Ciyubululo 5 - Baibo Busansulushi Bwa Libuku Ili

Libuku aMwanaambelele

¹ Lyalo ndakabona libuku mulyaansa lyalulyo lya wooyo wakalinga kushiite pacuuna ca bwaami ico. Libuku ili lyakalinga kuswitebo malembo, mukati apansengwe poonse alimwi lyakalinga kulamatikitwe abakalamatila ba keshibilo bali bosanwe abobilo.

² Mpomunyaawo ndakabona munjelo ucite nkusu, uyo wakoolobesha ayi, “Ngani weelete kulamatula bakalamatila aba ayi acalule libuku ili?”

³ Sombi tekwakalinga nabi womwi kwiculu, pacishi ca panshi, nabi panshi lya cishi weenga wacalula libuku ilyo akubona shakalingaamo.

⁴ Ndakalila abuumbi ceebo takukwe kucanika nabi womwi wakalinga kweelete kucalula libuku ilyo nabi kubona shakalingaamo.

⁵ Mpeeke muloba umwi wakaŋambila ayi, “Utanoolila! Bona! Uyo wiitwa ayi Inkalamu ya mumukowa wakwe Juda, wamulunyungu lwakwe Defedi wakakoma, aboobo ulakonsha kulamatula bakalamatila bosanwe abobilo abo akucalula libuku ili.”

⁶ Pesule, ndakabona Mwanaambelele kaaimfwi pakati ka cuuna ca bwaami, kaashingulukitwe ashilengwa shuumi isho shone abamaloba abo. Mwanaambelele wakalinga kuboneka anga wacaikwa. Wakalinga kucite meeca osanwe aobilo alimwi ameenso osanwe aobilo. Meenso ayo njemishimu yosanwe ayobilo yakwe Lesa iyo lakwe njaakatuma mucishi coonse ca panshi.

⁷ Mpeeke Mwanaambelele wakaya mukutambula libuku ilyo mulyaansa lyalulyo lyakwe wooyo wakalinga kushiite pacuuna ca bwaami.

⁸ Ndyaakalitambulabo, shilengwa shone shuumi abamaloba bali makumi obilo abone, bakafukama kunembo lya Mwanaambelele uyo. Boonse bakalinga kucite tulumbu alimwi ambale shifongomene sha golodi, kashiswite tununkila kabotu. Tununkila kabotu uto njemipailo ya bashomi bakwe Lesa.

⁹ Bakalinga kwiimba lwiimbo lupya ayi, “Webo ndiwe weelete kubwesa libuku akulamatula bakalamatila ba keshibilo. Mukwiinga wakalinga wacaikwa alimwi kwiinda mulufu lwako ndowakalibenga, wakoolila Lesa bantu mumikowa yoonse, milaka yoonse, shishi shoonse alimwi amishobo yoonse.

¹⁰ Wakalengesha kwaamba ayi babe bamaami, kwaamba ayi basebensele Lesa wesu anga mbapailishi, aboobo balaakweendelesha mucishi ca panshi.”

¹¹ Kuswawaawo, ndakalangilisha alimwi, akubona baanjelo bali shuulu ashuulu shitabelengwi. Bakalinga kushingulukite cuuna ca bwaami, shilengwa shuumi shili shone alimwi abamaloba abo.

¹² Ndakabanyumfwa kabeemba mumaswi apeculu ayi, “Mwanaambelele wakalinga wacaikwa, ngoweelete kutambula bweendeleshi, bubile, busongo, nkusu, mucinshi, bulemu alimwi akulumbaishikwa.”

¹³ Lyalo ndakanyumfwa shilengwa shoonse sha mwiculu, mucishi ca panshi, panshi lya cishi alimwi amulweenge, shoonse shiliimo shakalinga kwiimba ayi, “Uyo ushiite pacuuna ca bwaami alimwi aMwanaambelele, balumbaishikwe akupekwa bulemu ankusu kwamuyayaya!”

¹⁴ Mpeeke shilengwa shuumi shili shone shakakumbula ayi, “Ameni!” Lyalo bamaloba abo bakafukama akulambila.