Ciyubululo 17 - Baibo Busansulushi Bwa Libuku Ili

Mwanakashi mufuule wakaya mpuwo

¹ Lyalo umwi munjelo pakati ka baabo bali bosanwe abobilo bakalinga kucite mbale shifongomene shosanwe ashobilo, wakesa mukundwiita ayi, “Kosa nkuboneshe mbuli mwanakashi mufuule uyo wakaya mpuwo mbweshi akapekwe mulandu, njendabala inene iyo ili pafwaafwi amilonga iinji.

² Bamaami ba mucishi ca panshi bakoonaakwe alimwi bantu ba mucishi bakakolwa waini wa bufuule bwakwe ubo.”

³ Mpomunyaawo Mushimu Usalashi wakantanjilila, alakwe munjelo wakantola kuluyanga. Nkomunya uko ndakabona mwanakashi kaashiite pamunyama usalalabo pyu. Pamubili wa munyama uyu woonse pakalinga kulembetwe meena a mucobwe kuli Lesa. Wakalinga kucite mitwi yosanwe ayobilo alimwi ameeca ali likumi.

⁴ Mwanakashi uyu wakalinga kufwete shisani shifubelafubela alimwi ashisalalabo pyu. Wakalibotesha amakosa a golodi, mabwe amakwebo abulungu. Mulyaansa wakalinga kucite nkomeshi ya golodi umo mwakalinga kuswitebo micito ibiibi alimwi ashimwi shilensha nsoni sha bufuule bwakwe.

⁵ Pankumo yakwe, pakalinga kulembetwe liina lya busansulushi bushisitwe lyakwaamba ayi, “Babiloni munene, mushali wa bafuule boonse alimwi amicito yoonse ilensha nsoni ya mucishi ca panshi.”

⁶ Mpeeke ndakabona kwaamba ayi mwanakashi uyu wakalinga kukoletwe bulowa bwa bashomi alimwi bwa baabo bakacaikwa ceebo ca kushoma muli Jesu. Ndindakabona boobo, ndakakankamana abuumbi.

⁷ Lyalo munjelo uyo wakanjipusha ayi, “Ino wakankamananshi? Ntookusansulwita bushishi bwa pamwanakashi uyu alimwi amunyama uyu ngwaatantiteewo ucite mitwi yosanwe ayobilo alimwi ameeca ali likumi.

⁸ Ulya munyama ngowabona, wakalinga muumi, sombi bulya teshi muumi. Uli pafwaafwi kuswa mucilindi citeeli kwaamba ayi akaye akanyonyoolwe. Bantu boonse bali mucishi ca panshi, abo bacite meena atakwe kulembwa mulibuku lya buumi kuswa kumatalikilo a cishi, balaakukankamana pakubona munyama uyu. Kale kale, munyama uyu wakalinga muumi, sombi bulya teshi muumi, nakubi kwaamba ayi ulaakuboneka alimwi.

⁹ “Ciyandika pamakani aya mbusongo akunyumfwisha. Mitwi ili yosanwe ayobilo ilya ileemikanina tulundu tuli tosanwe atobilo apo pashiite mwanakashi. Ileemikanina abamaami bali bosanwe abobilo.

¹⁰ Bosanwe bakafwa kale, womwi ngooceendelesha, ono wakweelaako taana kuboneka. Sombi na akese, ulaakweendeleshabo nshiku shiniini.

¹¹ Ono munyama uyo wakalinga muumi, sombi uteshi muumi bulya, ngomwaami wasanu abotatwe. Nakubi kwaamba ayi ngwa mulikoto lya baabo bali bosanwe abobilo, utooya mukunyonyoolwa.

¹² “Meeca alya ali likumi ngowakabona aleemikanina bamaami bali likumi abo batana kutalika kweendelesha, sombi balaakupekwa nkusu shakweendelesha anga mbamaami kwaawala yomwi, pantu pomwi amunyama.

¹³ Boonse aba bali likumi balicite muyeeyo womwi alimwi balapa nkusu shabo alimwi abuleelo bwabo kumunyama.

¹⁴ Balaakulwana aMwanaambelele, sombi Mwanaambelele uyu pantu pomwi abaabo mbwaakeeta akusala alimwi bashomeka kuli nguwe, balaakukoma bamaami abo mukwiinga lakwe nguMwaami wa bamaami alimwi nguMweendeleshi wa beendeleshi.”

¹⁵ Munjelo uyu alimwi wakaŋambila ayi, “Maanshi alya ngowalinga wabona kapashiite mwanakashi mufuule uyo aleemikanina mishobo, shishi, shikanda shipusenepusene alimwi amilaka.

¹⁶ Meeca ali likumi ngowalinga wabona alimwi amunyama uyo balaakupata mwanakashi mufuule uyo. Balaakubwesa shoonse nshaacite akumufuula akacaalebo matakosha alimwi balaakulyako mubili wakwe akumutenta mumulilo.

¹⁷ Balaakucita boobo ceebo Lesa walengesha kwaamba ayi banoocita coonse ncaasuni, kwiinda mukunyumfwana kupa nkusu shabo shakweendelesha kumunyama kushikila shoonse Lesa nshaakaamba shikacitike cancinencine.

¹⁸ “Mwanakashi uyo ngowalinga wabona uleemikanina ndabala inene iyo yeendelesha bamaami boonse ba mucishi ca panshi.”