Dutolonomi 28 - Baibo Busansulushi Bwa Libuku Ili

Shoolwe shili mukunyumfwila

¹ “Na munoonyumfwila Mwaami Lesa, Lesa wanu alimwi akunookonkela kabotu milawo yakwe yoonse iyo njentoomupa sunu, ulaakumusumpula kwiinda mishobo yoonse ya mucishi ca panshi.

² Munoonyumfwila Mwaami Lesa, Lesa wanu kwaamba ayi mukabe ashoolwe shoonse ishi.

³ “Mwaami Lesa ulaakupa coolwe mandabalaanu alimwi amyuunda yanu.

⁴ “Mwaami Lesa ulaakumupa coolwe cakuba abaana baanji, shakulya shiinji alimwi aŋombe ambelele shiinji.

⁵ “Mwaami Lesa ulaakufusha shakulya shili anga ngamaila alimwi asheesho nsheshi mukanooteleka kuswa kuli nshisho.

⁶ “Mwaami Lesa ulaakumupa coolwe mushintu shoonse nsheshi mukanoocita.

⁷ “Mwaami Lesa ulaakulengesha ayi balwani banu mukanoobakoma. Pakwisa mukumulwana balaakuswa lubasu lomwi, sombi pakumucica balaakumwaikabo.

⁸ “Mwaami Lesa, Lesa wanu ulaakumupa coolwe mushintu shoonse nsheshi mukanoocita akususha matala anu a shakulya shili anga ngamaila. Ulaakumupa coolwe mucishi ico ncaatoomupa.

⁹ “Na munoonyumfwila Mwaami Lesa, Lesa wanu akunoocita shoonse nshaamulwiita, ulaakulengesha ayi mukabe bantu bakwe basalalite, kweelana ambwaakashomesha.

¹⁰ Lyalo bantu boonse ba mucishi ca panshi balaakubona ayi Mwaami Lesa wakamusala ayi mube bantu bakwe cancinencine, paceebo ceeci balaakumuloonda.

¹¹ Mwaami Lesa ulaakumupa baana baanji, shifubwa shiinji alimwi ashakulya shiinji mucishi ico ncaakashomesha bamashali banu bakulukulu ayi ulaakumupa.

¹² Mwaami Lesa ulaakunoomuloshesha mfula kuswa moomo mwaisunga mwiculu paciindi ceelete, akumupa coolwe mumilimo yoonse. Mpeeke mulaakukweletesha mishobo iinji, sombi mwebo taaku nkweshi mukakweleteewo.

¹³ Mwaami Lesa, Lesa wanu ulaakulengesha ayi mukabe batanjilili pakati kamishobo imwi, kuteshi beshikukonkela. Na munookonkela milawo ya Mwaami Lesa yoonse njentoomupa sunu, mulaakunoolibo peculu alimwi taaku nceshi mukaalilwe.

¹⁴ Mutakeeleshi kufutatila milawo iyi njeentoomupa sunu mukulambila akusebensela balesa bamwi.

Mashingo ali mukutanyumfwila

¹⁵ “Sombi na mukabule kunyumfwila Mwaami Lesa, Lesa wanu alimwi akutakonkela kabotu milawo amilasho yakwe yoonse iyo njentoomupa sunu, mashingo aya oonse alaakwisa pali ndimwe.

¹⁶ “Mwaami Lesa ulaakushingana mandabalaanu alimwi amyuunda yanu.

¹⁷ “Mwaami Lesa ulaakushingana shakulya shili anga ngamaila alimwi asheesho nsheshi mukanooteleka kuswa kuli nshisho.

¹⁸ “Mwaami Lesa ulaakumushingana kwiinda mukumupa baana baniini, kutebula shakulya shiniini alimwi amukumupa ŋombe ambelele shiniini.

¹⁹ “Mwaami Lesa ulaakumushingana mushintu shoonse nsheshi mukanoocita.

²⁰ “Na munoocita shibiibi mukukaka Mwaami Lesa, kulaakumuletelela shiyoosha, shimfulunganya, alimwi amapensho mushintu shoonse nsheshi mukanoocita, kushikila mukafwambaane kunyonyooka cakumaninina.

²¹ Ulaakukonkanya kumutumina malwashi kushikila kukabule muntu nabi womwi eshi akacaale mucishi ico ncemuli pafwaafwi kubwesa akwikalaamo.

²² Mwaami Lesa ulaakumuletela malwashi ayambukila, shuute acimpwita. Ulaakutuma cilanga alimwi amuuwo ulungula ayi shinyonyoole shishango shanu. Anu myaalu iyi teshi ikamulekeewo kushikila mukamane kufwa.

²³ Teshi kukaloke mfula, mpeeke panshi palaakuboolabo nta, anga nceela.

²⁴ Mumusena wa mfula, Mwaami Lesa ulaakutuma cipuupu ca lusuko alimwi amuseese kushikila mukanyonyooke.

²⁵ “Mwaami Lesa ulaakulengesha ayi balwani banu bakamukoome. Pakuya mukulwana ambabo mulaakupolela lubasu lomwi, sombi pakubacica mulaakumwaikabo. Lyalo bantu boonse mucishi ca panshi balaakuloonda abuumbi pakubona sheshi shikamucitikile.

