Ciyubululo 18 - Baibo Busansulushi Bwa Libuku Ili

Kuwa kwa ndabala inene ya Babiloni

¹ Kuswawaawo ndakabona munjelo umwi kaaswa kwiculu. Wakalinga kucite nkusu shiinji alimwi cishi coonse ca panshi cakabekabeka ceebo ca mumuni wakubala kwakwe.

² Wakoolobesha ayi, “Yawa, yawa ndabala inene ya Babiloni! Yaba momwakwikala bashikaswa ba mishobo yoonse. Yaba momwakwikala shiyuni shitasalalite alimwi shilensha bunya.

³ Mukwiinga mishobo yoonse yakanwa waini ukali wa bufuule bwakwe. Bamaami boonse ba mucishi ca panshi bakoonaakwe kale, abalo beshimakwebo boonse ba mucishi ca panshi bakabila abuumbi ceebo ca lunkumbwa lwakwe lunene.”

⁴ Mpomunyaawo ndakanyumfwa liswi limwi kuswa kwiculu lyakwaamba ayi, “Amusweemo nobantu bangu! Amuswe muli nguwe! Tamweelete kubisha pantu pomwi anguwe, alimwi tamweelete koomboloshekwa akupekwa mulandu mbuli nguwe!

⁵ Mukwiinga shibiibi shakwe shililundenebo, shilashika akwiculu. Aboobo Lesa washiyeeya shibiibi shakwe.

⁶ Amumuciite bweenka mbwaakacita ndimwe. Lakwe mwiindilisheewo pasheesho nshaakacita. Munkomeshi njaakanwishishamo ndimwe, mubikemo waini ukali kwiinda pawooyo ngwaakamunwisha.

⁷ Mumupeenshe akumulensha nsoni abuumbi bweenka mbuli bulemu mbwaakalinga kulipa akutangala kwakwe. Mukwiinga mumoyo wakwe ulaamba ayi, ‘Nebo ndi mwaami mwanakashi, ndishiite pacuuna cangu! Nshiishi mukalubinje mwanakashi alimwi taaku bushiku mbweshi nkoongumane!’

⁸ Paceebo ceeco, mubushiku bomwibo, ulaakupolelwa myaalu iyi, malwashi, buumba alimwi ansala. Ulaakutentwa mumulilo mukwiinga Mwaami Lesa umoombolosha ulicite nkusu shiinji.”

⁹ Mpeeke bamaami boonse ba mucishi ca panshi, abo bakacitaakwe bufuule alunkumbwa lumwi loonse, balaakulila akuba abuumba bunene pakubona bwiishi bweshi bukanoosunta pakupya ndabala inene iyo.

¹⁰ Balaakwiimikana palaale kuloonda kwaamba ayi inga baakupekwa mulandu abalo. Balaakwaamba ayi, “Mapensho, mapensho kundabala inene ya Babiloni! Ncakwiila muawala yomwibo iyi wapekwa mulandu!”

¹¹ Beshimakwebo boonse ba mucishi ca panshi abalo balaakulila akuungumana ceebo taaku eshi akoolewo shintu shabo alimwi.

¹² Taaku eshi akoole golodi yabo, silifa, mabwe amakwebo, bulungu, shisani shiteshimite, nsalu shifubelafubela, shisani shimwi shipusenepusene, shintu shakubesa shipusenepusene, shintu shipangwa kumeeca a nsofu, kushisamu shamakwebo, kumukuba, kunshimbi alimwi akumabwe akuyakisha.

¹³ Taaku eshi akoole tununkila kabotu mubuyani tupusenepusene, tununkila kabotu pakutenta, mule, waini, mafuta, fulaulo, witi, ŋombe, mbelele, maaki, shikoci alimwi basha, nkokwaamba ayi bantu boomi.

¹⁴ Beshimakwebo aba bakaambila ndabala inene iyo ayi, “Shoonse shintu shibotu nshewakalinga kusukeme shashimingana alimwi bubile abulemu bwako bwamana, teshi ukashicaneewo alimwi!”

¹⁵ Beshimakwebo abo bakabila ceebo cakuulishila mundabala inene iyi, balaakwiimikanabo palaale mukwiinga abalo batooloonda ayi inga baakupekwa mulandu bweenka mbuli nguwe. Balaakulila alimwi akuungumana

¹⁶ akwaamba ayi, “Mapensho, mapensho kundabala inene iyi! Wakalinga kufwala shakufwala shiteshimite, shifubelafubela ashisalalabo pyu. Ncakwiila wakalinga kulibotesha agolodi, mabwe amakwebo alimwi abulungu!

¹⁷ Ndushinisho muawala yomwi iyi wasowekelwa bubile bwakwe boonse!” Boonse beendelesha maato anene alimwi abantu batantaamo, basebenshi beshikubona maato alimwi abamwi boonse abo bacanina mpindu mulweenge, bakeemikanabo palaale.

¹⁸ Ndibakabona bwiishi kabusunta ndabala inene iyo ndiyakalinga kupya, bakoolobesha ayi, “Takuna kubawo kale ndabala inene aimwi ili mbuli ndabala inene iyi!”

¹⁹ Mpeeke bantu aba bakalitukwita lusuko mumitwi, bakalila akuungumana abuumbi. Bakalinga kwaamba ayi, “Mapensho, mapensho kundabala inene iyi! Njendabala inene umo bantu boonse abo bacite maato anene palweenge mobakabilila. Ono muawala yomwi iyi banyonyookelwa shintu shoonse!”

²⁰ Sangalala webo oliculu mukwiinga ndabala inene yanyonyooka! Amusangalale mwebo nobashomi noonse, nobatumwi alimwi anobalaluki bakulukulu! Mukwiinga Lesa waipa mulandu ceebo ca sheesho nsheyakacita kuli ndimwe!

²¹ Mpomunyaawo munjelo ucite nkusu wakabwesa libwe linene lili anga ndyakupelelaawo akuliwaala mulweenge kaamba ayi, “Mbweeke bulya ndabala inene ya Babiloni mbweshi ikanyonyoolwe, teshi ikabonekeewo alimwi!

²² Maswi a beshitulumbu abeshikwiimba, beshimitolilo alimwi a beshimapeenga teshi bakanyumfwikeewo alimwi muli ndiwe! Taaku musebenshi wa mulimo uli woonse eshi akacanike muli ndiwe alimwi. Teshi mukanyumfwikeewo akulila kwa mpelo muli ndiwe alimwi!

²³ Muli ndiwe teshi mukabonekeewo lilampi litoonyaka alimwi teshi mukanyumfwikeewo liswi lyakwe shibwiinga alyakwe nabwiinga. Beshimakwebo bako bakalinga mbobantu beendaawo nkusu mucishi coonse ca panshi. Ono kwiinda mumampelampela ako, wakacenjeeka bantu ba mishobo yoonse mucishi coonse ca panshi!”

²⁴ Ndabala inene ya Babiloni yakapekwa mulandu ceebo ca bulowa bwa balaluki alimwi abwa bashomi boonse bwakacanika mumo. Ee, abulowa bwa bantu boonse bakacaikwa mucishi ca panshi.