Ciyubululo 8 - Baibo Busansulushi Bwa Libuku Ili

Kalamatila wa keshibilo wasanu awobilo

¹ Ono Mwanaambelele ndyaakalamatula kalamatila wa keshibilo wasanu awobilo, kwiculu kwakoomuna mpashi kwamusa wa awala yomwi.

² Lyalo ndakabona baanjelo bosanwe abobilo beemikana kunembo lyakwe Lesa, kabapekwa mapeenga ali osanwe aobilo.

³ Mpomunyaawo munjelo aumwi wakesa weemikana pafwaafwi acipaililo, kaacite acakubikamo tununkila kabotu ca golodi. Wakapekwa atumwi tununkila kabotu tuunji kwaamba ayi pantu pomwi amipailo ya bashomi boonse, ape kuli Lesa pacipaililo ca golodi cakalinga kunembo lya cuuna ca bwaami.

⁴ Ono bwiishi bwa tununkila kabotu uto twakatentwa, bwakalinga kusunta kabuya kwiculu pantu pomwi amipailo ya bashomi, kabuswa mulyaansa lya munjelo wakalinga kwiimfwi kunembo lyakwe Lesa.

⁵ Lyalo munjelo wakabwesa cakubikamo tununkila kabotu cilya akubwesa makalangasha pacipaililo, wacisusha akuciwaala mucishi ca panshi. Mpomunyaawo kwakaba ciyobeyobe alimwi acilulumo, kubeka kwa mfula alimwi acitentanshi.

Mapeenga

⁶ Mpeeke baanjelo bali bosanwe abobilo abo bakalinga kucite mapeenga ali osanwe aobilo bakalibambila ayi baaliishe.

⁷ Munjelo wakutaanguna ndyaakalisha lupeenga lwakwe, kwakaba mfula ya mabwe amulilo usenkene abulowa. Shoonse ishi shakalokela pacishi ca panshi. Mpeeke cipansha catatu ca cishi cakapya, cipansha catatu ca shisamu shoonse mucishi acalo cakapya kubikaawo abwiisu boonse butontola.

⁸ Pesule munjelo wabili wakalisha lupeenga lwakwe. Mpomunyaawo cintu cimwi cakalinga kuboneka anga nkalundu kanene katoonyaka mulilo, cakawaalwa mulweenge. Mpeeke cipansha catatu ca lweenge cakasanduka bulowa,

⁹ cipansha catatu ca shilengwa shoonse shiyoya sha mulweenge shakafwa alimwi acipansha catatu ca maato anene cakanyonyooka.

¹⁰ Munjelo watatu alakwe wakalisha lupeenga lwakwe. Lyalo nyenyeenshi inene yakalinga kubeka anga ncimunimweenge, yakaswa kwiculu akulokela pacipansha catatu ca milonga alimwi atuntupu twa maanshi.

¹¹ Nyenyeenshi iyi ileetwa ayi, “Kalulishi.” Cipansha catatu ca maanshi cakatalika kulula, aboobo bantu baanji bakafwa ndibakanwa maanshi ayo ceebo akalinga kulula.

¹² Lyalo munjelo wane alakwe wakalisha lupeenga lwakwe. Mpeeke cipansha catatu ca shipansha sha lisuba, mweenshi alimwi anyenyeenshi shakanyonyooka cakwaamba ayi shipansha shatatu sha mumuni wa nshisho shakacileka kumunika. Nkokwaamba ayi tekwakalinga mumuni mucipansha catatu ca malumwi amucipansha catatu ca mashiku.

¹³ Mpomunyaawo ndakalangilisha akunyumfwa mumbankwashi wakalinga kuuluka mwiculu, kaaolobesha ayi, “Mapensho! Mapensho! Mapensho kubantu ba mucishi ca panshi ceebo ca sheesho sheshi shikacitike na baanjelo botatwe aba bacaala bakalishe mapeenga abo!”