²⁶ Mituntu yanu ilaakuba cakulya ca bayuni boonse bauluka alimwi abanyama bamuluundu, mpeeke kulaakubula amuntu shikubakonga.

²⁷ Mwaami Lesa ulaakumuletela shuute, bweenka mbwaakacitila bene Ijipiti. Mibili yanu ilaakuba ashiloondaloonda, abunkulutu alimwi ashipele, sombi teshi shikanooshilikika.

²⁸ Mwaami Lesa ulaakuletela ncinko, boofu alimwi abukanguwenguwe.

²⁹ Mwebo mulaakunooshibashiba anga ngumoofu lumwilubala. Mulaakunookwaalilwa kwishiba nkomutooya alimwi teshi mukaswitilile mushintu shoonse nsheshi mukanoocita. Lyoonse mulaakunoonyengelelwa alimwi akwiipilwa, sombi taaku eshi akamufuune.

³⁰ “Mulaakumamikila mwanakashi, sombi umwi ulaakumweeba. Mulaakuyaka ŋanda, sombi teshi mukekaleemo. Mulaakulima muunda wa minyansa, sombi teshi mukaikankeewo amukanwa.

³¹ Ŋombe shanu shilaakucaikwa kamubweneeko, sombi taaku nyama njeshi mukalyeewo. Mulaakunyaikwa mbongolo alimwi teshi shikabooshekwe. Mbelele shanu shilaakupekwa kubalwani banu, sombi taaku nabi womwi eshi akashifuune.

³² Mbweekoobo bana banu basankwa abanakashi balaakupekwa busha kumushobo umwi. Mulaakusalala meenso kulangila bana banu bushiku abushiku, ono taaku nabi comwi nceshi mukacite.

³³ Bantu mbomuteshi mbweshi bakalye shakulya shanu shili anga ngamaila isho nsheshi mukapengele, sombi mulaakunoonyengelelwabo akupenshekwa abuumbi lyoonsebo.

³⁴ Nshintu nsheshi mukabone shilaakumucinkusha.

³⁵ Mwaami Lesa ulaakulengesha ayi myeendo yanu ikakumanebo shuute sheshi shikanoocisa abuumbi alimwi shitashilikiki. Shilaakutumba mubili woonse, kuswa kushimpanta kushikila akumutwi.

³⁶ “Mpomunyaawo Mwaami Lesa ulaakutola ndimwe alimwi amwaami wanu kucishi cimwi, ico mwebo nabi bamashali banu bakulukulu ncebatana kubonaawo. Nkomunya uko mulaakunoolambila balesa bapangwa kushisamu alimwi akumabwe.

³⁷ Mumishobo yoonse umo Mwaami Lesa mweshi akamupalanganishishe, bantu balaakukankamana pakubona sheshi shikamucitikile. Balaakunoomuseka akumuweluluka.

³⁸ “Mulaakushanga mbuto shiinji, sombi mulaakutebulabo shakulya shiniini, mukwiinga nsoshi shilaakunyonyoola shishango shanu.

³⁹ Mulaakulima myuunda ya minyansa alimwi akwiisakwita kabotu, sombi teshi mukayapemo minyansa nabi kunwa waini ceebo bashiluŋongwa balaakwiilya.

⁴⁰ Mucishi canu coonse mulaakunooswitebo shisamu sha maolifi, sombi teshi mukabe amafuta a olifi mukwiinga maolifi alaakumana kulokaako.

⁴¹ Mulaakushala baana basankwa abanakashi sombi teshi mukekalaabo, ceebo balaakucatwa kunkondo akutolwa mubusha.

⁴² Shisamu shanu alimwi ashishango shanu shoonse shilaakulikwa nsoshi.

⁴³ “Baswamashi mbomwikalaabo balaakuba abulemu buunji kwiinda ndimwe, sombi mwebo mulaakunooya ciboolabo panshi.

⁴⁴ Balaakunoomukongosha, sombi mwebo teshi mukabakongosheewo. Kuya kunembo balaakunoomweendelesha.

⁴⁵ “Mapensho oonse aya alaakwisa pali ndimwe. Teshi akamaneewo kushikila mukanyonyooke cakumaninina, mukwiinga tamukwe kunyumfwila Mwaami Lesa, Lesa wanu akukonkela milawo amilasho yoonse njaakamupa.

⁴⁶ Mapensho aya alaakuba mbobukamboni bwa boomboloshi bwakwe Lesa pali ndimwe alimwi abamulunyungu lwanu kwamuyayaya.

⁴⁷ Ceebo cakutasebensela Mwaami Lesa cakukondwa akusangalala uyo weshi akamupe coolwe mushintu shoonse,

⁴⁸ mulaakusebensela balwani abo Mwaami Lesa mbweshi akatume ayi bamulwaane. Mulaakubula cakulya, maanshi alimwi ashakufwala, taaku cintu nabi comwi nceshi mukabaaco. Mwaami Lesa ulaakumupensha abuumbi kushikila akamunyonyoole.

