Ciyubululo 20 - Baibo Busansulushi Bwa Libuku Ili

Myaaka ili cuulu

¹ Kuswawaawo ndakabona munjelo kaaswa kwiculu. Mulyaansa wakalinga kucite cakucalwisha cilindi citeeli alimwi ancetani inene.

² Mpomunyaawo wakacata shinshimwe uyo, insoka itaanshi, nkokwaamba ayi Mubiibi nabi Satana akumwaanga myaaka ili cuulu.

³ Munjelo wakamuwaala mucilindi citeeli, wacalaako akumataako kwaamba ayi atakacenjeekiwo mishobo ya bantu lyobilo kushikila myaaka iyo ili cuulu ikamaane. Lyalo ndyeshi akaangululwe kwaciindi ciniinibo.

⁴ Mpomunyaawo ndakabona shuuna sha bwaami, kucana abo bakalinga kushiiteewo bapekwa nkusu shakoombolosha. Ndakabona amyuuya ya baabo bakatimbulwa mitwi ceebo cakushimikila lushinisho Jesu ndwaakayubulula alimwi amaswi akwe Lesa. Balo tabakwe kulambilawo munyama, nabi cibumbwabumbwa cakwe. Peculu lya waawo tabakwe kutambulawo keshibilo kakwe pankumo nabi kumaansa. Bantu aba bakabuka akweendelesha anga mbamaami pantu pomwi aKlistu kwamyaaka ili cuulu.

⁵ Uku nkokubushikwa kuswa kubafu kwakutaanguna. Bafu boonse bakacaala, tabakwe kubuka kushikila myaaka ilya ili cuulu ndiyakamana.

⁶ Balicite coolwe alimwi balisalalite abo beshi bakataangune kubushikwa kuswa kubafu. Kuli mbabo, lufu lwabili talucite nkusu, sombi balaakuba bapailishi bakwe Lesa alimwi aKlistu. Lyalo balaakweendelesha pantu pomwi anguwe kwamyaaka ili cuulu.

Kukomwa kwakwe Satana

⁷ Ono na myaaka ili cuulu ikamaane, Satana ulaakwaangululwa kuswa muntolongo mwaakalinga.

⁸ Lyalo ulaakutalika kucenjeeka mishobo ya bantu ba mucishi coonse ca panshi, nkokwaamba ayi bantu beetwa ayi Gogi alimwi aMagogi. Satana ulaakubabunganya pantu pomwi ayi atalike kulwana. Bantu aba balaakunoolibo anga ngumuseese wa muloombe lwa lweenge kufula.

⁹ Mpomunyaawo bakeenda mucishi coonse ca panshi akushinguluka musena wakalingaawo bashomi alimwi andabala inene iyo Lesa njaasuni. Sombi mulilo wakaloka kuswa kwiculu akubanyonyoola boonse.

¹⁰ Lyalo Mubiibi uyo wakabacenjeeka, lakwe wakawaalwa mulweenge lwa mulilo alimwi asalufa umo mwakalinga kale munyama uyo alimwi amulaluki mubeshi. Balo balaakunoopenshekwa malumwi amashiku lyoonse alyoonse.

Koomboloshekwa kwamamanino

¹¹ Mpomunyaawo ndakabona cuuna ca bwaami cituba cinene alimwi awooyo wakalinga kushiiteewo. Cishi ca panshi alimwi aliculu shakacica kuswa kuli nguwe. Mpeeke tashikwe kubonekaawo alimwi.

¹² Lyalo ndakabona bafu, balemekwa abantubo, boonse kabeemfwi kunembo lya cuuna ca bwaami. Lyalo mabuku akacalulwa alimwi libuku limwi lyakacalulwa, ndyelibuku lya boomi. Bafu bakoomboloshekwa kweelana amicito yabo bweenka mbomwakalinga kulembetwe mumabuku.

¹³ Lweenge alwalo lwakakusha bafu bakalinga muli ndulo. Lufu alimwi amusena wa bafu ashalo shakakusha bafu bakalinga muli nshisho. Boonse bakoomboloshekwa kweelana amicito yabo.

¹⁴ Lyalo lufu alimwi amusena wa bafu shakawaalwa mulweenge lwa mulilo. (Lweenge lwa mulilo ulu ndolufu lwabili.)

¹⁵ Uyo woonse utakwe kulembwa liina mulibuku lya boomi, wakawaalwa mulweenge lwa mulilo.