Esekelo 10 - Baibo Busansulushi Bwa Libuku Ili

Bulemu bwakwe Lesa mbobwakashiya ŋanda yakwe

¹ Ndindakalanga, ndakabona cakalinga kuboneka anga ncuuna ca bwaami cakapangwa amabwe a Safaya. Cakalinga peculu lya musena ufongomene uyo wakalinga peculu lya mitwi ya bakelebu.

² Mpomunyaawo Mwaami Lesa wakaambila muntu uyo wakalinga kufwete shakufwala sha nsalu iteshimite ayi, “Koya unjile pakati ka mawilo munshaabakelebu. Bwesa makalangasha a mulilo pakati ka bakelebu akwaasansaanya mundabala.” Lyalo wakenjila kaamubwene.

³ Bakelebu bakalinga kwiimfwili kulubasu lwa kumalenge lya Ŋanda yakwe Lesa muntu uyo ndyaakenjila, likumbi lyakesula lubansa lwa mukati.

⁴ Lyalo mumuni utowa uyo utondesha bulemu bwa Mwaami Lesa wakanyamuka akuya mwiculu kuswa pabakelebu kumwinjililo wa Ŋanda yakwe Lesa. Likumbi lyakesusha Ŋanda iyi. Alwalo lubansa lwa njiyo loonse lwakesulabo mumuni wa bulemu ubo.

⁵ Ono coongo ca mapapaminwa a bakelebu cakalinga kunyumfwika akulubansa lwa kunsengwe. Cakalinga kunyumfwika anga ndiswi lya Mwaami Lesa Shinkusu shoonse.

⁶ Ono Mwaami Lesa ndyaakaambila muntu uyo wakalinga kufwete shakufwala sha nsalu iteshimite ayi, “Bwesa mulilo pakati ka mawilo ali munshaabakelebu,” muntu uyo wakaya weemikana kulubasu lwa liwilo limwi.

⁷ Mpeeke kelebu umwi wakatambika lyaansa mumulilo uyo wakalinga pakati kabo. Wakalapula makalangasha amwi mulyaansa lyakwe akwaabika mumaansa a muntu uyo wakalinga kufwete shakufwala sha nsalu iteshimite. Alakwe wakaatambula akuswita pansengwe.

⁸ Munshaamapapaminwa a bakelebu abo mwakalinga shakalinga kuboneka anga ngamaansa a muntu.

⁹ Ndindakalanga, ndakabona mawilo one kumbasu sha bakelebu. Nkokwaamba ayi liwilo lyomwi kulubasu lwa kelebu womwi awomwi. Liwilo lyomwi alyomwi kubekabeka anga ndibwe lyamakwebo.

¹⁰ Mawilo oonse one akalinga kukoshenye. Lyomwi alyomwi lyakalinga kuboneka anga lilicite liwilo limwi licilingene mukati.

¹¹ Ono pakweenda, akalinga kululama kulila lubasu pambasu shone uko nkweenga kwalanga bakelebu abo. Mawilo taakalinga kupetooka pakweenda bakelebu abo. Bakelebu bakalinga kweenda kabacatene kuya kuli koonse nkweenga kabasuni cakutasandulukaawo.

¹² Mibili yabo, misana yabo, maansaabo alimwi amapapaminwa abo shakalinga kuswitebo meenso bweenka bwakalinga mawilo abo one.

¹³ Ndakanyumfwa mawilo ayo kaaitwa ayi, “Mawilo ashinguluka.”

¹⁴ Kelebu womwi awomwi wakalinga kucite shiwa shone. Ciwa cakutaanguna cakalinga ca kelebu, cabili cakalinga ca muntu, catatu cakalinga ca nkalamu, cane cakalinga ca mumbankwashi,

¹⁵ Bakelebu abo nsheshilengwa sheenka nshendakabonaawo kuMulonga wa Keba. Na bakelebu abo banyamuka kuswa panshi

¹⁶ akweenda, aalo mawilo nkunyamuka akweenda. Na bakelebu abo bafungulula mapapaminwa abo ayi booluke, aalo mawilo nkuyaabo.

¹⁷ Na bakelebu beemikana, aalo mawilo nkwiimikana. Na booluka, aalo mawilo nkuyaabo mukwiinga bakelebu mbobakalinga kweendelesha mawilo ayo.

¹⁸ Lyalo mumuni utowa uyo utondesha bulemu bwa Mwaami Lesa wakashiya mwinjililo wa Ŋanda yakwe Lesa akwiimikana peculu lya bakelebu.

¹⁹ Kaanjebela, bakelebu bakafungulula mapapaminwa abo akunyamuka kuswa panshi. Aalo mawilo akayaabo. Bakaya beemikanaako paniini kumulyango wa mwinjililo wakwicwe wa Ŋanda yakwe Lesa. Lyalo mumuni utowa, uyo utondesha bulemu bwakwe Lesa wa bene Isilaeli, wakalinga peculu lyabo.

²⁰ Ono ndakeshiba cakushinisha ayi bakelebu abo nsheshilengwa sheenka nshendakabonaawo munshaabulemu bwakwe Lesa wa bene Isilaeli kuMulonga wa Keba.

²¹ Womwi awomwi wakalinga kucite shiwa shone, mapapaminwa one alimwi acintu cakalinga kuboneka anga ndyaansa lya muntu munshaalipapaminwa lyomwi alyomwi.

²² Shiwa shabo shakalinga kuboneka bweenka mbuli sheesho nshendakabona kuMulonga wa Keba. Kelebu womwi awomwi wakalinga kweenda cakululamabo kunembo.