Ciyubululo 11 - Baibo Busansulushi Bwa Libuku Ili

Bakamboni bobilo

¹ Kuswawaawo ndakapekwa nkoli yakalinga kuboneka anga nkasamu kakupimishaako akulwiitwa ayi, “Koya ukapime Ŋanda yakwe Lesa acipaililo alimwi akubelenga bantu batoolambililaamo.

² Sombi utapimi musena uli kunsengwe lya Ŋanda yakwe Lesa mukwiinga wakapekwa kubaswamashi bakunsengwe, abo mbweshi bakalyatoole Ndabala inene Isalalite kwamyeenshi ili makumi one alimwi ayobilo.

³ Ndaakutuma bakamboni bangu bobilo abo beshi bakanoofwete masaka kwisa mukumushimikila makani akwe Lesa kwanshiku shili cuulu amyaanda yobilo alimwi amakumi osanwe alyomwi.”

⁴ Bakamboni bobilo aba, nsheshisamu shobilo sha olifi alimwi amalampi obilo shiimikana kunembo lya Mwaami wa mucishi ca panshi.

⁵ Na umwi weelesha kwaamba ayi abaciise, mumilomo yabo mulaswa mulilo uyo unyonyoola balwani babo. Nkokwaamba ayi uyo woonse weelesha kubacisa, ulacaikwa munshila njemunya iyi.

⁶ Bakamboni aba balicite nkusu shakushinka mwiculu, kwaamba ayi mfula italoki munshiku nshebatooshimikila makani akwe Lesa. Balicite nkusu shakusandula tuntupu twa maanshi ayi tube bulowa alimwi ankusu shakuleta mwaalu uli woonse mucishi ca panshi ciindi cili coonse ncebasuni.

⁷ Na bakamanishe kushimikila makani ayo, cinyama cilya ciswa mucilindi citeeli cilaakulwanaabo. Cilaakubakoma alimwi akubacaya.

⁸ Mpeeke mituntu yabo ilaakunoolibo munshila sha ndabala inene umo mwakapopelwa Mwaami wabo pamucilingano. Liina liimikanina ndabala iyo mumaamboolwa, nguSodoma nabi Ijipiti.

⁹ Bantu baswa mumishobo yoonse, mikowa yoonse, milaka yoonse alimwi ashikanda shipusenepusene balaakweebela mituntu yabo kwanshiku shili shotatwe amusa, teshi bakasumine ayi ibikwe mushuumbwe.

¹⁰ Bantu ba mucishi ca panshi balaakusangalala ceebo ca lufu lwa bakamboni bobilo aba. Balaakusekelela akupaana shipo mukwiinga balaluki bobilo aba bakaleta mapensho anene abuumbi kubantu.

¹¹ Ono ndipakeenda nshiku shotatwe amusa, muuya upa buumi wakaswa kuli Lesa akwinjila muli mbabo. Mpomunyaawo bakabuka, beemikana, lyalo boonse bakababona bakaloonda abuumbi.

¹² Mpeeke balaluki bobilo abo bakanyumfwa liswi lyakoolobeshekwa kuswa kwiculu lyakubeeta ayi, “Amwise kokuno!” Balwani babo kabeebela, bakaya kwiculu mulikumbi.

¹³ Paciindi ncemunya ici, kwakaba citentanshi cinene abuumbi. Mpeeke cipansha calikumi ca ndabala inene cakanyonyooka alimwi abantu bali 7,000 bakafwa. Lyalo bantu boonse bakacaala bakaloonda abuumbi akutalika kulumbaisha Lesa wa kwiculu ceebo ca nkusu shakwe.

¹⁴ Lipensho lyabili lyamana, sombi lipensho lyatatu lilibo pafwaafwi kucitika!

Lupeenga lwasanu aobilo

¹⁵ Kuswawaawo munjelo wasanu abobilo wakalisha lupeenga lwakwe. Lyalo kwakanyumfwika maswi akoolobeshekwa kuswa kwiculu ayi, “Nkusu shakweendelesha cishi shili mumaansa a Mwaami Lesa aUsalitwe wakwe alimwi balaakweendelesha kwamuyayaya!”

¹⁶ Mpomunyaawo bamaloba bali makumi obilo abone, abo bekala pashuuna shabo sha bwaami kunembo lyakwe Lesa, bakafukama cakishisha shiwa panshi akulambila Lesa.

¹⁷ Bakaamba ayi, “Nkambo nobaLesa Beshinkusu shoonse, ndimwe muliiwo alimwi mweshi mukabeewo. Twamulumba mukwiinga mwasebensesha nkusu shanu shinene akutalika kweendelesha.

¹⁸ Bantu bakunsengwe bakakalala abuumbi, ono ciindi cakubonesha bukali bwanu aciindi cakoombolosha bafu cashikila. Ee, ciindi cakupa shilambu kubasebenshi banu, balaluki alimwi abantu banu boonse abo bamulemeka, bantubo alimwi abalemekwa boonse cashikila. Ciindi cashikila cakwaamba ayi munyonyoole baabo boonse banyonyoola cishi ca panshi!”

¹⁹ Mpomunyaawo Ŋanda yakwe Lesa yakacaluka kwiculu, aLibokoshi lya Cipangano lyakaboneka nkomunya uko. Lyalo kwakatalika kubeka kwa mfula, kunyumfwika ciyobeyobe alimwi ashilulumo. Kwakaba citentanshi alimwi amfuula ya mabwe inene.