Ciyubululo 12 - Baibo Busansulushi Bwa Libuku Ili

Mwanakashi alimwi ashinshimwe

¹ Mpomunyaawo kwakaboneka cintu cinene cikankamika kwiculu. Kwakalinga mwanakashi wakalinga kufwete lisuba. Panshi lya myeendo yakwe pakalinga mweenshi. Apalo pamutwi wakwe pakalinga mushini wa nyenyeenshi likumi ashobilo.

² Mwanakashi uyu wakalinga pafwaafwi akutumbuka. Mpeeke mumala ndimwakabuka, wakalila abuumbi ceebo cakucisa kunyumfwika pakutumbuka.

³ Kwakaboneka acimwi cintu cikankamika kwiculu. Kwakaboneka shinshimwe musalala pyu, kaacite mitwi yosanwe ayobilo, meeca likumi alimwi amishini pamutwi womwi awomwi.

⁴ Shinshimwe uyu wakoobola cipansha catatu ca nyenyeenshi sha mwiculu amucila wakwe akushiloshesha panshi. Kuswawaawo, wakeemikana kunembo lya mwanakashi wakalinga pafwaafwi akutumbuka kulindilila kwaamba ayi na mwaana ashalwe, eendililebo kumulya.

⁵ Mwanakashi uyu wakatumbuka mwaana musankwa uyo weshi akeendeleshe shishi shoonse ankooli ya nshimbi. Sombi mwaana uyu wakasompolwa akutolwa kwiculu kuli Lesa, uko kuli cuuna cakwe ca bwaami.

⁶ Mwanakashi lakwe wakacicila muluyanga, umo muli musena wakamubambila Lesa. Nkomunya uko ulaakulamwa kabotu kwanshiku shili cuulu amyaanda yobilo alimwi anshiiku shili makumi osanwe alyomwi.

⁷ Mpomunyaawo kwakabuka nkondo kwiculu. Mikayelo alimwi abaanjelo mbwaakalinga kweendelesha bakatalika kulwana shinshimwe. Alakwe shinshimwe abaanjelo bakwe bakalwanaabo.

⁸ Sombi shinshimwe uyu wakakomwa, lyalo lakwe alimwi abaanjelo bakwe bakakashikwa kunoocishiite kwiculu.

⁹ Lyalo shinshimwe uyu bakamuwaala panshi, njensoka ikulukulu ilya, iitwa ayi Mubiibi nabi Satana, uyo ucenjeeka bantu boonse mucishi ca panshi. Wakawaalwa panshi pantu pomwi abaanjelo bakwe boonse.

¹⁰ Kuswawaawo ndakanyumfwa liswi lyakoolobeshekwa kuswa kwiculu ayi, “Ono Lesa watupulusha! Wabonesha nkusu shakwe ayi nguMwaami. Usalitwe wakwe wabonesha nkusu shakwe. Mukwiinga uyo wakalinga kubekesha bashominyineesu malumwi amashiku kuli Lesa wesu wawaalwa panshi.

¹¹ Bamakwabesu bakamukoma kwiinda mubulowa bwa Mwanaambelele alimwi amaswi alushinisho ayo ngobakashimikila. Bakalinga kulibambite kwaaba buumi bwabo.

¹² Paceebo ceeco, sekelela webo oliculu alimwi asheesho shoonse shikalaamo! Sombi mapensho kucishi ca panshi alimwi alweenge! Mukwiinga Mubiibi wesa kuli ndimwe abukali butaambiki ceebo ulishi ayi wacaashabo ciindi ciniini.”

¹³ Ono shinshimwe uyo ndyaakabona ayi wawaalwa panshi, wakatalika kutandaanya mwanakashi uyo wakashala mwaana musankwa.

¹⁴ Mwanakashi uyo wakapekwa mapapaminwa obilo a mumbankwashi kwaamba ayi oolukile kuluyanga kumusena wakwe uko nkweshi akalamwe kabotu kwamyaaka ili yotatwe amusa, kuloonda shinshimwe.

¹⁵ Mumulomo wa nsoka iyi, mwakaswa maanshi aanji kwaamba ayi aswengule mwanakashi uyo.

¹⁶ Sombi cishi cakamucafwa mwanakashi uyo. Calo cakacaluka akumina maanshi oonse akaswa mumulomo wa shinshimwe uyo.

¹⁷ Lyalo shinshimwe uyo wakakalala ceebo ca mwanakashi uyo. Mpeeke wakaya mukulwana abamulunyungu lwa mwanakashi bamwi boonse abo bakonkela milawo yakwe Lesa alimwi akushoma bukamboni bwakwe Jesu.

¹⁸ Mpomunyaawo shinshimwe uyo wakeemikanabo muloombe lwa lweenge.