Esekelo 18 - Baibo Busansulushi Bwa Libuku Ili

Muntu womwi awomwi ulaakufwita shibiibi shakwe

¹ Mwaami Lesa wakaŋambila ayi,

² “Anu mwebo nobantu mulaambanshi ndyemwaamba kashimpi aka pacishi ca Isilaeli? ‘Minyansa isasamwita yalya bamashali, ilashiya kusasamwita kwa njiyo mumilomo ya bana babo.’

³ “Nebo neMwaami Lesa Shinkusu shoonse ndaamba ayi, ‘Kweelana ambocibete lushinisho ayi ndi muumi, kashimpi aka teshi mukakaambewo tubili mucishi ca Isilaeli.

⁴ Ceebo buumi bwa bantu boonse mbwaangu, nkokwaamba ayi buumi bwa mushali abwa mwaana boonsebo mbwaangu. Anu muntu uyo ubisha ngweshi akafwe.’

⁵ “Twaambe ayi kuli muntu ululeme uyo ucitabo shintu shakutanyengelela alimwi ashilulemebo.

⁶ Muntu uyo kaatali milambu yakabengwa kumisena yakulambililako balesa beensu nabi kulambila shibumbwabumbwa sha mushobo wa bene Isilaeli. Taabishi muka shikamukobonyina nabi kukumana amwanakashi wakubala.

⁷ Taalyatilili muntu nabi womwi, sombi ulapilusha cintu ncaakacatila kushinkongole. Taaciti bupambi, sombi ulapa shakulya kubaabo bafwite nsala akupa shakufwala abo batacite.

⁸ Taakweleteshi maali ayi acaninewo mpindu, sobwe Ulalitalamusha kukucita shibiibi akoombolosha bweelete bantu batoopikishanya.

⁹ Muntu wa mushobo uyo ulakonkela milasho yangu akulama milawo yangu cakushomeka. Muntu uyo uliluleme, ndushinisho ulaakuba abuumi. Nebo neMwaami Lesa Shinkusu shoonse ndaamba.

¹⁰ “Ono twaambe ayi muntu uyo ulicite mwaana musankwa shilunkutwe uyo utila bulowa nabi kucita comwi cili coonse pashintu ishi,

¹¹ nakubi kwaamba ayi baishi taaku ncebakacitawo pali nshisho. Ee, twaambe ayi ulalya milambu yakabengwa kumisena yakulambililako balesa beensu. Ulabisha muka shikamukobonyina.

¹² Ulalyatilila bakandu abaabo bataaku mbobabete. Ulacita bupambi alimwi taapilushi cintu ncaakacatila shinkongole. Ulalambila shibumbwabumbwa akucita shintu shilensha bunya.

¹³ Ulakweletesha maali ayi acaninewo mpindu. Sa muntu wa mushobo uyo inga waba abuumi? Sobwe teshi akabeewo abuumi! Ndushinisho ulaakufwa ceebo wakacita shintu ishi shoonse shilensha bunya. Lufu lwakwe ndwakuliletela mwiine.

¹⁴ “Ono twaambe ayi mwaana musankwa uyo kaacite mwanaakwe musankwa uyo ubona shibiibi isho shoonse baishi nshebacita, sombi nabi lakwe ulashibona, kaatashiciiti.

¹⁵ Kaatali milambu yakabengwa kumisena yakulambililako balesa beensu nabi kulambila shibumbwabumbwa sha mushobo wa bene Isilaeli. Taabishi muka shikamukobonyina.

¹⁶ Taalyatilili muntu nabi womwi alimwi taacatili cintu pakunkweletesha. Taaciti bupambi, sombi ulapa shakulya kubaabo bafwite nsala akupa shakufwala abo batacite.

¹⁷ Ulalitalamusha kukucita shibiibi. Taakweleteshi maali ayi acaninewo mpindu, sobwe. Mwaana wa mushobo uyo ulalama milawo yangu cakushomeka akukonkela milasho yangu. Mwaana uyo teshi akafwite shibiibi sha baishi. Ndushinisho lakwe ulaakuba abuumi.

