Ciyubululo 19 - Baibo Busansulushi Bwa Libuku Ili

¹ Ndishakeenda shoonse ishi, ndakanyumfwa cakalinga kunyumfwika anga nciyobeyobe cinene ca bantu baanji kwiculu kabaamba ayi, “Aalumbaishikwe Lesa! Lupulusho, bulemu alimwi ankusu shoonse nshakwe Lesa wesu!

² Koombolosha kwakwe nkwalushinisho alimwi kuliluleme! Wakapa mulandu mwanakashi mufuule uyo wakaya mpuwo uyo wakalengesha ayi bantu boonse mucishi babishe kwiinda mubufuule bwakwe. Lesa wakamupa mulandu ceebo wakacaya basebenshi bakwe.”

³ Bakoolobesha alimwi ayi, “Aalumbaishikwe Lesa! Bwiishi bwa mulilo utootenta ndabala inene iyo, bulaakunoosuntabo lyoonse alyoonse!”

⁴ Bamaloba abo bali makumi obilo abone alimwi ashilengwa shuumi isho shili shone shakafukama akulambila Lesa ukala pacuuna ca bwaami. Bakaamba ayi, “Ameni! Aalumbaishikwe Lesa!”

Kusekelela bwiinga bwa Mwanaambelele

⁵ Lyalo kucuuna ca bwaami kwakanyumfwika liswi lyakwaamba ayi, “Atulumbaishe Lesa, mwebo nobasebenshi bakwe alimwi abantu boonse, balemekwa alimwi abantubo, noonse nomumulemeka!”

⁶ Kuswawaawo, ndakanyumfwa liswi lyakuba anga nciyobeyobe ca bantu baanji alimwi anga nkupoota kwa maanshi aanji, kuli anga ncilulumo ca mfula, lyakwaamba ayi, “Atulumbaishe Lesa! Mukwiinga Mwaami Lesa wesu Shinkusu shoonse nguMweendeleshi!

⁷ Atusangalale akukondwa, tulumbaishe bulemu bwakwe! Mukwiinga ciindi cakusekelela bwiinga bwa Mwanaambelele cashikila, alakwe mwanakashi ngwaatokweeba walibambila kale.

⁸ Mwanakashi uyu wapekwa shisani shiteshimite shituba kwaamba ayi afwale.” (Shisani shiteshimite shituba shileemikanina micito ibotu ya bashomi.)

⁹ Mpomunyaawo munjelo wakandwiita ayi, “Ulembe ayi balicite coolwe abo bakatambwa kubwiinga bwa Mwanaambelele.” Alakwe munjelo wakanungaawo ayi, “Aya ngamaswi alushinisho akwe Lesa.”

¹⁰ Mpeeke ndakafukama muliimfwa lya munjelo uyo ayi mulambile, sombi wakandwiita ayi, “Utaciti bobulya! Nebo ndi musebenshinyoko, ndibo bweenka mbuli bashominyoko bamwi boonse abo bashoma lushinisho Jesu ndwaakayubulula. Ulyeelete kulambilabo Lesa!” Mukwiinga bukamboni bwakwe Jesu ngumuuya wa bulaluki.

Shawooyo utantite paliaki lituba

¹¹ Lyalo ndakabona liculu lyacaluka, kucana paliimfwi liaki lituba. Wakalinga kutantiteewo uleetwa ayi Ushomeka, Walushinisho. Lakwe uloombolosha akulwana mubululami.

¹² Meenso akwe akalinga anga ngumulilo utoonyaka, kumutwi wakalinga kufwete mishini iinji. Wakalinga kulembetwe liina ilyo muntu uli woonse ndyaateshi, sombibo mwiine eenka.

¹³ Cisani ncaakalinga kufwete cakasumpwa mubulowa, liina lyakwe “NguLiswi lyakwe Lesa.”

¹⁴ Bashilumamba boonse ba kwiculu bakamukonkela kabatantite pamaaki atuba, kabafwete shakufwala shiteshimite shituba tuu.

¹⁵ Mukanwa mwakaswa mupeeni ukolete wakukomeshako mishobo yoonse. Mishobo iyo ulaakuyeendelesha ankooli ya nshimbi alimwi ulaakulyatoola mwakutyanina minyansa ya bukali bwakwe Lesa Shinkusu shoonse.

¹⁶ Apalo pacisani cakwe apalibelo, pakalinga kulembetwe liina lyakwaamba ayi, “Mwaami wa bamaami, Mweendeleshi wa beendeleshi.”

¹⁷ Lyalo ndakabona munjelo wakalinga kwiimfwi palisuba. Wakoolobesha cankusu kubayuni boonse booluka mwiculu ayi, “Kamwisa, mubungane kumulalilo unene wakwe Lesa!

¹⁸ Kamwisa mulye mituntu ya bamaami, bamatanjilili ba bashilumamba alimwi abashilumambabo, mituntu ya maaki abeshikutantaawo alimwi amituntu ya bantu boonse, basha abaangulukite, balemekwa alimwi abantubo!”

¹⁹ Kuswawaawo ndakabona munyama uyo alimwi abamaami ba mucishi ca panshi abashilumamba babo kababungene kwaamba ayi balwane awooyo wakalinga kutantite paliaki abashilumamba bakwe.

²⁰ Munyama uyo wakacatwa pantu pomwi amulaluki mubeshi uyo wakalinga kucita shaankamiko ceebo ca nguwe. Kwiinda mushaankamiko nshemunya ishi, wakacenjeeka bantu abo bakalinga kucite keshibilo ka munyama alimwi abaabo balambila cibumbwabumbwa cakwe. Mpeeke munyama uyo alimwi amulaluki mubeshi, bakawaalwa mulweenge lwa mulilo uyo unyaka asalufa, kabalasha.

²¹ Bashilumamba babo boonse bakacaikwa amupeeni uswa mukanwa lya wooyo wakalinga kutantite paliaki. Lyalo bayuni abo boonse bakalya mituntu iyo akukuta.