Ciyubululo 22 - Baibo Busansulushi Bwa Libuku Ili

¹ Kuswawaawo, munjelo wakambonesha amulonga wa maanshi apa buumi ayo akalinga kubeka. Maanshi a mumulonga uyu akalinga kukunka kuswa kucuuna ca bwaami cakwe Lesa alimwi aMwanaambelele.

² Akalinga kukunkila pakati ka nshila ya mundabala inene. Muloombe lwa mulonga uyu moonse mobilo, mwakalinga cisamu cipa buumi. Cisamu ici cilacata shisepo mankanda ali likumi aobilo mumwaaka, nkokwaamba ayi linkanda lyomwi mumweenshi. Matewu a ncico aalo ngakushilikisha mishobo yoonse ya bantu.

³ Mundabala iyo teshi mukacanike cintu nabi comwi ico Lesa ncaakashingana. Cuuna ca bwaami cakwe Lesa alimwi aMwanaambelele cilaakunooli mundabala inene iyi, mpeeke basebenshi bakwe balaakumulambila.

⁴ Balaakubona ciinso cakwe alimwi liina lyakwe lilaakulembwa pankumo shabo.

⁵ Teshi kukanooshiyaawo. Bantu teshi bakanooyanda malampi nabi mumuni wa lisuba mukwiinga Mwaami Lesa ngweshi akabe mumuni wabo alimwi abalo balaakunokweendelesha lyoonse alyoonse.

Kuboola kwakwe Jesu

⁶ Mpomunyaawo munjelo wakaŋambila ayi, “Maswi aya ngancinencine alimwi alyeelete kushomwa. Mwaami Lesa uyo upa Mushimu Usalashi kubalaluki, watuma munjelo wakwe ayi aboneshe basebenshi bakwe isho sheshi shikacitike onoono.”

⁷ Jesu utokwaamba ayi, “Amubone, ntoofwambaana kuboola! Balicite coolwe abo bakonkela maswi abulaluki ali mulibuku ili.”

⁸ Nebo neJoni ndakanyumfwa alimwi akubona shintu ishi. Ono ndindakashinyumfwa akushibona, ndakafukama muliimfwa lya munjelo uyo wakambonesha shintu ishi ayi mulambile.

⁹ Sombi lakwe wakaŋambila ayi, “Utaciti bobulya mukwiinga anebo ndi musebenshinyoko alimwi musebenshinyina bamakwanu balaluki pantu pomwi abaabo boonse bakonkela maswi ali mulibuku ili. Ulyeelete kulambila Lesa!”

¹⁰ Wakaŋambila alimwi ayi, “Utashisi maswi a bulaluki ali mulibuku ili ceebo ciindi ndyeshi shikacitike cili pafwaafwi.

¹¹ Uyo woonse ucita shibiibi, ulyeelete kutolelela kubisha, awooyo ucita shintu shilensha nsoni, ulyeelete kutolelela kushicita. Alakwe uyo ucita shiluleme, ulyeelete kutolelela kushicita, awooyo usalalite, ulyeelete kunoosalalitebo.”

¹² Jesu utokwaamba ayi, “Amubone, ntoofwambaana kuboola! Ndaakuletelela ashilambu shangu shakwisa mukupa muntu womwi awomwi kweelana anshaakacita.

¹³ Nebo ndime Alufa alimwi aOmega, nkokwaamba ayi Mutaanshi alimwi aWakweelaako, ndime Matalikilo aMamanino.”

¹⁴ Balicite coolwe abo bacapa shakufwala shabo kwaamba ayi bakasuminishikwe kulya shisepo sha kucisamu cipa buumi alimwi akwinjila mundabala inene iyo.

¹⁵ Sombi pansengwe lya ndabala inene iyi mpopali bakabwa abaloshi, bafuule abacayi, abo balambila shibumbwabumbwa alimwi ababeshi mumyaambo amicito.

¹⁶ “Nebo neJesu, ndatuma munjelo wangu kwaamba ayi amulwiite shintu ishi mushoonde. Ndakashalwa mulunyungu lwakwe Defedi, alimwi ndime nyenyeenshi iyo imunika abuumbi iitwa ayi ntanda.”

¹⁷ Mushimu Usalashi aNabwiinga batokwaamba ayi, “Kamwisa!” Awooyo woonse unyumfwa makani aya ulyeelete kwaamba ayi, “Kamwisa!” Uyo woonse unyumfwite nyotwa, ese. Uyo woonse usuni, atambule maanshi apa buumi ayo apekwabo.

Maswi akweelaako

¹⁸ Nebo neJoni, ntoocenjesha muntu woonse unyumfwa maswi a bulaluki ali mulibuku ili. Uyo woonse weenga wanunga pamaswi aya, Lesa alakwe ulaakumunungilaawo pamyaalu ilembetwe mulibuku ili.

¹⁹ Na muntu uli woonse wakusha maswi amwi pamaswi abulaluki ali mulibuku ili, Lesa alakwe ulaakumukushishaako shisepo sha kucisamu cipa buumi, amusena wakwe wa mundabala inene isalalite, isho shasansululwa mulibuku ili.

²⁰ Uyo woonse usumina makani aya oonse ulaamba ayi, “Ee ncalushinisho! Ntoofwambaana kwisa!” Acibe boobo. Kosa oMwaami Jesu!

²¹ Luse lwa Mwaami Jesu lube amwebo noonse. Ameni.