Ciyubululo 6 - Baibo Busansulushi Bwa Libuku Ili

Mwanaambelele mbwaakalamatula bakalamatila ba keshibilo

¹ Mpeeke ndakabona Mwanaambelele kaalamatula kalamatila wa keshibilo utaanshi pabaabo bali bosanwe abobilo. Lyalo ndakanyumfwa cilengwa cuumi cimwi pashilengwa shone isho, coolobesha aliswi lyakalinga kunyumfwika anga ncilulumo ca mfula ayi, “Kosa!”

² Ndindakalangilisha, ndakabona liaki lituba, kapatantite muntu wakalinga kucite buta alimwi wakapekwa amushini wa bwaami. Kuswawaawo wakaya anga ngushikukoma utooya mukukoma bamwi.

³ Mwanaambelele uyo ndyaakalamatula kalamatila wabili, ndakanyumfwa cilengwa cuumi cabili kacaamba ayi, “Kosa!”

⁴ Mpeeke mwakaswa liaki limwi, lyalo lyakalinga lisalala. Uyo wakalinga kutantiteewo wakapekwa nkusu shakubusha nkondo mucishi ca panshi kwaamba ayi bantu bacayane. Lakwe wakapekwa mupeeni unene.

⁵ Mwanaambelele ndyaakalamatula kalamatila watatu, ndakanyumfwa cilengwa cuumi catatu kacaamba ayi, “Kosa!” Mpomunyaawo mwakaswa liaki limwi, lyalo lyakalinga kushiya. Wakalinga kutantiteewo wakalinga kucite cipimo mulyaansa.

⁶ Pesule, ndakanyumfwa cakalinga kunyumfwika anga ndiswi, kuswa pakati pashilengwa shuumi shone isho lyakwaamba ayi, “Cipimo comwi ca witi cakalinga kuulwa maali ayo muntu ngweenga wasebensela pabushiku alimwi shipimo shotatwe sha maila shakalinga kuulwa bweenka ubo. Sombi mutanyonyooli mafuta alimwi awaini.”

⁷ Ono ndyaakalamatula kalamatila wane, ndakanyumfwa cilengwa cuumi cane kacaamba ayi, “Kosa!”

⁸ Ndindakalangilisha, ndakabona liaki litubulukite. Uyo wakalinga kutantiteewo liina lyakwe wakalinga Lufu. Lyalo musena wa bafu wakamukonkela pesule. Balo bakapekwa nkusu shakucaya cipansha comwi ca shone ca bantu boonse mucishi ca panshi. Nkusu shabo shakalinga shakucaya kwiinda munkondo, nsala, malwashi alimwi abanyama bakali ba muluundu.

⁹ Ndyaakalamatula kalamatila wasanu, panshi lya cipaililo, ndakabona myuuya ya baabo bakacaikwa ceebo cakushimikila maswi akwe Lesa alimwi aceebo ca bukamboni bwancinencine.

¹⁰ Yakoolobesha ayi, “NoBaami baLesa Beshinkusu shoonse, nomusalalite alimwi balushinisho! Ino mulaakoombolosha lili alimwi akupa mulandu bantu abo bali pacishi ca panshi bakatucaya?”

¹¹ Mpomunyaawo boonse bakapekwa cisani cituba comwi comwi, akulwiitwa ayi bookesheeko akulindililaako paniini kushikila mweelo weelete wa basebenshinyinaabo alimwi bashominyinaabo bakacaikwe kweelana ambobakacaikwa abalo.

¹² Lyalo Mwanaambelele ndyaakalamatula kalamatila wasanu awomwi, ndindakalangilisha, kwakacitika citentanshi cinene abuumbi. Lisuba lyakacileka kubala, lyakaboolabo mbi, anga ncisani cilemu cishiya. Awalo mweenshi wakaboolabo pyu anga mbulowa.

¹³ Nyenyeenshi shakalokela panshi bweenka mbuli nkuyu shibishi mboshiloka kuswa kucisamu na catenkaanishikwa amuuwo unene.

¹⁴ Alyalo liculu lyakashiminganabo anga nimpasa itoofungeelwa. Mpeeke tulundu alimwi ansuumbu shoonse shakakushikwa mumisena ya nshisho.

¹⁵ Mpomunyaawo bamaami ba mucishi ca panshi, beendeleshi, bamatanjilili ba bashilumamba, babile, beshinkusu alimwi abantu bamwi boonse, basha abaangulukite, bakayuba mushimfwengo sha panshi alimwi amumyaandami ya mutulundu.

¹⁶ Bakaambila tulundu alimwi amyaandami ayi, “Amutuwiite kwaamba ayi mutushiseeko kuli wooyo ushiite pacuuna ca bwaami alimwi akubukali bwa Mwanaambelele!

¹⁷ Mukwinga bushiku bwa bukali bwabo buloondesha bwashikila, ino ngani weenga wacaalaawo?”