¹⁸ Sombi baishi balaakufwita shibiibi shabo beene ceebo bakalinga kucenjeeka, kupamba akucita shintu shibiibi pakati ka bene mishaabo.

¹⁹ “Nakubi boobo muleepusha ayi, ‘Ceebonshi mwaana ncaatakonshi kupengela shibiibi sha baishi?’ Kukumbula nkwakwaamba ayi mwaana wakacita shintu shakutanyengelela ashiluleme alimwi akulama kabotu milasho yangu yoonse. Ndushinisho lakwe ulaakuba abuumi.

²⁰ Muntu uyo ubisha ngweshi akafwe. Mwaana teshi akapengele shibiibi sha mushali wakwe alakwe mushali teshi akapengele shibiibi sha mwanaakwe. Muntu ululeme ulaakulambulwa ceebo ca bululami bwakwe mwiine alakwe mucita shibi ulaakupengela bubi ubo mbwaacita mwiine.

²¹ “Sombi na mucita shibi wasanduka kuswa kushibiibi shakwe shoonse isho nshaacita, watalika kulama milasho yangu yoonse, akucita shintu shakutanyengelela ashiluleme, muntu uyo ulaakuba abuumi. Ncakwiila teshi akafweewo, sobwe.

²² Shibiibi shakwe shoonse shilaakulekelelwa alimwi ulaakuba abuumi ceebo cakucita shintu shiluleme.

²³ Nebo neMwaami Lesa ndeepusha ayi, ‘Sa nebo ndasangalala kubona mucita shibi kaafwa? Sobwe, ndasangalala kumubona kaasanduka kuswa kunshila shakwe shibiibi akuba abuumi.’

²⁴ “Na muntu ululeme wacileka kucita shabululami akutalika kubisha akucita shintu shilensha bunya isho shicita bamucita shibi, sa inga waba abuumi? Sobwe, taakuuwo cintu ciluleme nabi comwi ico ncaakacita ceshi cikeebalukweewo. Ncakwiila ulaakufwa ceebo cakutashomeka kwakwe alimwi ashibiibi isho nshaakacita.

²⁵ “Ono mwebo mulaamba ayi, ‘Nshila sha Mwaami Lesa tashilulemeewo.’ Amunyumfwe mwebo nobene Isilaeli. Sa mutooyeeya ayi nshila shangu nsheshitaluleme? Sa teshi nshila shanu shitaluleme?

²⁶ Na muntu ululeme wacileka kucita shabululami akutalika kubisha, lyalo wafwa, ulafwita ceebo ca shibiibi nshaakacita.

²⁷ Na mucita shibi wasanduka kuswa kushibiibi shakwe shoonse isho nshaacita, watalika kucita shintu shakutanyengelela ashiluleme, muntu uyo ulaakupulusha buumi bwakwe.

²⁸ Ulaakuba abuumi ceebo wakayeeya shilubo shoonse nshaacita akushileka, ndushinisho teshi akafweewo.

²⁹ Nakubi boobo mwebo nobene Isilaeli mulaamba ayi, ‘Nshila sha Mwaami Lesa tashilulemeewo.’ Sa mutooyeeya ayi nshila shangu nsheshitaluleme mwebo nobene Isilaeli? Sa teshi nshila shanu shitaluleme?

³⁰ “Ono nebo neMwaami Lesa Shinkusu shoonse ndaamba ayi, ‘Mwebo nobene Isilaeli, ndaakoombolosha womwi awomwi kweelana anshila shakwe. Amusanduke kuswa kushilubo shanu! Mutaleeki shibiibi shanu ayi shimunyonyoole.

³¹ Amuleke shilubo shoonse nshemwakacita, mube amoyo upya alimwi atulango tupya. Ceebonshi mutooyanda kufwa mwebo nobene Isilaeli?

³² Nebo neMwaami Lesa Shinkusu shoonse nshisuni kwaamba ayi nabi womwi afwe. Aboobo amusanduke kuswa kushibiibi shanu, mube abuumi.’ ”