Esekelo 24 - Baibo Busansulushi Bwa Libuku Ili

Mupika wakutelekaamo

¹ Mumwaaka wasanu ayone wa busha bwesu mumweenshi walikumi pabushiku bwalikumi Mwaami Lesa wakandwiita ayi,

² “Webo omuntu, lemba bushiku buno ceebo buno mbobushiku mwaami wa bene Babiloni mbwaatooshinguluka ndabala ya Jelusalemu ayi eelwaane.

³ Lwiita mushobo uyu waashu cikoshanyo. Ubalwiite ayi nebo neMwaami Lesa Shinkusu shoonse ndaamba ayi, ‘Amubike mupika paciiko akubika maanshi muli nguwo.

⁴ Mwamana mubikeemo shipumputa sha nyama, shipumputa sha nyama iindaawo kubota. Nkokwaamba ayi myeendo yakatako ayakunembo. Muusuushe amafuwa eendaawo kubota.

⁵ Mubwese nyama ya mbelele indaawo kubota. Kuswawaawo musonseleko nkuni shiinji kwaamba ayi mafuwa apye. Nyama iyo mwiitelekele pantu pomwi amafuwa.’ ”

⁶ Mwaami Lesa Shinkusu shoonse waamba ayi, “Mapensho kundabala itila bulowa, ndabala ili anga ngumupika ucite ndalabwa isho sheshi shikabule kuswa! Cipumputa comwi acomwi cilakushikwaamo kwakubula aubika maano kumupika uyo.

⁷ Bulowa mboyakatila pakati ka njiyo, yakalinga kunoobutilabo pamwaandami. Teyakalinga kubutila panshibo apo mpweenga bwafwekeleshekwa abulongo, sobwe.

⁸ Bulowa ubo ndakabulekela pamwaandami uyo kwaamba ayi butakafukilwi, ee, kwaamba ayi bukali bwangu busonkomonwe, lyalo mbaboosheshe cishole.”

⁹ Paceebo ceeco, Mwaami Lesa Shinkusu shoonse waamba ayi, “Mapensho kundabala itila bulowa! Nebo nemwiine ndaakubunjika nkuni.

¹⁰ Aboobo kamucibunjika nkuni akukunka mulilo. Muteleke kabotu nyama akubikako tununkila kabotu mubuyani. Muteleke kushikila mafuwa ashukute.

¹¹ Kuswawaawo mukalike mupika utacite cintu uyo pamakalangasha kushikila mupika usalale kukulungula amukuba wa nguwo unyake. Mucite boobo kwaamba ayi matombe asunguluke andalabwa shimaneemo.

¹² Nakubi boobo mupika uyo teshi ukutuke, ndalabwa shiliimo tashikoonshi kumanininaamo kuswa, tashikoonshi kuswa nabibo kumulilo.

¹³ “Webo ondabala ya Jelusalemu bufuule bwako nshendalabwa. Ndakeelesha kukusansha ayi utube, sombi cakaala. Ono teshi ukatubeewo alimwi, sobwe, kushikila ukanyumfwe cilemeneshi ca bukali boonse.

¹⁴ “Nebo neMwaami Lesa ndime ntokwaamba. Ciindi cangu cakucitawo comwi pali ndiwe cashikila. Teshi nkaboolewo pesule, kufwa nkumbu nabi kukulekabo, sobwe. Ulaakupekwa mulandu kweelana abwikaalo bwako alimwi amicito yako. Nebo neMwaami Lesa Shinkusu shoonse ndaamba.”

Lufu lwa mukaakwe Esekelo

¹⁵ Mpeeke Mwaami Lesa wakaŋambila ayi,

¹⁶ “Webo omuntu, ntooyanda kukunyaya muntu uyo ngoosunishi. Nakubi boobo, utatongooki, kulila buumpute nabibo kuloshawo minsonshi.

¹⁷ Ukanooshinshimukabo cakutanyumfwika alimwi kuteelesha kulila mufu. Utakafuuli cisani ncoofwala kumutwi nabi kufuula nkwabilo shako. Utakalifwekiwo pamulomo nabi kulya shakulya shilikwabo pamalilo.”

¹⁸ Aboobo macuunsa ndakabandika abantu boonse, mpeeke macolesha, bakaangu bakafwa. Ono ndibwakaca ndakacita kweelana ambondakaambilwa.

¹⁹ Mpomunyaawo bantu bakanjipusha ayi, “Sa teshi utulwiite shintu ishi nshewacita mboshitoosansulula?”

²⁰ Lyalo ndakabakumbula ayi, “Mwaami Lesa wakaŋambila ayi,

²¹ ‘Lwiita mushobo wa bene Isilaeli ayi nebo neMwaami Lesa ndaamba ayi, ntooyanda kubisha Ŋanda yangu isalalite, ee, ciyubilo ico ncemulisumpwitaawo, cisangalasha meenso anu alimwi apo pali myoyo yanu. Bana basankwa abanakashi abo mbomwakashiya balaakucaikwa kunkondo.

²² Lyalo amwebo mulaakucita bweenka bulya mbowacita. Teshi mukafwekewo pamilomo yanu nabi kulya shakulya shilikwa pamalilo.

²³ Mulaakunoofwetebo shisani shakufwala kumutwi ankwabilo shanu. Teshi mukoongumane nabi kulilawo buumpute, sombi mulaakukokabo ceebo ca shibiibi shanu akutongela pakati kanu nobene.

²⁴ Esekelo waba citondesho kuli ndimwe, mulaakucita bweenka mbwaacita. Shintu ishi shaakucitika, ndyeshi mukeshibe ayi nebo ndi Mwaami Lesa.’ ”

²⁵ Mpeeke Mwaami Lesa wakaamba ayi, “Ono webo omuntu, ndaakubanyaya Ŋanda yangu, ee, ciyubilo ncebalisumpwitaawo ico cibapa bulemu, ncebasangalalilaamo alimwi cisangalasha meenso abo. Ndaakutola busha bana babo basankwa abanakashi.

²⁶ Ono pabushiku mbweshi nkacite boobo, muntu weshi akaloboke mumapensho aya ulaakwisa mukukulwiita makani aya.

²⁷ Paciindi ico ulaakukonsha kwaamba. Ulaakubandikaakwe alimwi teshi ukoomunewo tubili. Paceebo ceeco ulaakuba citondesho kuli mbabo. Lyalo ndyeshi bakeshibe ayi nebo ndi Mwaami Lesa.”