Dutolonomi 8 - Baibo Busansulushi Bwa Libuku Ili

Cishi cibotu nceshi bakabwese

¹ “Amukonkele cakushomeka milawo yoonse njendamupa sunu kwaamba ayi munooli boomi, mufule alimwi mukabwese cishi ico Mwaami Lesa ncaakashomesha kubamashali banu bakulukulu.

² Amwiibaluke mwaami Lesa, Lesa wanu mbwaakamutanjilila mulweendo loonse lwa muluyanga lwa myaaka makumi one iyo yeenda. Wakalinga kumutumina makatasho mukumweelesha kwaamba ayi abone mpomwiimfwi alimwi na inga mwacikonsha kukonkela milawo yakwe.

³ Wakamukolesha nsala sombi wakamupa mana, cakulya ico mwebo abamashali banu bakulukulu ncemutana kulyaawo kale. Ici wakacicita kwaamba ayi amwiishe ayi cakulya ceenka teshi nceenga capa buumi muntu sombi amaswi oonse Mwaami Lesa ngaamba.

⁴ Mumyaaka iyi ili makumi one shakufwala shanu tashikwe kukwamookaawo alimwi myeendo yanu taikwe kushimbaawo.

⁵ Amwishibe kwaamba ayi Mwaami Lesa, Lesa wanu ulamululika akumupa mulandu bweenka mbuli mushali mbwaaisha bana bakwe ayi bacileke kubisha.

⁶ Ono aboobo amucite kweelana aMwaami Lesa mbwaamwaambila, nkokwaamba ayi kwikala kweelana amilawo yakwe akumulemeka.

⁷ Mwaami Lesa, Lesa wanu utoomutola mucishi cicite bulongo bubotu, cishi cicite milonga atuntupu alimwi atulonga twa panshi uto tupulila mushinyika amunshaatulundu.

⁸ Ncishi cilimwa witi, bale, minyansa, nkuyu, mapomegilaneti, maolifi, alimwi momuswa buuci.

⁹ Uko nsala teshi ikamukoleewo tubili nabi kubula cimwi cintu. Mabwe ancico alicite nshimbi alimwi inga kamukaba mukuba kuswa mutulundu tuliimo.

¹⁰ Mulaakuba ashintu shoonse nshemusuni kulya alimwi mulaakulumba Mwaami Lesa ceebo cakumupa cishi cicite bulongo bubotu ico.

Kucenjesha pakuluba Mwaami Lesa

¹¹ “Amushinishe kwaamba ayi teshi mukalube Mwaami Lesa, Lesa wanu. Kutaalilwa kukonkela milawo amilasho yakwe iyo njeentoomupa sunu.

¹² Mwaakuba ashintu shoonse nshemusuni kulya, mwaakuyaka maanda abotu akwikalaamo,

¹³ na ŋombe shanu, mbelele, silifa, golodi alimwi abuboni bumwi boonse bukafuule,

¹⁴ amushinishe kwaamba ayi teshi mukatalike kulisumpula akuluba Mwaami Lesa, Lesa wanu, wakamufuna kuswa muIjipiti umo momwakalinga basha.

¹⁵ Wakamutanjilila muluyanga lunene alimwi luyoosha lulya, muli nsoka shicite buyoka bucaya alimwi antalaŋongo. Mulya taamu maanshi, sombi wakalengesha maanshi kukunka kuswa mulibwe ceebo ca ndimwe.

¹⁶ Muluyanga wakamupa mana kwaamba ayi mulye, cakulya citana kulyaawo bamashali banu bakulukulu. Wakatuma makatasho pali ndimwe ayi amweeleshe, kwaamba ayi kumeelelesho akamuboteshele shintu shoonse.

¹⁷ Ono aboobo tamweelete kuyeeya ayi mwaba abuboni buunji kwiinda munkusu shanu nobeene.

¹⁸ Amwiibaluke kwaamba ayi nguMwaami Lesa, Lesa wanu uyo umupa nkusu shakuba abuboni ubo. Ulacita boobo ceebo kushikila asunu ucishomeka kweelana acipangano ncaakashomesha cakulumbila kubamashali banu bakulukulu.

¹⁹ Kuteelesha kuluba Mwaami Lesa, Lesa wanu nabi kulambila balesa bamwi akubasebensela. Na mukacite boobo ndamulwiitila limwi sunu ayi mulaakunyonyoolwa.

²⁰ Na mukabule kunyumfwila Mwaami Lesa mulaakunyonyoolwa bweenka mbweshi akanyonyoole bantu mushishi mweshi mukeende pakunooya.