Isaya 39 - Baibo Busansulushi Bwa Libuku Ili

Beshinkombe bakaswa kuBabiloni

¹ Paciindi ceenka ico Melodaki Baladani mwanaakwe Baladani, mwaami wa bene Babiloni, wakanyumfwa ayi mwaami Esekiya ngumulwashi. Paceebo ceeco wakamutumina nkalata alimwi acipo.

² Esekiya wakatambula beshinkombe alimwi wakabatondesha buboni bwakwe boonse, nkokwaamba ayi silifa, golodi, tununkila kabotu mubuyani, mafuta anunkila kabotu alimwi ashakulwanisha shakwe shoonse. Taaku cintu nabi comwi muŋanda ya bwaami nabi mubulelo bwakwe boonse cakacaala kutababonesha.

³ Mpomunyaawo Isaya mulaluki wakaya mukwiipusha mwaami Esekiya ayi, “Ino bantu balya baswa kuli alimwi baamba ayinshi?” Esekiya wakakumbula ayi, “Baswabo kulaale, kucishi ca Babiloni.”

⁴ Isaya wakeepusha ayi, “Babonaawonshi muŋanda ya bwaami muno?” Esekiya wakakumbula ayi, “Shoonsebo bashibona. Taaku cintu nabi comwi mushipinda shangu shakusungilaamo buboni nceentakwe kubabonesha.”

⁵ Mpomunyaawo Isaya wakalwiita mwaami ayi, “Mwaami Lesa Shinkusu shoonse waamba ayi,

⁶ ‘Ciindi cilaakushikila buboni boonse bwa muŋanda yako ya bwaami, pantu pomwi asheesho bamashali bako bakulukulu nshebakasunga kushikila bushiku bwa sunu. Shoonse shilaakutolwa kucishi ca Babiloni. Ncakwiila taaku ceshi cikacaale.

⁷ Bamulunyungu lwako bamwi, bulowa bwako omwiine, balaakubatola kuya mukuba basebenshi bakacaikwa lushalo muŋanda ya mwaami wa bene Babiloni.’ ”

⁸ Mwaami Esekiya lakwe wakanyumfwa ayi kulaakuba luumuno paciindi ca bwikaalo bwakwe. Aboobo wakakumbula ayi, “Maswi a Mwaami Lesa ngowandwiita ngabotu.”