Dutolonomi 2 - Baibo Busansulushi Bwa Libuku Ili

Bene Isilaeli mbobakekala muluyanga

¹ “Lyalo twakapiluluka akuya muluyanga munshila iya kuLweenge Lusalala bweenka Mwaami Lesa mbwaakaŋambila. Twakamana ciindi cilaamfu katwiingookabo mucishi ca tulundu ca Edomu.

² “Lyalo Mwaami Lesa wakandwiita ayi,

³ ‘Cakwana ciindi ncimwakalinga kweelete kusebensesha kwiingooka mutulundu utu. Bulya mulyeelete kulanga kumatwa.’

⁴ Mpeeke wakandwiita ayi mupe milasho iyi yakwaamba ayi, ‘Muli pafwaafwi kwiinda mucishi ca bamakwabanu, bamulunyungu lwakwe Esau abo bali muEdomu. Batoomuloonda, sombi mucenjele.

⁵ Tamweelete kubasumuna lwa nkondo, ceebo taaku musena nauceyi ngweshi mupe mucishi cabo. Cishi ca Edomu ndakacipa bamulunyungu lwakwe Esau.

⁶ Shakulya amaanshi, nkuula kuli mbabo.’

⁷ “Amwiibaluke Mwaami Lesa mbwaamupa coolwe mushintu shoonse nshemwakacita. Wakamulama ndimwakalinga kwiingooka muluyanga ulu lutabwenekete ankolweela. Wakalingaanu myaaka yoonse makumi one alimwi shoonse shakalinga kuyandika, mwakabaasho.

⁸ “Aboobo twakatolelela kweenda akupambuka nshila iswa kundabala ya Elati aEsiongeba kuya kuLweenge lwa Mwiinyo. Lyalo twakalanga kwicwe lya kumatwa akutola nshila ya muluyanga iya kuMoabu.

⁹ Mwaami Lesa wakaŋambila ayi, ‘Mutakapenshi bene Moabu, bamulunyungu lwakwe Loti, nabi kubasumuna lwa nkondo. Ndakabapa ndabala inene ya Ali, alimwi teshi nkamupeewo musena nauceyi mucishi cabo.’ ”

¹⁰ Kalekale, mundabala inene ya Ali mwakalinga lusubo lwa bantu bapolomene bakalinga kwiitwa ayi Emimu. Bakalinga balaamfu anga mbaAnakimu, lusubo lumwi lwa bantu bapolomene.

¹¹ Bakalinga kwiitwa alimwi ayi Lefaimu bweenka mbobakalinga kwiita baAnakimu, sombi bene Moabu bakalinga kubeeta ayi Emimu.

¹² Kalekale muEdomu mwakalinga kwikala Bene Oli, sombi bamulunyungu lwakwe Esau bakabatandaanyaamo. Bakanyonyoola cishi cabo akwikalaamo balo beene, bweenka abalo bene Isilaeli mbobakatanda balwani babo mucishi Mwaami Lesa ncaakabapa.

¹³ “Mwaami Lesa wakatwaambila ayi, ‘Amunyamuke musubuke Mulonga wa Seledi.’ Mpomunyaawo twakasubuka.

¹⁴ Apo kwakalinga kwiindite myaaka makumi otatwe, amyaaka yosanwe ayotatwe nditwakaswa kuKadeshi Baniya nditwakasubuka Mulonga wa Seledi. Basankwa boonse bakalinga kucikonsha kulwana baciindi ico bakamana kufwa bweenka Mwaami Lesa mbwaakaamba.

¹⁵ Mwaami Lesa wakatolelela kubalwana kushikila wabanyonyoola boonse.

¹⁶ “Ndibakamana kufwa boonse,

¹⁷ Mwaami Lesa wakaŋambila ayi,

¹⁸ ‘Sunu mutokwiinda mucishi ca Moabu kwiinda mundabala ya Ali.

¹⁹ Lyalo mutooba pafwaafwi acishi ca bene Amoli. Mutabapenshi nabi kubasumuna lwa nkondo, ceebo teshi nkamupeewo musena nauceyi mucishi cabo. Cishi ico ndakacipa bamulunyungu lwakwe Loti.’ ”

²⁰ Cishi ici kalekale cakalinga kushibikitwe ayi ncishi ca baLefaimu, liina lya bantu bakalinga kwikalaamo umo. Bene Amoni bakalinga kwiita bantu aba ayi baSamusumimu.

