Esekelo 41 - Baibo Busansulushi Bwa Libuku Ili

¹ Mpomunyaawo muntu uyu wakantola kuMusena Usalalite. Mpeeke wakapima mwakwiinda kuya muMusena uyo akucana ayi wakalinga kucite mamita ali 3,

² mubufwaafwi mwakalinga kucite mamita ali 5. Lubumbu ulo kumbasu shobilo shoonse lwakalinga kucite mamita ali 2.5 mumutika. Kuswawaawo wakapima cipinda coonse akucana ayi cakalinga kucite mamita ali 20 mubulaamfu amamita ali 10 mubufwaafwi.

³ Kuswawaawo wakenjila mucipinda ca mukati mwiine. Wakapima mwakwiinda kuya mucipinda ico akucana ayi mwakalinga kucite mita yomwi, mubufwaafwi mwakalinga kucite mamita ali 3. Lubumbu ulo kumbasu shobilo shoonse lwakalinga kucite mamita ali 3.5 mumutika.

⁴ Lyalo wakapima cipinda ciine akucana ayi cakalinga kucite mamita ali 10 mumbasu shoonse. Mpeeke wakandwiita ayi, “Uyu nguMusena Usalalite Wiindaawo.”

Shipinda shakayakwa kulubumbu lwa Ŋanda yakwe Lesa

⁵ Mpomunyaawo muntu uyo wakapima mutika wa lubumbu lwa Ŋanda yakwe Lesa akucana ayi lwakalinga kucite mamita ali 3. Kulubumbu lwakalinga kushingulukite Ŋanda yakwe Lesa, kwakalinga shipinda shakalinga kucite mamita ali 2 mubufwaafwi.

⁶ Shipinda isho shakayakwa cakupanga maanda otatwe kuya mwiculu. Ŋanda yomwi ayomwi yakalinga kucite shipinda shili makumi otatwe. Lubumbu lwa Ŋanda yakwe Lesa lwakalinga luniini mumutika kwiinda lwa cipinda ca panshi, nkokwaamba ayi lubumbu lwakalinga kushimpila mulubye kwakubula cimwi cakubika mulubumbu lwa Ŋanda yakwe Lesa ayi lushimpe.

⁷ Aboobo lubumbu lwa Ŋanda yakwe Lesa lwakalinga kucite mutika unene panshi kwiinda wa peculu. Nkokwaamba ayi shipinda sha peculu peene shakalinga shinene mubulaamfu kwiinda sha panshi. Kwakalinga matantilo akalinga kuswa muŋanda ya panshi, kwiinda muŋanda yabili tibili akuyatatu kuya peculu.

^8-11 Lubumbu lwa pansengwe lwa shipinda isho lwakalinga kucite mutika ucite mamita ali 2.5. Kushipinda shakalinga kulubasu lwa kumatwa kwakalinga mulyango womwi akwalo kushipinda shakalinga kumalenge kwakalinga mulyango womwi. Ono ndakabona capanshi cakalinga kushingulukite Ŋanda yakwe Lesa ico cakalinga kucite mamita ali 2.5 mubufwaafwi. Cakalinga kucite mamita ali 3 kuya mwiculu alimwi capanshi ico cakalinga kweelene alwiimbi lwa shipinda shakalinga mweela lubumbu lwa Ŋanda yakwe Lesa. Ono kwakalinga musena pakati ka capanshi amaanda akalinga kusebensesha bapailishi uyo wakalinga kucite mamita ali 10 kucilinganaamo.

Ŋanda yakalinga kulubasu lwa kumbo

¹² Ŋanda yakalinga kulangite kulubansa lwa Ŋanda yakwe Lesa kulubasu lwa kumbo yakalinga kucite mamita ali 45 mubulaamfu alimwi amamita ali 35 mubufwaafwi. Lubumbu alwalo lwakalinga kucite mamita ali 2.5 mumutika kumbasu shoonse.

