Ciyubululo 15 - Baibo Busansulushi Bwa Libuku IliBaanjelo amyaalu yamamanino 1 Lyalo ndindakalanga mwiculu, ndakabona acimwi cintu cinene abuumbi alimwi cikankamika. Pakalinga baanjelo bosanwe abobilo alimwi amyaalu yosanwe ayobilo. Myaalu iyi njeyamamanino mukwiinga bukali bwakwe Lesa mpweshi bukamanine. 2 Kuswawaawo ndakabona cakalinga kuboneka anga ndweenge lwakalinga kubeka lusenkene amulilo. Ndakabona abaabo bakakoma munyama uyo, cibumbwabumbwa cakwe alimwi awooyo ucite nambala ya keshibilo ka liina. Bakalinga kwiimfwi mweela lweenge lwakalinga kubeka, kabacatite atulumbu uto Lesa ntwaakabapa. 3 Bakalinga kwiimba lwiimbo lwakwe Mose musebenshi wakwe Lesa alimwi alwiimbo lwa Mwanaambelele ayi, “NoBaami baLesa Beshinkusu shoonse, micito yanu njinene alimwi ilakankamika abuumbi! NoBaami baLesa ba mishobo yoonse ya bantu, nshila shanu shililuleme alimwi nshalushinisho! 4 NoBaami baLesa, ngani utamuloondi akulemeka liina lyanu? Mukwiinga mwebo nweenka ndimwe Musalalite. Mishobo yoonse ilaakuyoboloka mukumulambila mukwiinga micito yanu iluleme, ilaboneka kubantu boonse.” 5 Pesule, ndakalanga akubona Ŋanda yakwe Lesa kwiculu keecalukite. Mukati mwakalinga aTente ya Cipangano. 6 Baanjelo abo bosanwe abobilo bakalinga kucite myaalu ili yosanwe ayobilo, bakaswa muŊanda yakwe Lesa, kabafwete shisani shibekabeka shituba. Pashaamba shabo bakalyaanga tweela twa golodi. 7 Mpomunyaawo cilengwa cimwi ca shilengwa shone isho shuumi, cakapa baanjelo abo bosanwe abobilo mbale shifongomene sha golodi, kashiswite bukali bwakwe Lesa muumi lyoonse alyoonse. 8 Lyalo Ŋanda yakwe Lesa yakesula bwiishi buswa kubulemu bwakwe Lesa alimwi ankusu shakwe. Taaku nabi womwi wakakonsha kwinjila muŊanda yakwe Lesa kushikila ndiyakamana myaalu ili yosanwe ayobilo yakaleta baanjelo bosanwe abobilo abo. |
Lenje Bible with Deuterocanon © Bible Society of Zambia, 2003.
Bible Society of Zambia