⁴⁹ Mwaami Lesa ulaakumuletela mushobo umwi kuswa kweela cishi uyo weshi ukese mukumulwana, acishobo cabo teshi mukanoocinyumfwaawo. Balaakwiindililabo kumufukukila anga ngumumbankwashi.

⁵⁰ Balaakunooli bakali alimwi batacite nkumbu kubacembele nabi banike boonse.

⁵¹ Balaakulya baana ba shifubwa shanu, shishango sha mucishi canu kushikila mukanyonyooke. Taaku shakulya shili anga ngamaila nsheshi bakamushiile, waini, mafuta a olifi, boombe nabi bana ba mbelele, kushikila noonse mukaloobe.

⁵² Mpeeke balaakulwana abantu ba mumandabala oonse ali mucishi ico Mwaami Lesa, Lesa wanu ncaatoomupa. Anu malinga alaamfu ayumu ayo ngomushoma oonse alaakumana kuwa.

⁵³ “Ono ceebo ca mapensho balwani banu ngweshi bakalete paciindi cakulwana mumandabalaanu, mulaakutalika kulya bana banu, mibili ya baana basankwa abanakashi abo Mwaami Lesa, Lesa wanu mbwaakamupa.

⁵⁴ Paciindi ico amusankwa woonse uteekenye alimwi ucite nkumbu pakati kanu, teshi akabe ankuumbu pamukwabo ngwaakashalwaakwe lifumo lyomwi, mukaakwe usunikwi nabi bana bakwe abo beshi bakacaleewo.

⁵⁵ Aboobo taaku nabi womwi ngweshi akapewo nyama ya bana bakwe iyo njeshi akanoolya. Cilaakuba ncecakulya nceshi akanoocitebo ceebo ca mapensho ayo eshi akalete balwani banu muciindi ico nceshi bakashinguluke mandabalaanu oonse.

⁵⁶ Alakwe mwanakashi woonse uteekenye alimwi ucite nkumbu, mubile uyo utana kulyatawo kale panshi mububile bwakwe, ulaakucita mbomunya mbuli musankwa.

⁵⁷ Cabushishi ulaakulya mwanaakwe kateta alimwi asheenda abaana. Paciindi ico mwaakushingulukwa kubalwani, ulaakwiima ibaye usunikwi, nabi womwi pabana bakwe boonse.

⁵⁸ “Na mubule kukonkela kabotu maswi a Milawo alembetwe mulibuku ili akutalemeka liina licite bulemu alimwi liyoosha lya Mwaami Lesa, Lesa wanu,

⁵⁹ ulaakutumina ndimwe abamulunyungu lwanu myaalu iyoosha, mapensho atamaani alimwi amalwashi atashilikiki.

⁶⁰ Malwashi ayoosha oonse alya ngomunya ngomwakabonaawo mucishi ca Ijipiti, ulaakwaaleta pali ndimwe alimwi teshi akamulekeewo.

⁶¹ Teshi malwashi ayo eenka, sombi Mwaami Lesa ulaakuleta amalwashi amapensho amwi ashiyeneshiyene atalembetwe mulibuku lya Milawo ili, kushikila mukanyonyooke.

⁶² Nacibi kwaamba ayi mwakalinga baanji anga ninyenyeenshi, mulaakucaalabo nongaye ceebo tamukwe kunyumfwila Mwaami Lesa, Lesa wanu.

⁶³ Bweenka mbocakasangalasha Mwaami Lesa ayi amusumpule akumufusha mbweeke ubo mbweshi cikamusangalashe ayi amunyonyoole akumulobya. Mulaakumana katyenke mucishi ico ncemutooya mukwikalaamo.

⁶⁴ “Lyalo Mwaami Lesa ulaakumupalanganishisha pakati ka mishobo imwi yoonse, kuswa kweela cishi ankoceela. Nkomunya uko mulaakutalika kulambila balesa bakubesa kushisamu akumabwe, abo mwebo abashali banu bakulukulu mbomutana kulambilaawo.

⁶⁵ Pakati ka mishobo iyo, teshi mukacanewo luumuno nabi musena unenu cancinencine. Mpeeke Mwaami Lesa ulaakumulengesha kulisukama, kubula lushomo alimwi akutyongola.

⁶⁶ Buumi bwanu lyoonse bulaakunoolibo mulupaka. Malumwi amashiku mulaakunooloonda akulisukama cakuteshiba na buumi bwanu bulaakunoociya.

⁶⁷ Mukwiinga wa sheesho nsheshi mukanoobona, myoyo yanu ilaakunooswa. Na bwaca, mwebo mulaakunooyeeya ayi nikwashiya, alimwi na kwashiya ayi nikwaca bwaangu.

⁶⁸ Mpomunyaawo Mwaami Lesa ulaakumuboosha mucishi ca Ijipiti mumaato anene, nacibi kwaamba ayi wakamuposhesha ayi mutakabooliiko. Mwaakushika mulaakunoolisambasha kubalwani banu ayi bamufuube, sombi taaku nabi womwi eshi akamuuleewo.”