatolelela anshila shabo shibiibi.

¹⁸ Micito yabo ndakeebona, sombi ndaakubashilika. Ndaakubatanjilila akuboombulusha.

¹⁹ Ndaakulengesha batoolila muIsilaeli kutalika kulumbaisha. Ncakwiila ndaakuleta luumuno kubaabo bali pafwaafwi akubaabo bali kulaale. Ee, boonse ndaakubashilika.” Mwaami Lesa waamba.

²⁰ “Sombi bamucita shibi balo balibo anga ngamaaba ayoosha apa lweenge ayo atacileeki kweenda cakulikampeeka, akuya mukukokolola matipa amatombe amwi kweela.

²¹ Taaku luumuno kubamucita shibi.” Mwaami Lesa waamba.