Isaya 16 - Baibo Busansulushi Bwa Libuku Ili

Mapensho amwi a bene Moabu

¹ Amutumishe bana ba mbelele kumuleli wa cishi ayi ncipo cakumulemeka. Kuswa kuSela mucilingane luyanga tibili muye mushike kuJelusalemu, ee, kukalundu ka Mwaana mwanakashi wakwe Siyoni.

² Ono bweenka bana ba babayuni mbobaulukaulukabo na bakushikwa paciinswa, mbweeke ubo banakashi bene Moabu mbobabete kushito sha mulonga wa Anoni.

³ Batokwaambila bene Juda ayi, “Amutulwiiteeko mbweshi tucite. Amutupeeko muyeeyo wakucita. Amutufuneeko bweenka cimfule mbocitontosha ciindi lisuba ndiliba pakati ka mutwi cilimo. Twacicila kokuno ayi mutushiseeko, mutatwaabi kubalwani besu.

⁴ Amutusuminishe kwikalaanu swebo sotwacicila kokuno. Amube ciyubilo cesu kuswa kubaabo batooyanda kutunyonyoola.” Shikulyatilila bantu bulaakumweela alimwi kunyonyooka kulaakumana. Ncakwiila shikupensha teshi akabonekeewo tubili mucishi cino.

⁵ Kuswawaawo cuuna ca bwaami cilaakutulwa mulusuno. Wamulunyungu lwakwe Defedi womwi ulaakukalaawo cakushomeka. Lakwe ulaakunokoombolosha cakutanyengelela. Ncakwiila ulaakunoobilemebo kucita bululami.

⁶ Bene Juda balaamba ayi, “Twakanyumfwa bene Moabu mbobalisumpula. Ncakwiila balalisumpula, kulyuuma mushaamba alimwi mbeshi kanyansho. Ono kulinaamuna kwabo takucite mpindu.”

⁷ Paceebo ceeco boonse bene Moabu batoolila, ee, batoolila cishi cabo. Ndushinisho abalile akulyuungumika ceebo ca shakulya shibotu sha kuKili Aleseti.

⁸ Myuunda ya kuEshiboni yayuma, ayalo minyansa ya kuSibuma yayuma. Baleli ba mishobo imwi balyatoola minyansa yesu iindaawo kubota, iyo yakalinga kushika kuJasa munshiku shimwi akuliyala cakushika akuluyanga kwicwe. Kuya kumbo yakalinga kushika kuLweenge lwa Mwiinyo.

⁹ Aboobo ntoolila bweenka butoolila bantu ba kuJasa, kulila minyansa ya kuSibuma. Ndeelilila ndabala ya Eshiboni aya Eleyale, mukwiinga kusangalala kwa kupya kwa shisepo shanu akwa kutebula kwamanishikwa.

¹⁰ Kusangalala uko kwalinga kunyumfwika mumyuunda ya shisepo kwakushikwaamo. Bulya taaku utokwiimba nabi kooloma mumyuunda ya minyansa. Taaku utootyana minyansa kushilindi shakutyaninaamo, ee, mukwiinga Lesa wacalila kooloma mumyuunda ya minyansa.

¹¹ Ono moyo wangu wapenga abuumbi ceebo ca cishi ca Moabu. Buumba bwancata abuumbi ceebo ca ndabala ya Kili Aleseti.

¹² Bene Moabu batoocita na baya nkobalambilila balesa babo, batoolilemyabo. Na baya kuŋanda ya balesa babo mukupaila, taaku citoocitika.

¹³ Maswi aya ngoaayo Mwaami Lesa ngwaakaambawo kale pacishi ca Moabu.

¹⁴ Ono bulya Mwaami Lesa waamba ayi, “Na peendebo myaaka yotatwe ikwene, bulemu bwa cishi ca Moabu bulaakumana. Abalo bantu beshi bakapuluke mbakubalabo, nakubi boobo abalo balaakunoomanite cakuwabo akumuuwo.”