Ciyubululo 3 - Baibo Busansulushi Bwa Libuku Ili

Nkalata ya kalembelwa coonde ca kuSadisi

¹ “Mutanjilili wa kucoonde ca kuSadisi umulembele ayi, “Aya ngamakani aamba wooyo ucite mishimu yakwe Lesa ili yosanwe ayobilo alimwi anyenyeenshi shili shosanwe ashobilo. Utokwaamba ayi, ‘Milimo yako ndiishi alimwi ulicite mpuwo ayi uli muumi, nakubi kwaamba ayi ulifwite.

² Anu buka, uyumye ceeco ncoocite kacitana kufwitilila. Mukwiinga ndaboona ayi milimo yako teena kululama cancinencine pameenso akwe Lesa wangu.

³ Ibaluka ico ncewakeeishikwa ancewakanyumfwa, kuswawaawo ucikonkele akusanduka kuswa kushibiibi shako. Na ubule kubuka, ndaakwisa anga ngumwiipi alimwi teshi ukeshibeewo aciindi nceshi nkakupolele.

⁴ Sombi nkobali bamwi baniini muSadisi abo batakwe kubisha shakufwala shabo. Balaakweenda anebo kabafwete shakufwala shituba tuu mukwiinga mbobeelete.

⁵ Uyo weshi akakome bubi ulaakufwala shakufwala shituba mbomunya ubo alimwi liina lyakwe teshi nkalifuute mulibuku lya buumi. Ndaakwaamba patuba ayi ulakonkela ndime pameenso abaTa abaanjelo babo.’

⁶ “Uyo ucite matwi, aanyumfwe sheesho Mushimu Usalashi nshootokwaambila shoonde!

Nkalata yakalembelwa coonde ca kuFiladelufya

⁷ “Mutanjilili wa kucoonde ca kuFiladelufya umulembele ayi, “Aya ngamakani aamba wooyo usalalite ushomeka alimwi ngoocite cakucalwisha cakwe Defedi, uyo ucita na wacalula, taaku weenga wacala alimwi na wacala, taaku weenga wacalula.

⁸ Utokwaamba ayi, ‘Milimo yako ndiishi. Ndakacalula cisasa kunembo lyako, ico muntu uli woonse nceenga taakoonshi kucala. Ndishi ayi ulicite nkusu shiniini, nakubi boobo wakonkela kwiisha kwangu, tookwe kunkakaawo.

⁹ Ono bona, kubantu abo ba mulikoto lyakwe Satana, balibanda ayi mbaJuda, sombi kabateshi mbabo, ndaakulengesha ayi bakese mukufukama muliimfwa lyako. Lyalo balaakwishiba ayi ndikusuni.

¹⁰ Mukwiinga wakakonkela kwiisha kwangu ayi utolelele kupenshekwa, anebo ndaakukulama muciindi ca mapensho eshi akeshiite bantu boonse mucishi kwaamba ayi basunkwe.

¹¹ Teshi ncelwe kwisa, yumabo kukonkela sheesho nshoocite kale kwaamba ayi kutabi muntu nabi womwi weshi akakunyaaye mushini wako.

¹² Uyo weshi akakome, ndaakulengesha ayi akabe licinko lya muŊanda yakwe Lesa wangu alimwi teshi akasweemo. Pali nguwe ndaakulemba liina lyakwe Lesa wangu alimwi alya ndabala inene yakwe Lesa wangu, nkokwaamba ayi Jelusalemu ipya, iyo njeshi ikaswe kwiculu kuli Lesa wangu. Ndaakulemba aliina lyangu lipya pali nguwe.’

¹³ “Uyo ucite matwi, aanyumfwe sheesho Mushimu Usalashi nshootokwaambila shoonde!

Nkalata yakalembelwa coonde ca kuLawodisiya

¹⁴ “Mutanjilili wa kucoonde ca kuLawodisiya umulembele ayi, “Aya ngamakani aamba wooyo uli ngoAmeni, kamboni ushomeka alimwi wancinencine. Ngomatalikilo a shintu shoonse Lesa nshaakalenga.

¹⁵ Utokwaamba ayi, ‘Milimo yako ndiishi, tootontoli nabi kulungula. Naakwiinga kootontola nabi kulungula, necalinga cibotu kuli ndime.

¹⁶ Ono mukwiinga ulakasaalabo, toolunguli nabi kutontola, ntookushipa!

¹⁷ Webo ulaamba ayi, Ndimubile, ndicite buboni buunji, taaku nceentacite. Sombi tooshi kwaamba ayi ulipengete alimwi ulalensha ankuumbu! Uli mukandu, moofu alimwi uli matakosha.

¹⁸ Ono ntookulwiitaako ayi uule golodi kuli ndime, golodi yakasalashikwa amulilo kwaamba ayi ubile. Uule ashakufwala shituba kwaamba ayi ufwale akushisa mubili wako utoolensha nsoni. Uule amusamu wa mumeenso ayi utalike kubona.

¹⁹ Abo mboonsuni ndabakalalila akubapa mulandu. Aboobo yuminina abuumbi, usanduke kuswa kushibiibi shako.

²⁰ Bona, ndiimfwi pamulyango ntookonkoonsha. Uyo woonse weshi anyumfwe liswi lyangu akucalula cisasa, ntoonjila muŋanda yakwe, kwaamba ayi nebo anguwe tulite pantu pomwi.

²¹ Uyo eshi akakome ndaakumusuminisha alakwe kwikala pacuuna cangu ca bwaami, bweenka mbondakakoma akwikala lubamba abaTa pacuuna cabo ca bwaami.’

²² “Uyo ucite matwi, aanyumfwe sheesho Mushimu Usalashi nshootokwaambila shoonde!”