Isaya 35 - Baibo Busansulushi Bwa Libuku Ili

Kusangalala kwa bantu beshi bakafuunwe

¹ Luyanga lulaakusangalala alyalo liwesa lilaakusangalala akusapula maluba.

² Luyanga lulaakwiimba cakusangalala. Lulaakubotabo anga ntulundu twa Lebanoni akuba amboleshi anga njimyuunda ya kuKamelo nabi kuShaloni. Bantu boonse balaakubona bulemu bwa Mwaami Lesa, ee, balaakwishiba nkusu abulemu nshaacite.

³ Amuyumyeyumye maansa a baabo babula nkusu. Amupe nkusu myeendo ya baabo batootutumabo ceebo cakulefuka.

⁴ Amulwiite baabo bacatwa boowa ayi, “Amuyume, mutaloondi. Lesa wanu ulaakwisa. Ulaakwisa mukuboosha cishole, kwisa mukulambula balwani banu. Ncakwiila ulaakwisa mukumufuna.”

⁵ Lyalo boofu balaakubona abalo bashinkite matwi balaakunyumfwa.

⁶ Balema ndyeshi bakatambale anga ninsefu. Abalo bacibuulu ndyeshi bakeembe nyimbo shakulumbaisha. Maanshi alaakukunka muliwesa. Ee, tulonga tulaakukunka muluyanga.

⁷ Museese ulungula ulaakwaaluka mashiba a maanshi. Cishi cifwite nyotwa ya maanshi cilaakuba tuntupu tubila maanshi. Mumisena umo mwakalinga kwikalaawo bamwaaba, mulaakumena bwiisu alimwi amatete.

⁸ Lyalo kulaakuba mukwakwa. Mukwakwa uyo ulaakutumbwa ayi, “Mukwakwa wa Basalalite.” Bamucita shibi teshi bakeendeemo umo, sobwe. Ulaakuba wa baabo beelete kweendaamo beenka. Nabibo mashilu a bantu teshi akeendeemo umo.

⁹ Mumukwakwa uyo teshi mukabeewo nkalamu. Taaku banyama bamwi bakali baluma beshi bakeende nshila iyo. Sombi mukwakwa uyo ngwa baabobo bakalubulwa.

¹⁰ Abo Mwaami Lesa mbwaakalubula balaakuboolela akushika kuSiyoni kabeemba cakusangalala. Anu uko nkweshi bakanookala cakusangalala kwalyoonse alyoonse. Ee, balaakuba bantu bakondetwe alimwi basangalete kwalyoonsebo. Buumba alimwi amatongooshi shoonse shilaakumana.