Ciyubululo 9 - Baibo Busansulushi Bwa Libuku Ili

¹ Mpeeke munjelo wasanu wakalisha lupeenga lwakwe. Lyalo ndakabona nyenyeenshi yakalokela pacishi ca panshi, yakapekwa cakucalwisha mucilindi citeeli.

² Nyenyeenshi yakacalula cilindi citeeli ici, mpeeke mwakaswa bwiishi ubo bwakalingabo anga butooswa mumunyumbi unene. Mumuni wa lisuba alimwi amuuwo shakaboolabo mbi ceebo ca bwiishi bwakalinga kuswa mucilindi citeeli.

³ Ono mubwiishi momunya umo, mwakaswa nsoshi shakesa mucishi ca panshi akupekwa nkusu shili mbuli sheesho shicite ntalaŋongo.

⁴ Nsoshi ishi shakalwiitwa ayi shitanyonyooli bwiisu, shisamu nabi cishango cili coonse, sombi kunyonyoolabo bantu abo batakalinga kucite keshibilo kakwe Lesa pankumo.

⁵ Tashikwe kusuminishikwa kubacaya, sombibo kubapensha abuumbi kwamyeenshi ili yosanwe. Kucisa kwakalinga kuswa mukupenshekwa uku kwakalingabo anga nkucisa kwa muntu walumwa ntalaŋongo.

⁶ Ono mumyeenshi yosanwe iyi, bantu balaakunooyandoola lufu, sombi teshi bakalucaneewo. Balaakusuna kufwa, sombi lufu lulaakubacica.

⁷ Nsoshi ishi shakalinga kubonekabo anga ngamaaki atoolindilabo kuya kunkondo. Pamitwi ya nshisho, pakalinga shimwi shakalinga kuboneka anga njimishini ya golodi alimwi shiwa sha nshisho shakalinga kubonekabo anga nsha bantu.

⁸ Misusu ya nshisho yakalinga ilaamfu anga nja banakashi, aalo meeno akalinga anga nga nkalamu.

⁹ Ashalo shaamba sha nshisho shakalinga kufweketwe shimwi shakalinga kuboneka anga nshakulitabilishako pacaamba sha ceela. Coongo ca mapepe a nshisho cakalinga anga ncoongo ca shikoci shiinji shakalinga kukwelwa amaaki atoocicila kunkondo.

¹⁰ Nsoshi ishi shakalinga kucite micila ashakulumishako shili anga nsha ntalaŋongo alimwi mumicila mweenka momwakalinga nkusu shakucisa bantu myeenshi yosanwe.

¹¹ Shakalinga kucite amwaami shikusheendelesha, uli ngomunjelo shikubona pacilindi cilya citeeli. Liina lyakwe muciEbulu nguAbadoni, muciGiliki nguApolyoni, (nkokwaamba ayi, “Shikunyonyoola”).

¹² Lipensho lyakutaanguna lyamana, sombi kwacaala amwi obilo.

¹³ Mpomunyaawo munjelo wasanu awomwi wakalisha lupeenga lwakwe. Lyalo ndakanyumfwa liswi kuswa mumbasu shone sha cipaililo ca golodi ico cakalinga kunembo lyakwe Lesa.

¹⁴ Liswi ilyo lyakalinga lyakwaambila munjelo wasanu awomwi ayi, “Angulula baanjelo bone balya baangitwe kuMulonga unene wa Yufuletisi.”

¹⁵ Mpeeke baanjelo abo bone bakaangululwa. Balo bakalinga kubambitwe kucaya cipansha catatu ca bantu boonse paciindi ceenka ici ca bushiku bweenka ubu bwa mweenshi weenka uyu wa mwaaka weenka uyo.

¹⁶ Lyalo ndakalwiitwa ayi bashilumamba beshikulwanina pamaaki bakalinga shuulu ashuulu.

¹⁷ Anga muciloto, ndakabona maaki alimwi abaabo bakalinga kutantiteewo. Bakalinga kufwete shakutabilisha pacaamba shisalala anga ngumulilo alimwi anga ndibwe liboneka mbuli liculu alimwi anga ngusalufa. Mitwi ya maaki aya, yakalinga kuboneka anga nja nkalamu alimwi mumilomo ya ngawo mwakalinga kuswa mulilo, bwiishi alimwi asalufa.

¹⁸ Cipansha catatu ca bantu boonse mucishi ca panshi cakacaikwa kwiinda mumyaalu yotatwe iyi, mulilo, bwiishi alimwi asalufa wakalinga kuswa mumilomo ya maaki.

¹⁹ Nkusu sha maaki aya, shakalinga mumilomo ya ngawo alimwi amumicila. Micila ili anga ninsoka icite amitwi iyo isebenseshekwa kucisa bantu.

²⁰ Ono bantu boonse abo bakacaala, abo batakwe kucaikwa amyaalu yotatwe iyi, tabakwe kusanduka kuswa kushintu isho nshebakalipangila beene. Tabakwe kucileka kulambila bashikaswa, shibumbwabumbwa sha golodi, sha silifa, sha bulonse, sha mabwe alimwi asha shisamu. Shintu ishi tashiboni, kunyumfwa nabi kweenda.

²¹ Peculu lya waawo tabakwe kusanduka kuswa kubucayi, buloshi, bufuule nabi bwiipi.