Isaya 18 - Baibo Busansulushi Bwa Libuku Ili

Lesa ulaakupa mulandu Kushi

¹ Mapensho kubantu bekala kucishi cilila mapepe muya milonga, ee, bekala muya milonga ya mucishi ca Kushi.

² Kuswa kucishi ico kulatumwa bashinkombe mumaato a matete paMulonga wa Nailo. Ono amuboolele mwebo nobeshinkombe beenda cakufwambaana! Amutole nkombe kubantu balaamfu, bateshimite shikanda alimwi bantu baloondwa cishi coonse. Ee, kumushobo ucite beshinkusu, ncakwiila kucishi cibaanishitwe amilonga.

³ Mwebo noonse nobantu ba mucishi, ee, mwebo nomuli mucishi ca panshi, mbembela yaakwiimikwa patulundu mulaakwiibona alwalo lupeenga lwaakulila mulaakulunyumfwa.

⁴ Mwaami Lesa wandwiita ayi, “Ndaakulanga panshi kuswa kwiculu mubuumwite akunokweebelabo kaandi mumusena umo moonkala bweenka bubala lisuba na lyashika pakati ka mutwi nabi bweenka buloka mume ciindi cakutebula.

⁵ Sombi bantu kabatana kutalika kutebula, maluba aakumana kulokaako kushisamu, minyansa yaakutalika kupya, balwani balaakunyonyoola bene Kushi cakufwambaana bweenka mbocibete cuubu cibeshi kutimbula misampi ya minyansa.

⁶ Mibili yabo ilaakushiyikwabo ayi cibe cakulya ca bayuni abanyama. Cilimo bayuni ba mutulundu balaakunoolya mibili yabo, sombi mupewo mbanyama ba muluundu.”

⁷ Paciindi ico shipo shilaakuletwa kuMwaami Lesa kuswa kubantu balaamfu, bateshimite shikanda alimwi bantu baloondwa cishi coonse. Ee, kuswa kumushobo ucite beshinkusu, ncakwiila kuswa kucishi cibaanishitwe amilonga. Bantu abo balaakwisa kuKalundu ka Siyoni uko Mwaami Lesa Shinkusu shoonse nkwaalambililwa.