Esila 5 - Baibo Busansulushi Bwa Libuku Ili

Mbobakatalika kuyaka alimwi ŋanda yakwe Lesa

¹ Ono balaluki bobilo Agayi alimwi aSekaliya wamulunyungu lwakwe Ido, bakatalika kulaluka kubaJuda abo bakalinga kwikala kucishi ca Juda alimwi akuJelusalemu muliina lyakwe Lesa wa bene Isilaeli uyo wakalinga pali mbabo.

² Mpeeke Selubabelo mwanaakwe Sheyalutyelo aJeshuwa mwanaakwe Josadaki bakatalika kuyaka alimwi Ŋanda yakwe Lesa muJelusalemu. Abalo balaluki bobilo abo bakabacafwaako.

³ Paciindi ici Tatenayi mweendeleshi wa kwitala lya Mulonga wa Yufuletisi, Sheta Bosenayi abacinenenenenyinaabo bakabeendela akubeepusha ayi, “Ngani wamupa nkusu shakuyaka Ŋanda yakwe Lesa iyi alimwi alubumbu ulu?”

⁴ Lyalo bakeepusha ameena abaabo bakalinga kuyaka ŋanda iyo.

⁵ Sombi Lesa wabo wakalinga kulama bamaloba ba baJuda alimwi tabakwe kubeemika kusebensa kulindila ayi batume maswi kumwaami Dalyasi akunyumfwa mbweshi akumbule.

⁶ Iyi njenkalata iyo Tatenayi mweendeleshi wa kwitala lya Mulonga wa Yufuletisi, Sheta Bosenayi abacinenenenenyinaabo njebakatuma kumwaami Dalyasi.

⁷ “Kuli ndimwe nobaami baDalyasi, kamweendelesha muluumuno.

⁸ Nobaami mulyeelete kwishiba kwaamba ayi twakalinga twaya kucishi ca Juda kuŊanda yakwe Lesa wiindaawo. Twakacana ayi itooyakwa amabwe anene alimwi akubika mapulanga mulubumbu. Mulimo utoosebenswa cankusu alimwi utokweenda lubilo.

⁹ “Twakeepusha bamaloba ba baJuda ayi, ‘Ngani wamupa nkusu shakuyaka Ŋanda yakwe Lesa iyi alimwi alubumbu ulu?’

¹⁰ Lyalo twakabeepusha ameena abo kwaamba ayi tulembe meena a bamatanjilili babo akwaatuma kuli ndimwe.

¹¹ “Ono bakatukumbula ayi, ‘Tuli basebenshi ba baLesa ba kwiculu apacishi ca panshi. Tutooyaka alimwi Ŋanda yakwe Lesa iyo kalekale mwaami shinkusu umwi wa bene Isilaeli njaakayaka akumanisha.

¹² Ono mukwiinga bamashali besu bakulukulu bakakalasha baLesa ba kwiculu, bakabalekelesha ayi bakomwe aNebukadinesa mwaami wa kuBabiloni, wa mucikoto ca bene Kaludeya, uyo wakanyonyoola Ŋanda iyi alimwi akutola bantu mubusha kucishi ca Babiloni.

¹³ Nakubi boobo, mwaaka wakutaanguna wa bweendeleshi bwakwe Sailasi mwaami wa bene Babiloni, mwaami ngowakapa mulawo wakwaamba ayi Ŋanda yakwe Lesa iyi iyakwe alimwi.

¹⁴ Ncakwiila wakaboosha ashintu sha golodi alimwi asha silifa isho Nebukadinesa nshaakakusha muŊanda yakwe Lesa ya kuJelusalemu akushitola muŋanda ya balesa bakwe kuBabiloni. Mwaami Sailasi wakapa shintu ishi kumuntu wakalinga kwiitwa ayi Sheshibasa, uyo ngwaakasala kuba mweendeleshi wa cishi ca Juda.

¹⁵ Mpeeke wakamwambila ayi, Bwesa shintu ishi akushiboosha kuJelusalemu alimwi akuyaka Ŋanda yakwe Lesa peenka pamusena ukulukulu.

¹⁶ Aboobo uyo Sheshibasa wakesa wakaba lwiimbi akutalika kuyaka Ŋanda yakwe Lesa kuJelusalemu. Kuswa ciindi ico kushikila asunu iciyakwa, sombi teena kumana.

¹⁷ “ ‘Ono nobaami tutoosenga ayi muyandoole makani alembetwe mulibuku lya bamaami ba mucishi ca Babiloni akubona na ncakwiila mwaami Sailasi wakapa mulawo wa kwaamba ayi Ŋanda yakwe Lesa iyi iyakwe alimwi muJelusalemu. Tutoosenga nkambo ayi mukatulwiite muyeeyo wanu pamakani aya.’ ”