Muntu uyo mbwaakapima ŋanda yakwe Lesa yoonse

¹³ Kuswawaawo muntu uyo wakapima Ŋanda yakwe Lesa iyo yakalinga kucite mamita ali 50 mubulaamfu. Wakapima kuswa kulubumbu lwakwisule lya Ŋanda yakwe Lesa kucilingana musena ulibo bwaashi kuya mukushika kweela lya ŋanda yakumbo akucana ayi pakalinga mamita ali 50.

¹⁴ Mushinso kucilingana kunembo lya Ŋanda yakwe Lesa, kubikaawo amisena ili bwaashi kumbasu shobilo shoonse wakalinga mamita ali 50.

¹⁵ Lyalo wakapima ŋanda iyo yakalinga kumbo lya Ŋanda yakwe Lesa kubikaawo amwakwiinda mumbasu shobilo shoonse akucana ayi pali mamita ali 50 mubulaamfu. Musena Usalalite, Musena Usalalite Wiindaawo acipinda cakwinjililaako ca Ŋanda yakwe Lesa cilangite mulubansa,

Busansulushi bwa ŋanda yakwe Lesa

¹⁶ shoonse shakalinga kufwekeleshetwe tupulanga kuswa panshi kushika kumbwelyo. Ayalo milyango, mbwelyo amwakwiinda kwakalinga kushingulukite maanda ayo otatwe shakalinga kucite tupulanga.

¹⁷ Mumbu shamukati ka Ŋanda yakwe Lesa, kuswa panshi kuya mukushika peculu pakalinga kweela milyango shakalinga kufwekeleshetwe tupulanga akatalwa shakubotesha.

¹⁸ Shakubotesha isho shakalinga tupukupuku alimwi abakelebu. Shintu isho shakalinga kubambanishikwa apa kapukupuku panembo kelebu. Kelebu womwi awomwi wakalinga kucite shiwa shobilo.

¹⁹ Ciwa ca muntu cakalinga kulangite kukapukupuku kulubasu lumwi, ciwa ca nkalamu kukapukupuku kulubasu lumwi. Shintu isho shakatalwa kushinguluka mumbu shoonse

²⁰ kuswa panshi kuya mukushika peculu pakalinga kweela milyango.

²¹ Shisamu sha kumulyango wa Musena Usalalite shakalinga kweelenebo mumbasu shone shoonse alimwi shakalinga kweelene asha kuMusena Usalalite Wiindaawo.

Cipaililo ca shisamu

²² Kwakalinga cipaililo ca shisamu ico cakalinga kucite mamita ali 1.5 kuya mwiculu alimwi amita yomwi mubufwaafwi. Ono shisamu sha mumakonko, capanshi ca ncico alimwi asha mumbasu shoonse shakalinga sha shisamu. Mpomunyaawo muntu uyo wakandwiita ayi, “Iyi njetebulu ili pameenso a Mwaami Lesa.”

Shisasa

²³ Kwakalinga shisasa shakalinga kweela kwa mwakwiinda kuya kuMusena Usalalite alimwi kwakalinga shisasa shimwi kweela kwa mwakwiinda kuya kuMusena Usalalite Wiindaawo.

²⁴ Shisasa isho shakalinga kupaankene shobilo shobilo alimwi shakalinga kucalukila pakati.

²⁵ Pashisasa sha Musena Usalalite pakalinga kutalitwe tupukupuku abakelebu bweenka mbuli kumumbu. Kwakalinga kaluli ka mapulanga peculu lya mulyango wa cipinda cakwinjililaako.

²⁶ Kulubumbu lwa kulubasu lwa ŋanda yakwinjililaako kwakalinga mbwelyo shiniini shicite tupukupuku kumbasu shobilo shoonse. Tupinda twa mulubasu lwa Ŋanda yakwe Lesa atwalo twakalinga kucite shisamu shitalitwe bweenka ubo.