Isaya 2 - Baibo Busansulushi Bwa Libuku Ili

Luumuno lutamaani

¹ Aya ngamaswi aamba pacishi ca Juda alimwi andabala ya Jelusalemu kweelana aLesa mbwaakayubulwita Isaya mwanaakwe Amosi.

² Munshiku shakumamanino, kalundu ka Ŋanda ya Mwaami Lesa kalaakupusha nsonga indilila tulundu tumwi toonse. Kalaakusumpulwa kwiinda tulundu tumwi toonse, lyalo mishobo yoonse ilaakuwuumukila nkuko.

³ Bantu baanji balaakwisa akwaamba ayi, “Kamwisa tunooya kukalundu ka Mwaami Lesa. Lesa ulaakutwiisha nshaasuni ayi tucite kwaamba ayi tunookweenda kweelana ambwaasuni. Mukwiinga milawo yakwe ilaakuswita kuSiyoni ncakwiila maswi akwe alaakunooswa kuJelusalemu.”

⁴ Mwaami Lesa ulaakoombolosha mishobo akumana nkondo pakati ka bantu baanji. Mipeeni yabo balaakunoifula ayi shibe shakulimisha, aalo masumo abo ayi abe shakukwesoosha shisamu. Taaku mushobo weshi ukapililike mipeeni kuya mukulwana umwi, nabi weshi ukanooya mukwiiya shankondo.

⁵ Aboobo mwebo nobamulunyungu lwakwe Jakobo amwise tweendele mumumuni wa Mwaami Lesa!

Bushiku bwa bukali bwa Mwaami Lesa

⁶ NobaLesa mwafutatila bantu banu bamulunyungu lwakwe Jakobo! Amubone cishi cabo cesulabo kwishibila kwa bakwicwe abuŋanga anga mbene Filisiti. Bantu banu balanyumfwana abaswamashi.

⁷ Cishi cabo ciliswitebo silifa agolodi, buboni bwabo bwafula abuumbi. Cishi cabo ciliswitebo maaki, shalo shikoci sha maaki a nkondo tashibelengeki.

⁸ Cishi cabo ciliswitebo shibumbwabumbwa. Balalambila shintu nshebakalipangila amaansaabo beene.

⁹ Paceebo ceeco bantu boonse balaakuletwa panshi akuceeshekwa, nakubi boobo noBaami baLesa mutakabalekeleli!

¹⁰ Nobantu, amuyube mushimfwengo mutulundu twa myaandami, nabi kukaba shilindi kwaamba ayi mucice bukali bwa Mwaami Lesa akuyuba nkusu abulemu bwakwe.

¹¹ Kulinaamuna kwa bantu kulaakumana, ncakwiila kulisumpula kwabo kulaakunyonyoolwa. Pabushiku ubo Mwaami Lesa eenkabo ngweshi akasumpulwe.

¹² Mwaami Lesa Shinkusu shoonse wakabikila limwi bushiku bwa bukali bwakwe, ubo bantu boonse balisumpula abaabo balemekwa beshinkusu ndyeshi bakaceeshekwe.

¹³ Ulaakunyonyoola shisamu sha sida shoonse sha kuLebanoni, alimwi amibanga yoonse ya kuBashani.

¹⁴ Ulaakumwayoola tulundu tulaamfu pantu pomwi atulundu tuniini toonse.

¹⁵ Ulaakumwayoola maanda alaamfu pantu pomwi amalinga ayumu oonse.

¹⁶ Ulaakunyonyoola maato amakwebo akuTashishi ee, maato abotu oonse.

¹⁷ Kulinaamuna kwa bantu kulaakumana, ncakwiila kulisumpula kwabo kulaakunyonyoolwa. Pabushiku ubo Mwaami Lesa eenkabo ngweshi akasumpulwe.

¹⁸ Ncakwiila shibumbwabumbwa shoonse shilaakumaninina.

¹⁹ Bantu balaakucicila mushimfwengo amutulundu twa myaandami akuyuba mushilindi. Balaakucita boobo ceebo cakuloonda bukali, nkusu abulemu bwa Mwaami Lesa, bushiku aakunyamuka ayi atenkaanye cishi ca panshi.

²⁰ Pabushiku ubo bantu balaakusowa shibumbwabumbwa shabo kumbeba atumpafwa. Balaakusowa shibumbwabumbwa shabo sha golodi asilifa isho nshebakalipangila ayi banoolambila.

²¹ Bantu balaakucicila mushimfwengo amutulundu twa myaandami akuyuba mushilindi. Balaakucita boobo ceebo cakuloonda bukali, nkusu abulemu bwa Mwaami Lesa, bushiku aakunyamuka ayi atenkaanye cishi ca panshi.

²² Amucileeke kucinka manungo mumuntu ufwa. Muntu taaku mbwaabete, ino inga wamucafwa buyani?