Ciyubululo 4 - Baibo Busansulushi Bwa Libuku Ili

Kulambila kwa kwiculu

¹ Kuswawaawo, ndakabona mulyango ucalukite kwiculu. Mpomunyaawo ndakanyumfwa liswi anga ndupeenga, lyeenka ndindakanyumfwa kataanshi. Lyakandwiita ayi, “Kosa kokuno kwiculu, nkuboneshe sheshi shikacitike kuswa sheeshi.”

² Paciindi ceenka ico ndakatanjililwa aMushimu Usalashi. Kwiculu uko, ndakabona cuuna ca bwaami kapashiite umwi.

³ Ciinso ca wooyo wakalinga kushiite pacuuna ico, cakalinga kubeka anga ngamabwe amakwebo abekabeka alimwi aasalala pyu. Cuuna ico cakalinga kushingulukitwe ankongolo yakalinga kuboneka anga ndibwe liitwa ayi emalodi.

⁴ Cuuna ca bwaami ico cakalinga kushingulukitwe ashuuna shimwi sha bwaami shili makumi obilo ashone apo pakalinga kushiite bamaloba bali makumi obilo abone. Bakalinga kufwete shisani shituba alimwi amishini ya golodi kumitwi.

⁵ Mucuuna momunya umo mwakalinga kuboneka kubeka kwa mfula, kunyumfwika ciyobeyobe alimwi acilulumo. Kunembo lya cuuna kwakalinga kunyaka shimunimweenge shili shosanwe ashobilo. Isho njemishimu ili yosanwe ayobilo yakwe Lesa.

⁶ Kunembo lya cuuna ico kwakalinga cintu cakalinga kuboneka anga ndweenge lwakalinga kubeka anga ndibwe lya maanshi. Mumbasu shoonse shone sha cuuna ca bwaami ico, mwakalinga shilengwa shuumi shone isho shakalinga kuswitebo meenso mubili woonse, kunembo akwisule koonse.

⁷ Cilengwa cuumi cakutaanguna cakalinga kuboneka anga ninkalamu, cabili cakalinga kuboneka anga ngumucende, catatu cakalinga kucite ciwa cili anga nca muntu alimwi cane cakalinga kuboneka anga ngumumbankwashi utokuuluka.

⁸ Cilengwa cuumi coonse cakalinga kucite mapapaminwa ali osanwe alyomwi ayo akalinga kuswitebo meenso, mukati apansengwe. Malumwi amashiku teshakalinga kucileka kwiimba ayi, “Ulisalalite, Ulisalalite, Ulisalalite, Mwaami Lesa Shinkusu shoonse, wakalingaawo, uliiwo alimwi weshi akanooliiwo!”

⁹ Ono na shilengwa shuumi ishi shone shapa bulemu, mucinshi alimwi akulumba kuli wooyo wakalinga kushiite pacuuna ca bwaami, muumi lyoonse alyoonse,

¹⁰ bamaloba abo bali makumi obilo abone balafukama kunembo lya wooyo ushiite pacuuna muumi lyoonse alyoonse akumulambila. Balatula mishini yabo kunembo lya cuuna ico akwaamba ayi,

¹¹ “NoBaami baLesa, baLesa besu, mulyeelete kupekwa bulemu, mucinshi, alimwi ankusu mukwiinga ndimwe mwakalenga shintu shoonse. Ncakwiila kwiinda mukuyanda kwanu shoonse shakaba bweenka mboshibete alimwi shakaba abuumi.”