Esekelo 34 - Baibo Busansulushi Bwa Libuku Ili

Beembeshi ba bene Isilaeli

¹ Mpeeke Mwaami Lesa wakaŋambila ayi,

² “Webo omuntu, Laluka mapensho pabeembeshi ba bene Isilaeli akubalwiita ayi nebo neMwaami Lesa Shinkusu shoonse ndaamba ayi, ‘Mapensho kubeembeshi ba bene Isilaeli abo balilama beene beenka! Sa beembeshi tabeelete kulama litanga?

³ Mulanwa mandili, mulafwala nsalu shakatungwa abooya bwa mbelele, mulacaya akulya mbelele shiinite, sombi tamulaami litanga napaceyi.

⁴ Tamukwe kuyumyawo shilefukite, kushilika shilwashi nabi kwaanga shilonda sha sheesho shakalicisa. Tamukwe kuboosha sheesho shakalinga kuswa munshila nabi kuyandoola sheesho shakasoweka. Wakasheembela cabuyamba alimwi calunkutwe.

⁵ Aboobo shakapalangana mukwiinga kwakabula mweembeshi. Ono ndishakapalangana shakaba cakulya ca banyama ba muluundu.

⁶ Mbelele shangu shakeengaila mutulundu toonse tunene atuniini toonse. Bakapalanganina mucishi ca panshi coonse alimwi taaku nabi womwi wakashikonkela nabi kushiyandoola, sobwe.’

⁷ “Paceebo ceeco, mwebo nobeembeshi amukutike maswi angu nebo neMwaami Lesa. Nebo ndaamba ayi,

⁸ ‘Kweelana ambocibete lushinisho ayi nebo neMwaami Lesa Shinkusu shoonse ndi muumi, mbweeke ubo mulyeelete kunyumfwila. Ono ceebo cakwaamba ayi litanga lyangu lyabula mweembeshi, banyama ba muluundu bakacaya mbelele akushilya. Beembeshi bangu tabakwe kuyandoola litanga lyangu, sombi bakalinga kunoolilamabo beene, kuteshi kulama mbelele shangu.’

⁹ Paceebo ceeco mwebo nobeembeshi amunyumfwe.

¹⁰ Nebo neMwaami Lesa Shinkusu shoonse ndaamba ayi, ‘Nobeembeshi, ndaakumulwana akumupa mulandu palitanga lyangu. Ndaakumukasha kulama litanga langu kwaamba ayi mwebo mutakaliwo tubili mbelele sha ndilyo. Ndaakushifuna kumilomo yanu. Ncakwiila teshi mukashilyewo tubili.

Mweembeshi mubotu

¹¹ “ ‘Nebo neMwaami Lesa Shinkusu shoonse ndamulwiita ayi ndaakulilangweeta mbelele shangu akusheembela.

¹² Bweenka mbuli mweembeshi mbwaalangoola mbelele shakwe na shapalangana, mbweeke ubo anebo mbweshi nkalangoole mbelele shangu. Ndaakushifuna kuswa mumisena yoonse moshakalinga shapalanganina bushiku buyoosha bwa munshinshe ushiya mbi.

¹³ Ndaakushileta kushikusha pamishobo ya mucishi coonse ca panshi akusheembela mucishi ca nshisho. Ndaakushisanina mumafulo a patulundu twa muIsilaeli, kweela tulonga alimwi amumisena yoonse ibotu ya mucishi ico.

¹⁴ Ndaakusheembelela mumafulo mutaamu cakulisukama mutulundu, mushinyika alimwi amumafulo acite mweemfu a mucishi ca Isilaeli.

¹⁵ Nebo nemwiine ndaakuba mweembeshi wa mbelele shangu alimwi ndaakushicanina mulela wakookesheshaawo. Nebo neMwaami Lesa Shinkusu shoonse ndaamba.

¹⁶ “ ‘Ndaakuyandoola shisowekete akuboosha shakaswa mulitanga. Ndakwaanga shilonda sha sheesho shakalicisa, kuyumya shilefukite, sombi shiinite ashicite nkusu ndaakushinyonyoola. Ndakweembela mbelele shangu cabululami.

¹⁷ “ ‘Amwebo nolitanga lyangu, nebo neMwaami Lesa Shinkusu shoonse ntoomulwiita ayi ndaakoombolosha mbelele yomwi ayomwi akupansaanya shibotu ashibiibi, ee, mbelele kuswa kumpongo.

¹⁸ Sa tamuna kukuta kulya mweemfu ubotu? Sa ncibotu kulyatoola mweemfu wanu amyeendo? Sa tamuna kukuta maanshi abotu ngomutoonwa? Sa ncibotu kufundaanya acaala amyeendo yanu?

¹⁹ Sa mbelele shangu shimwi shilyeelete kulya nshemwalyatoola akunwa maanshi ngomwafundaanya amyeendo yanu?’

²⁰ “Paceebo ceeco nebo neMwaami Lesa Shinkusu shoonse ndaamba ayi, ‘Nebo nemwiine ndimeshi nkoomboloshe mbelele shiinite ashinyangite.

²¹ Mwakalinga kuyasa shilwashi ameeca anu tibili mwashitanda mulitanga.

²² Ndaakufuna mbelele shangu cakwaamba ayi teshi shikalyatililwewo tubili. Ndaakoombolosha mbelele yomwi ayomwi akupansaanya shibotu ashibiibi.

²³ Lyalo ndaakushipa mweembeshi wamulunyungu lwakwe Defedi musebenshi wangu ayi asheembele. Lakwe ngweshi akanooshilama akuba mweembeshi wa nshisho womwibo ndondoli.

²⁴ Nebo neMwaami Lesa ndaakuba Lesa wa nshisho alimwi mwaami wamulunyungu lwakwe Defedi musebenshi wangu ulaakunooshilela. Nebo neMwaami Lesa ndaamba.

²⁵ Kuswawaawo ndaakupanga cipangano ca luumuno a nshisho akukusha banyama ba muluundu mucishi kwaamba ayi shikekale muluyanga nabi mumusaansa kwakubula cakulisukama.

²⁶ “ ‘Ndaakubapa coolwe akubaleka ayi bekale mumisena ishingulukite kalundu kangu kasalalite. Ndaakunootuma mfula yatepetepe muciindi ceelete. Ncakwiila ilaakuba mfula yatepetepe ya coolwe.

²⁷ Shisamu sha mumyuunda yabo shilaakucata shisepo abwalo bulongo bulaakukusha shishango. Bantu balaakwikala kwakubula cakulisukama mucishi cabo. Ndaakutyola lijoko lyabo akubakusha mumaansa abaabo bakalinga babatola busha. Lyalo ndyeshi bakeshibe ayi nebo ndi Mwaami Lesa.

²⁸ Teshi bakasaalweewo tubili kumishobo imwi nabi na kulikwa kubanyama ba muluundu. Balaakwikala kwakubula cakulisukama alimwi taaku muntu weshi akabaloondesheewo.

²⁹ Ndaakubapa cishi cicite bulongo bubotu. Teshi bakakolwewo tubili nsala mucishi nabi kushibulukwaawo kumishobo imwi.

³⁰ Lyalo ndyeshi bakeshibe ayi anu nebo, neMwaami Lesa, Lesa wabo ndyaabo alimwi ayi balo bene Isilaeli mbantu bangu. Nebo neMwaami Lesa Shinkusu shoonse ndaamba.

³¹ “ ‘Mwebo nombelele shangu, mbelele sha mumafulo angu, muli bantu bangu anebo ndi Lesa wanu. Nebo neMwaami Lesa Shinkusu shoonse ndaamba.’ ”