Dutolonomi 18 - Baibo Busansulushi Bwa Libuku Ili

Cipansha ca bapailishi

¹ “Mukowa wa bupailishi wa bene Lefi tooelete kupekwa cipansha nabi comwi mucishi ca Isilaeli. Balo balaakunoolyabo milambu ibengwa kuMwaami Lesa alimwi ashipo.

² Teshi bakapekweewo cipansha ca cishi mbuli mikowa imwi yoonse. Balo ncebakapekwa ncoolwe cakuba bapailishi ba Mwaami Lesa, Lesa wanu kweelana ambwaakashomesha.

³ “Lyoonse na ŋombe nabi mbelele yabengwa ayi ngumulambu, bapailishi balyeelete kupekwa mweendo wa kwaapa, macili alimwi ashamukati.

⁴ Mulyeelete kunoobapa shili anga ngamaila shanu shitaanshi kutebulwa, waini utaanshi, mafuta a olifi ataanshi abooya bwa mbelele butaanshi kuceswa

⁵ ceebo Mwaami Lesa wakasala mbabo abamulunyungu lwabo pakati ka mishobo yanu yoonse ayi mbweshi banoosebensela nguwe mulimo wa bupailishi lyoonse alyoonse.

⁶ “Paceebo ceeci mwine Lefi uli woonse usuni inga walonga kuswa mundabala ili yoonse mucishi ca Isilaeli kuya kumusena womwi wakulambililaako,

⁷ akutalika kusebensela Mwaami Lesa, Lesa wakwe mulimo wa bupailishi, bweenka mbuli bene lefi bamwi basebensela kooko.

⁸ Ulyeelete kunoopekwa shakulya sheelene asheesho shitootambula bapailishi bamwi, nacibi kwaamba ayi wakatambula maali akoolishikwa shintu sha bamuŋanda yakwe.

Mbobakacenjeshekwa pamicito ya mishobo imwi

⁹ “Ono na mukashike mucishi ico Mwaami Lesa, Lesa wanu ncaatoomupa, mutakeeleshi kukonkela micito ibiibi ya mishobo ya kooko.

¹⁰ Kutabi muntu uli woonse pakati kanu ubenga mwanaakwe musankwa nabi mwanakashi ayi ngumulambu wakutenta. Kutakabi muntu pakati kanu uba muŋanga, shikusonda, mukamwaami,

¹¹ muloshi, nabi uyo waamba amishimu munshila ili yoonse.

¹² Mwaami Lesa, Lesa wanu ulipatite muntu woonse ucita shintu ishi shilensha bunya. Nceceeco ncaatootandila mishobo iyo mucishi kunembo lyanu.

¹³ Mwebo mulyeelete kuba bantu batacite kampenda pameenso a Mwaami Lesa, Lesa wanu.”

Mbobakashomeshekwa kutuminwa mulaluki

¹⁴ Kuswawaawo Mose wakaamba ayi, “Bantu abo mbomutooya mukunyaya cishi balakonkela shaamba bamukamwaami abaŋanga. Sombi mwebo, Mwaami Lesa, Lesa wanu wamukasha kucita boobo.

¹⁵ Mwaami Lesa, Lesa wanu ulaakumutumina mulaluki wa mbuli ndime kuswa mulikoto lyanu. Aboobo mulyeelete kunoomunyumfwila.

¹⁶ “Pabushiku bulya ndimwakalinga kubungene kuKalundu ka Sinayi, mwakasenga kutanyumfwa lyobilo liswi lya Mwaami Lesa nabi kubona mulilo wakwe unene bobulya, ceebo cakuloonda ayi inga mwafwa.

¹⁷ Paceebo ceeci Mwaami Lesa wakaŋambila ayi, ‘Kusenga kwabo kuliluleme.

¹⁸ Ndaakubatumina mulaluki uli mbuli ndiwe kuswa mulikoto lyabo. Ndaakunoomulwiita shakwaamba, mpeeke ulaakunoobalwiita shoonse nsheshi nkanoomulwiita.

¹⁹ Uyo woonse eshi akabule kukonkela maswi eshi akanokwaamba mulaluki uyo muliina lyangu, ndaakumupa mulandu.

²⁰ Sombi mulaluki woonse uyo waamba muliina lyangu makani ngoontakwe kumulwiita, nabi wooyo waamba muliina lya balesa bamwi, ulyeelete kucaikwa.’

²¹ “Mpashi inga mwashinshanishikwa mbuli mbweenga mwashiiba na makani atokwaamba mulaluki aswa kuMwaami Lesa.

²² Na ico caamba mulaluki muliina lya Mwaami Lesa cabula kucitika nabi kuboneka, mwishibe ayi makani ayo taakwe kuswa kuMwaami Lesa. Nkokwaamba ayi mulaluki uyo waamba munkusu shakwe mwiine, aboobo tamweelete kumuloonda.