²¹ Abalo bakalinga balaamfu anga mbaAnakimu. Bakalinga baanji alimwi bakalinga lusubo lwa nkusu. Sombi Mwaami Lesa wakabanyonyoola kunembo lya bene Amoni abo bakabatanda mucishi cabo akwikalaamo mbabo.

²² Mwaami Lesa wakacita cintu comwi akubene Edomu, bamulunyungu lwakwe Esau uyo wakalinga kwikala mucishi ca tulundu ca Edomu. Wakanyonyoola bene Oli kunembo lya bene Edomu abo bakabatanda mucishi cabo akwikalaamo mbabo, umo mobacikala abobulya.

²³ Cishi ca muya loombe lwa Mediteleniyani cakalinga cekalwa abene Kileti. Bakanyonyoola bene Afimu, akwikalaamo mbabo mucishi cabo kuya kumalenge kushika akundabala inene ya Gasa.

²⁴ “Nditwakeenda muMoabu, Mwaami Lesa wakaamba ayi, ‘Ono amutalikeeko kusubuka Mulonga wa Anoni. Ntokwaaba Sioni mwine Amoli mwaami wa Eshiboni pantu pomwi acishi cakwe mumaansaanu. Amutalike kumulwana, mubwese cishi cakwe.

²⁵ Kuswa sunu ntoolengesha mishobo yoonse pacishi ca panshi kutalika kumuloonda. Bantu boonse bananootutuma kuboowa pakubandabo liina lyanu.’

Bene Isilaeli mbobakakoma mwaami Sioni

²⁶ “Mpeeke ndakatuma beshinkombe kuswa kuluyanga lwa Kedemoti kumwaami Sioni wa Eshiboni mukwaamba maswi a luumuno ayi,

²⁷ ‘Amutusuminishe twiindeeko mucishi canu. Tunanoolibo mumukwakwa unene kushikila tuswe mucishi canu.

²⁸ Shakulya nsheshi tulye amaanshi ngweshi tunwe tutoolipila. Ncetusunibo nkwiinda mucishi canu,

²⁹ kushikila tusubuke Mulonga wa Joodani kuya mucishi ico Mwaami Lesa, Lesa wesu ncaatootupa. Bamulunyungu lwakwe Esau abo bekala muEdomu, abene Moabu bekala muAli balo bakatusuminisha kwiinda mushishi shabo.’

³⁰ “Sombi mwaami Sioni wakatukasha kwiinda mucishi cakwe. Mwaami Lesa, Lesa wanu wakalinga wamulengesha bushicimpamya abwaashu, kwaamba ayi tumukoome akubwesa cishi cakwe ico ncetucikalaamo abobulya.

³¹ “Lyalo Mwaami Lesa wakandwiita ayi, ‘Amubone ndalengesha mwaami Sioni acishi cakwe kubula nkusu kunembo lyanu. Amubwese cishi cakwe mwikaleemo.’

³² Mpeeke mwaami Sioni wakesa abashilumamba bakwe boonse kwaamba ayi atulwaane kufwaafwi andabala ya Jaasi.

³³ Sombi Mwaami Lesa, Lesa wesu wakamwaaba mumaansa esu, aboobo twakamucaya pantu pomwi abana bakwe alimwi abashilumamba bakwe boonse.

³⁴ Mpomunyaawo twakashinguluka mandabala oonse akwaanyonyoola. Twakacaya bantu boonse, nkokwaamba ayi basankwa, banakashi alimwi abanike, taaku ngotwakashiya kaali muumi.

³⁵ Twakabwesa shifubwa shoonse abuboni bwa mumandabala oonse ayo ngotwakasaala.

³⁶ Mwaami Lesa, Lesa wesu wakatusuminisha kushinguluka mandabala oonse kuswa kuAlowa, kweela lya cinyika ca Anoni, andabala inene yakalinga pakati ka cinyika kuya mukushika akuGilyadi. Taaku ndabala yakalinga kucite lubumbu luyumu cakutwaalila kupwaya.

³⁷ Nacibi boobo tatukwe kuya pafwaafwi acishi ca bene Amoni nabi kuloombe lwa Mulonga wa Jaboku, kumandabala a cishi ca tulundu nabi musena umwi uko Mwaami Lesa, Lesa wesu nkwaatakwe kutwaambila ayi tuye.