Esita 7 - Baibo Busansulushi Bwa Libuku Ili

¹ Munshila iyo mwaami wakaya aAmani mukusekelela pantu pomwi aEsita muka mwaami

² lwabili. Kabacinwa waini, mwaami wakeepusha Esita alimwi ayi, “Omukaangu Esita, utooyanda kusenganshi? Ndwiite ncoosuni ayi nkucitile. Ntookupa cili coonse ncoosuni nabibo musa wa bwaami bwangu.”

³ Lyalo Esita wakakumbula ayi, “Na inga camukonda nobaami kutambula kusenga kwangu kwakulitola panshi, kusenga kwangu nkwakwaamba ayi nebo abene misheesu tutacaikwi.

⁴ Nebo abene misheesu twakoolishikwa kwaamba ayi tunyonyoolwe, tucaikwe akulobeshekwa. Necalinga cakwaamba ayi nkuulishikwa ayi tube basha, naakwiinga ndoomunabo, kutamupenshaawo pacikani ici.”

⁵ Mpomunyaawo mwaami Sakisesi wakeepusha Esita ayi, “Anu ngani uyo utooyanda kucita ca mushobo uyo alimwi uli kuli?”

⁶ Esita wakakumbula ayi, “Mulwani wesu, shikutupensha, ngooyu Amani muntu mubiibi.” Amani wakalinga kulangilisha mwaami amukaakwe kaaloondete abuumbi.

⁷ Mpomunyaawo mwaami wakanyamuka mubukali, kushiya waini wakwe akuya mumuunda wa kuŋanda yakwe. Amani mukubona kwaamba ayi mwaami teshi amulekeleleewo, wakacaala kwaamba ayi akombelele buumi bwakwe kuli Esita muka mwaami.

⁸ Ono mwaami ndyaakapiluka kuswa mumuunda, Amani nceciindi ncakalinga kuliwaala pakalinga kushiite Esita. Lyalo mwaami wakaamba ayi, “Sa uyu muntu ulisuni akusekanya mukaangu pameenso angu, muŋanda yangu ya bwaami?” Mwaami ndyaakaambabo maswi aya, basankwa ba mwaami bakacaikwa lushalo bakafweka Amani kumeenso.

⁹ Ono umwi pakati kabo wakalinga kwiitwa ayi Alibona wakaamba ayi, “Shisamu shakwaangililawo bantu shilaampa mamita ali 22 shilishimpikitwe kuŋanda yakwe Amani. Wakashishimpikila kwaangililawo Modekayi eenka uyo wakapulusha buumi bwanu nobaami.” Lyalo mwaami wakaamba ayi, “Kamuya mwaangilile Amani pali nshisho.”

¹⁰ Aboobo Amani wakaangililwa pashisamu isho nshaakashimpikila Modekayi. Lyalo abukali bwa mwaami mpobwakamanina.