Bene Loma 7 - Baibo Busansulushi Bwa Libuku Ili

Cikoshanyo ca pacikwati

¹ Nobamakwesu, ntokwaamba kuli baabo beshi shaMilawo. Mulishi kabotu kwaamba ayi Milawo ileendeleshabo muntu kaacili muumi.

² Atwaambe bobulya, mwanakashi weebetwe uleendeleshekwa amulawo wa cikwati kulilabo ibaye kaatana kufwa. Sombi na wafwa, mwanakashi ulaangululwa kumulawo uyo.

³ Paceebo ceeco na mwanakashi weebetwe wakumana amusankwa umwi ibaye kaacili muumi, nkokwaamba ayi wacita bulale. Sombibo na ibaye wafwa mwanakashi ulaangululwa kumulawo wa cikwati. Aboobo na weebwa kumusankwa umwi teshi kucita bulale.

⁴ Mbocibete akuli ndimwe nobamakwesu. Kweelana amakani aMilawo mwebo mwakafwa akuba shipansha sha mubili wakwe Klistu, uyo wakabushikwa kuswa kubafu kwaamba ayi tusebensele Lesa milimo ibotu.

⁵ Ceebo nditwakalinga kwikala mubuumi bwa buntu, kuyandishisha kubisha uko kwakayuminishikwa aMilawo, kwakalinga kweendelesha buumi bwesu. Aboobo kwakatuletela lufu.

⁶ Ono Lesa wakatwaangulula kuswa kuMilawo mukwiinga twakafwa kuli njiyo yakalinga kutwaangite. Aboobo mubwikaalo bukulukulu bwakukonkelabo Milawo ilembetwe twakaswaamo, bulya Mushimu Usalashi ngootucafwa kusebensela Lesa munshila ipya.

Shamilawo ashabubi

⁷ Ino ono twaambe buyani? Sa twaambe ayi Milawo njibiibi? Sobwe, tabwishi mbocibete ubo! Sombi njiMilawo yakalengesha ayi nshibe bubi. Nikuteshi Milawo yaamba ayi, “Utabi amunyono pashintu sha mubyo”, naakwiinga nshishibiiwo lunkumbwa lwa mushobo uyu.

⁸ Sombi kwiinda muMilawo iyi, bubi bwakacana nshila yakulengesha miyeeyo yakukumbwa shintu shimwi shoonse muli ndime. Ceebo na taaku Milawo, bubi tabucite nkusu.

⁹ Kaantana kwishiba bwaamba Milawo ndakalinga muumi, sombi ndindakeshiba shaMilawo kuyandishisha kubisha kwakakomena, kweelana ambocibete ndakafwa.

¹⁰ Mpeeke Milawo yakalinga kweelete kuletela bantu buumi, nebo yakandetela lufu.

¹¹ Ceebo bubi bwakacana nshila muMilawo alimwi kwiinda muMilawo bwakambeca akuncaya.

¹² Nkokwaamba ayi Milawo ilisalalite alimwi mulawo uli woonse ulisalalite, uliluleme alimwi uli kabotu.

¹³ Sa ici cilaamba ayi cintu cibotu ici ncecakanengesha ayi mfwe? Sobwe! Sombi mbubi bwakalengesha kwiinda mukusebensesha cintu cibotu ico kwaamba ayi bubi buboneke mbuli mbobubete. Aboobo kwiinda muMilawo bubi bulabicila limwi.

Inkondo icitika mumuntu

¹⁴ Tulishi kwaamba ayi Milawo yakaswa kuli Lesa. Sombi nebo ndimuntu alimwi ndimusha wa bubi.

¹⁵ Nshishi na nciinshi nceencita ceebo nshiciti ceeco nceensuni ayi ncite, sombi ndacita ceeco nceempatite.

¹⁶ Ono mukwiinga ndacita ceeco ncentasuni kucita, nkokwaamba ayi Milawo ililuleme.

¹⁷ Aboobo teshi ndime ncita cintu ici, sombi mbubi ubo buli muli ndime.

¹⁸ Ndishi kwaamba ayi moyo wangu tookoonshi kunengesha kucita cintu cibotu mubuumi bwa buntu. Nakubi kwaamba ayi ndisuni kucita cintu cibotu, sombi ndaalilwa kucicita.

¹⁹ Nshiciti cintu cibotu ico nceensuni kucita, sombi ndacita bubi mbontasuni kucita.

²⁰ Na kaancita cintu nceentasuni kucita, nkokwaamba ayi teshi ndime nemwiine neentoocicita, sombi mbubi ubo buli muli ndime.

²¹ Aboobo ndacana kwaamba ayi cicitika muli ndime na ntooyanda kucita cintu cibotu, nkusalabo bubi.

²² Ndakondwa amoyo wangu woonse ceebo ca Milawo iswa kuli Lesa.

²³ Sombi ndishi kwaamba ayi muli ndime muli mulawo uyo utasuni miyeeyo yangu. Mulawo umwi uyo ukonkela nshila ya bubi ngowalengesha ayi mbe musha wa bubi.

²⁴ Maawe akomena mapensho! Anu ngani eshi akamfuneeko kubuumi ubu butoontola kulufu?

²⁵ Aalumbwe Lesa eshi akamfuune kwiinda muli Jesu Klistu Mwaami wesu! Anu mbulya mboombete, nebo nemwiine ndisuni kukonkela Milawo yakwe Lesa, sombi kwiinda mulunkumbwa ndakonkela mulawo untola kububi.