Esita 6 - Baibo Busansulushi Bwa Libuku Ili

Mwaami mbwaakalemeka Modekayi

¹ Ono mashiku eenka ayo, mwaami taakwe koonaawo. Aboobo wakaambila bantu ayi bamuletele libuku lya makani a bwaami bwakwe akumubelengela.

² Mucipansha cakabelengwa mwakacanika makani apali Modekayi mbuli mbwaakaluula Bigitana aTeleshi basankwa bakacaikwa lushalo abo bakalinga kulindilila shipinda sha mwaami. Wakabaluula ndibakalinga bapinga kucaya mwaami Sakisesi.

³ Mpeeke mwaami wakeepusha ayi, “Mbulemunshi Modekayi mbwaakapekwa ndyaakacita ceeci?” Basebenshi ba mwaami bakakumbula ayi, “Taaku ncaakacitilwa.”

⁴ Lyalo mwaami wakeepusha ayi, “Ngani wacinenenene uli muŋanda ya bwaami ino?” Ciindi ici Amani ndyaakenjilabo mulubansa kwaamba ayi aambile mwaami pamakani akwaangilila Modekayi pashisamu shakwaangililawo bantu.

⁵ Aboobo basebenshi bakakumbula ayi, “Amani ngulya utoolindilila kumubona.” Lyalo mwaami wakaamba ayi amumulwiite enjile.

⁶ Mpomunyaawo Amani wakenjila. Mwaami wakamwiipusha ayi, “Kuli muntu ngoonsuni kulemeka abuumbi. Ino nciinshi nceenga ndaciita kumuntu uyo?” Amani wakayeeya ayi, “Ngani aumwi uyo mwaami ngweenga wayeeya kulemeka kwiinda ndime? Taaku nabi womwi.”

⁷ Aboobo wakakumbula ayi “Nobaami pamuntu ngomutooyanda kulemeka,

⁸ amwaambile basebenshi balete mungaanjo wa bwaami ulya weenka ngomufwalaawo aliaki lyanu ilyo libikitwe mpande ya bwaami pamutwi wa ndilyo.

⁹ “Lyalo mubwese womwi wa bacinenenene banu wiindaawo kulemekwa kwaamba ayi afwalike muntu uyo mungaanjo wanu. Lyalo wacinenenene uyo atanjilile liaki mumikwakwa ya ndabala inene muntu uyo kaatantiteewo. Wacinenenene uyo ulyeelete kunooya caambilisha kunembo lyakwe ayi, ‘Ono bulya mwaami mbwaacita kumuntu ngweenga wasuna kulemeka!’ ”

¹⁰ Mpomunyaawo mwaami wakaambila Amani ayi, “Fwambaana, leta mungaanjo aliaki akupa bulemu ubu kuli Modekayi muJuda ulya ushiite pamwinjililo wa ŋanda ya bwaami. Umucitile shoonse isho nshewaamba.”

¹¹ Aboobo Amani wakabwesa mungaanjo aliaki. Mpeeke wakafwalika Modekayi akumwiinshaanya mumikwakwa ya ndabala paliaki ilyo, kaaya coolobesha ayi, “Ono bulya mwaami mbwaacita kumuntu ngweenga wasuna kulemeka!”

¹² Kuswawaawo Modekayi wakaboolela kumwinjililo wa ŋanda ya bwaami, sombi Amani wakaboolela kuŋanda yakwe ciwa kacilokete kunsoni.

¹³ Amani wakaambila Seleshi mukaakwe ababye boonse isho shoonse shakamucitikila. Abalo beshikumupandako maano amukaakwe bakamwaambila ayi, “Modekayi uyo walengesha kuwa kwanu ngumuJuda. Teshi mukamukomeewo, tau. Nkokwaamba ayi mwebo camana mwakomwa kale!”

Amani mbwaakacaikwa

¹⁴ Ono kabacibandika, basankwa ba mwaami bakacaikwa lushalo bakapola mukubwesa Amani kwaamba ayi aye cakufwambaana mukusekelela kwakabamba Esita.