Ciyubululo 7 - Baibo Busansulushi Bwa Libuku Ili

Bene Isilaeli bali 144,000

¹ Kuswawaawo ndakabona baanjelo bone kabeemfwi mumbasu shone sha cishi ca panshi. Bakalinga kukasha myuuwo yone kwaamba ayi itapuupili mucishi ca panshi, mulweenge nabi kucisamu cili coonse.

² Lyalo ndakabona munjelo aumwi kaaswa kwicwe kaacite cishibilo cakwe Lesa muumi. Wakoolobesha pakwiita baanjelo bone abo Lesa mbwaakapa nkusu sha kunyonyoola cishi alimwi alweenge.

³ Munjelo uyu wakaamba ayi, “Mutanyonyooli cishi ca panshi, lweenge nabi shisamu kushikila tukabike basebenshi bakwe Lesa wesu twishibilo pankumo.”

⁴ Mpomunyaawo ndakalwiitwa ayi bantu abo bakalinga kucite twishibilo twakwe Lesa pankumo, bakalinga 144,000. Bakaswa kumikowa ya bene Isilaeli ili likumi ayobilo.

⁵ Nkokwaamba ayi kumukowa wakwe Juda, bakabikwa keshibilo ako bakalinga 12,000. Kumukowa wakwe Lubeni, bakalinga 12,000. Kumukowa wakwe Gadi, bakalinga 12,000.

⁶ Kumukowa wakwe Asha, bakalinga 12,000. Kumukowa wakwe Nafutali, bakalinga 12,000. Kumukowa wakwe Manase, bakalinga 12,000.

⁷ Kumukowa wakwe Simyoni, bakalinga 12,000. Kumukowa wakwe Lefi, bakalinga 12,000. Akwalo kumukowa wakwe Isaka, bakalinga 12,000.

⁸ Kumukowa wakwe Sebuluni, bakalinga 12,000. Kumukowa wakwe Josefu, bakalinga 12,000. Akwalo kumukowa wakwe Benjameni, bakalinga 12,000.

Likoto lya bantu baanji kwiculu

⁹ Lyalo ndindakalangilisha kunembo, ndakabona likoto lya bantu baanji batakoonshi kubelengwa. Bantu abo bakaswa kushikanda shoonse, kumikowa yoonse, kumishobo yoonse alimwi akumilaka yoonse. Bakeemikana kunembo lya cuuna ca bwaami alimwi aMwanaambelele, kabafwete shisani shituba alimwi kabacite amalala mumaansa.

¹⁰ Bakoolobesha ayi, “Lupulusho lulaswa kuli Lesa wesu ushiite pacuuna ca bwaami alimwi akuMwanaambelele!”

¹¹ Mpeeke baanjelo boonse bakeemikana akushinguluka cuuna ca bwaami, bamaloba alimwi ashilengwa shuumi shone isho, kabeemfwi. Lyalo bakafukama cakushisha shiwa panshi kunembo lya cuuna ca bwaami, akulambila Lesa,

¹² kabaamba ayi, “Ameni! Lesa wesu aalumbaishikwe, aapekwe bulemu abusongo, aalumbwe alimwi akupekwa nkusu abweendeleshi lyoonse alyoonse. Ameni!”

¹³ Mpomunyaawo umwi muloba wakanjipusha ayi, “Ino aba bantu bafwete shisani shituba mbaani alimwi ankobaswita nkuli?”

¹⁴ Nebo ndakamukumbula ayi, “Ndimwe mwishi, nkambo.” Lyalo wakandwiita ayi, “Aba mbobantu bakapula mumapensho anene. Bakacapa mingaanjo yabo akwiitubya mubulowa bwa Mwanaambelele.

¹⁵ Nceceeco ncebeemikanina kunembo lya cuuna ca bwaami cakwe Lesa alimwi balamusebensela malumwi amashiku muŋanda yakwe. Uyo ushiite pacuuna ca bwaami ulaakwikala ambabo alimwi akubalama.

¹⁶ Teshi bakanyumfwewo nsala nabi nyotwa. Teshi bakanyumfwewo lumwi nabi kupenga kucikasaashi cili coonse.

¹⁷ Ceebo Mwanaambelele uyo uli pakati lya cuuna ca bwaami ulaakubeembela akubatanjilila kutuntupu twa maanshi apa buumi. Lesa ulaakubakunkumuna minsonshi yabo yoonse.”