Isaya 54 - Baibo Busansulushi Bwa Libuku Ili

Mwaami Lesa mbwaasuni bene Isilaeli

¹ Ono Mwaami Lesa waamba ayi, “Olobesha cakusangalala webo Jelusalemu ee, webo ooli anga ngumwanakashi ŋumba. Imba nyimbo akoolobesha cakukondwa webo nootana kunyumfwawo mwaana mbwaanyona. Ceebo baana ba mwanakashi wakashiiyikwa kuli ibaye mbaanji kwiinda ba wooyo uli aibaye.

² Komenesha tente njookalaamo, laampya ntambo sha njiyo akushimpya mpoopo shiicata.

³ Nyinsa kumbasu shoonse ncakwiila ulaakushisenya. Bantu bako balaakubwesa cishi ico cili mumaansa a mishobo imwi bulya. Ee, mandabala anene ayo alinga mumatongo alaakusula bantu alimwi.

⁴ “Utaloondi napaceyi, teshi ukalenshekwewo nsoni. Teshi ukasebaanishikwewo tubili. Ulaakuluba shintu shakakulengawo nsoni koocilibo cikula bwangu. Musebaanyo wa bumukalubinje uyo uli pali ndiwe ulaakumana.

⁵ Mukwiinga uyo wakakulenga ulaakuba anga ngoibayo. Ee, Mwaami Lesa Shinkusu shoonse Usalalite wa bene Isilaeli alimwi Mupulushi wako. Lakwe ngoLesa wa cishi ca panshi coonse.

⁶ Mwebo nobene Isilaeli, Mwaami Lesa ulaakumwiita alimwi. Mwebo muli anga ngumwanakashi wakalinga washiikwa alimwi mubuumba bunene, ee, mwanakashi wakeebwa kaacilibo mwanike sombi wakakwa akushiikwa.” Lesa wanu waamba.

⁷ “Ee, kwaciindi ciniini ndakalinga ndamusuula, sombi ndaakumuboosha ankuumbu shiinji abuumbi.

⁸ Kwaciindi ciniini ndakamufutatila ceebo ndakakalala. Sombi ndaakukutondesha lusuno lwangu kwamuyayaya.” Mwaami Lesa Shikumulubula waamba.

⁹ “Muciindi cakwe Nowa ndakashomesha ayi cishi ca panshi teshi nkacinyonyoolewo tubili amaanshi. Mbweeke ubo ndashomesha kutapulwitawo tubili bukali pali ndimwe. Teshi nkamukalalileewo nabi kumupa mulandu.

¹⁰ Nakubi kwaamba ayi tulundu tukatenkaane nabi tukapalanganishikwe, sombi lusuno lwanu pali ndimwe teshi lukatenkaaneewo, nabi cipangano cangu ca luumuno kupalanganishikwa.” Mwaami Lesa uyo umunyumfwila nkumbu waamba.

Jelusalemu mbweshi akabe kunembo

¹¹ Mwaami Lesa waamba ayi, “Webo Jelusalemu, ondabala ili mumapensho ayoosha alimwi ootacite shikukuumbulusha. Nebo ndaakuyakulula lwiimbi lwako amabwe abotu amakwebo.

¹² Ndaakuyakulula maanda ako alaamfu amabwe amakwebo asalala ayalo minjililo amabwe amakwebo abekabeka. Ndaakucita bweenka ubo akulubumbu.

¹³ “Nebo nemwiine ndaakwiisha bantu bako, kubalengesha kuswitilila alimwi akubapa luumuno.

¹⁴ Koombolosha kwakutanyengelela abululami bulaakukushimpya. Kulyatililwa alunkutwe shilaakunooli kulaale awebo. Taaku nabi comwi nceshi ukanoolisukama. Shakuloondaloonda shilaakumaninabo limwi, cakutashinyumfwaawo tubili pafwaafwi awebo.

¹⁵ Ono uli woonse weshi akakulwaane, teshi akacite boobo mukutumwa kuli ndime, sobwe. Paceebo ceeco uli woonse weshi akakulwaane ulaakukomwa.”

¹⁶ “Ndime ndakalenga shikufula sheela uyo ufulita mulilo amyuuba akufula shakulwanisha. Ndime ndakalenga ashilumamba usebensesha shakulwanisha isho kucaya bamwi.

¹⁷ Sombi taaku cakulwanisha ceshi cikakonshe kumucisa. Abalo abo bamupa milandu mulaakuba ashakubakumbula. Ici cilaakuba ncecilambu ca basebenshi bangu.” Mwaami Lesa waamba.