Ciyubululo 14 - Baibo Busansulushi Bwa Libuku Ili

Mwanaambelele abantu bakwe

¹ Lyalo ndakalangilisha akubona Mwanaambelele kaaimfwi paKalundu ka Siyoni, kaali abantu bali 144,000 abo bakalinga kulembetwe liina lyakwe alimwi alya baIshi pankumo shabo.

² Mpeeke ndakanyumfwa liswi kuswa kwiculu lyakalinga kunyumfwika anga ngamaanshi atoowoota alimwi anga ncilulumo cinene. Liswi ili lyakalinga kunyumfwika anga mbeshikulisha tulumbu baanji batoolisha.

³ Bantu aba bali 144,000 bakeemikana kunembo lya cuuna ca bwaami cakwe Lesa, shilengwa shuumi isho shone alimwi alya bamaloba. Bantu aba bakalinga kwiimba lwiimbo lupya, ulo lutacite aumwi wakalinga kukonsha kulwiiya alimwi mbobakapulushikwa mucishi ca panshi.

⁴ Mbobasankwa bakalisalasha kwiinda mukutakumana abanakashi, ncakwiila balisalalite. Balakonkela Mwanaambelele kuli koonse nkwaaya. Bakapulushikwa kuswa pabantu ba mucishi ca panshi akuba anga nshishango shitaanshi kutebulwa, isho shipekwa kuli Lesa alimwi aMwanaambelele.

⁵ Peculu lya waawo tabakwe kubecaawo, ncakwiila tabacite kampenda.

Baanjelo botatwe

⁶ Mpomunyaawo ndakabona munjelo aumwi kaauluka mwiculu mwiine mwiine. Wakalinga kucite makani abotu atamaani kwaamba ayi akashimikile bantu ba mucishi ca panshi, kubantu bacite shikanda shipusenepusene, mikowa yoonse, milaka yoonse alimwi akumishobo yoonse.

⁷ Wakoolobesha ayi, “Amulemeke akulumbaisha Lesa mukwiinga ciindi nceelete koombolosha bantu boonse cashikila! Amumulambile uyo wakalenga liculu, cishi ca panshi, lweenge alimwi atuntupu twa maanshi!”

⁸ Kwakaboneka aumwi munjelo wabili kaamba ayi, “Yawa, yawa ndabala inene ya Babiloni! Yakalengesha ayi bantu ba mishobo yoonse kunwa waini ukali wa bufuule bwa njiyo!”

⁹ Kuswawaawo, kwakaboneka munjelo watatu, kaaolobesha ayi, “Uyo woonse ulambila munyama alimwi acibumbwabumbwa cakwe akulembwa keshibilo kakwe pankumo nabi palyaansa,

¹⁰ ulaakunwa waini wa bukali bwakwe Lesa, uyo ngweshi ukatiilwe munkomeshi ya bukali bwakwe cakutatilako cakubombya bukali. Boonse bacita sheeshi balaakupenshekwa mumulilo alimwi asalufa pameenso abaanjelo basalalite alimwi aMwanaambelele.

¹¹ Mulilo ngweshi bakanoopenshelwaamo ngwamuyayaya. Abo balambila munyama alimwi acibumbwabumbwa cakwe alimwi awooyo woonse ucite keshibilo ka liina lyakwe, teshi bakacilekeewo kupenshekwa, malumwi nabi mashiku.”

¹² Nkokwaamba ayi ncibotu bashomi kutaboola pesule, abo bakonkela milawo yakwe Lesa alimwi akushomeka muli Jesu.

¹³ Lyalo ndakanyumfwa liswi kuswa kwiculu lyakwaamba ayi, “Ulembe ayi, Balicite coolwe abo beshi bakafwite mumulimo wa Mwaami kuswa sunu!” Mushimu Usalashi wakakumbula ayi, “Ncakwiila balicite coolwe! Balaakookesha kuswa kumilimo yabo iyumu mukwiinga micito yabo ilabakonkela.”

Kutebulwa kwa cishi ca panshi

¹⁴ Mpomunyaawo ndakalangilisha akubona likumbi lituba, kapashiite wakalinga kuboneka anga nguMwanaaMuntu. Kumutwi wakalinga kufwete mushini wa golodi, kaacite acicekeshi cikolete kulyaansa.

¹⁵ Mpeeke kwakesa munjelo umwi wakaswa muŊanda yakwe Lesa akoolobesha wooyo wakalinga kushiite palikumbi ayi, “Talika kusebensesha cicekeshi cako mukwiinga ciindi cakutebula cashikila. Shoonse shakutebula mucishi ca panshi shamaninina kupya!”

¹⁶ Lyalo uyo wakalinga kushiite palikumbi wakatalika kutebula acicekeshi cakwe. Aboobo cishi ca panshi coonse cakatebulwa.

¹⁷ Kuswawaawo ndakabona munjelo aumwi kaaswa muŋanda yakwe Lesa kwiculu. Alakwe wakalinga kucite cicekeshi cikolete.

¹⁸ Mpomunyaawo munjelo umwi uyo weendelesha sha mulilo, wakaswa kucipaililo. Wakoolobesha munjelo uyo wakalinga kucite cicekeshi cikolete ayi, “Sebensesha cicekeshi cako, utebule minyansa ya mumuunda wa mucishi ca panshi mukwiinga yapya!”

¹⁹ Aboobo munjelo uyo wakatalika kutimbula minyansa kuswa kushisamu sha njiyo acicekeshi cakwe akwiiwaala mucilindi cakutyaninamo minyansa ya bukali bwakwe Lesa.

²⁰ Minyansa iyo yakatyanwa momunya umo, pansengwe lya ndabala inene. Mpeeke mucilindi ico cakutyaninamo minyansa mwakaswa bulowa ubo bwakakunka makilomita ali 300 akuya panshi mpashi mamita ali 2.