Bene Loma 6 - Baibo Busansulushi Bwa Libuku Ili

Tulicite buumi muli Klistu

¹ Ino twaambe buyani? Sa tutolelele kubisha kwaamba ayi luse lwakwe Lesa lufulileeko?

² Sobwe napaceyi! Kweelana amakani abubi swebo twakafwa, ono inga twatolelela buyani kwikala mububi?

³ Sa tamwishi kwaamba ayi swebo soonse nditwakabombekwa twakaba womwi aJesu Klistu? Kwiinda mukubombekwa uko twakaba womwi anguwe mulufu lwakwe.

⁴ Aboobo kwiinda mukubombekwa kwesu, cili anga twakafwa akufukilwa pantu pomwi anguwe kwaamba ayi bweenka Jesu Klistu mbwaakabushikwa kuswa kubafu kwiinda mubulemu bwa nkusu sha baIshi, aswebo twikale mubuumi bupya.

⁵ Ono na twakaba womwi anguwe mulufu lwakwe, mbweeke ubo tulaakuba womwi anguwe kwiinda mukubushikwa kwakwe kuswa kubafu.

⁶ Tulishi kwaamba ayi buumi bwesu bukulukulu bwakaloba Jesu ndyaakapopwa pamucilingano kwaamba ayi Lesa anyonyoole buumi bwesu bwakusuna kubisha kwaamba ayi tutabi lyobilo basha ba bubi.

⁷ Ceebo muntu na wafwa, ulaangululwa munkusu sha bubi.

⁸ Ono na twakafwa aKlistu, tulashoma kwaamba ayi tulaakuba abuumi pantu pomwi anguwe.

⁹ Tulishi kwaamba ayi Jesu Klistu wakabushikwa kuswa kubafu alimwi teshi akafweewo. Aboobo lufu talucite nkusu alimwi pali nguwe.

¹⁰ Ono mukwiinga wakafwa linkanda lyomwibo, bubi tabucite nkusu pali nguwe. Ono buumi bwakwe boonse mbwamuli Lesa.

¹¹ Mbweeke ubo amwebo mulyeelete kunooyeeya ayi mulifwite munkusu shakubisha, sombi mulekala mubuumi bwakusangalasha Lesa kwiinda muli Klistu Jesu.

¹² Paceebo ceeco mutasuminishi bubi kweendelesha mibili yanu iyo ifwa kwaamba ayi mukonkele shiyanda mibili yanu nobeene.

¹³ Mutasuminishi cipansha ca mubili wanu nabi comwi kububi ayi cibe citabatisho ca shibiibi, sombi amulyaabe kuli Lesa mbuli bantu bakalinga kufwite, sombi Lesa wabapa buumi. Mulyeelete kulyaaba kuli Lesa kwaamba ayi amusebenseshe mukucita shiluleme.

¹⁴ Nkokwaamba ayi tamweelete kusuminisha bubi ayi bumweendeleshe ceebo ceendelesha buumi bwanu teshi Milawo, sombi nduse lwakwe Lesa.

Tuli basha ba bululami

¹⁵ Ino ono cili buyani cikani ici? Sa tunoobishabo ceebo tatweendeleshekwi aMilawo, sombi aluse lwakwe Lesa? Kulaalebo!

¹⁶ Mulishi kabotu kwaamba ayi na muntu walibenga kuba musha wa muntu umwi, ulyeelete kunoomunyumfwila. Nkokwaamba ayi na muli basha ba bubi mulaakufwa. Na mulanyumfwila Lesa, ulaakumululamika pameenso akwe.

¹⁷ Ono tulyeelete kulumba Lesa ceebo pakutaanguna mwakalinga basha ba bubi. Ono bulya mulanyumfwila Lesa amyoyo yoonse kwiinda mukukonkela shalushinisho nshemwakeeishikwa.

¹⁸ Bulya mwakaangululwa munkusu sha bubi akuba basha ba bululami.

¹⁹ Amuleke nsebenseshe cikoshanyo ca shintu shicitika lyoonse kwaamba ayi munyumfwishe. Pakutaanguna mwakalinga mwalibenga nobeene amyoyo yanu yoonse kwaamba ayi mube basha ba shintu shitasalalite alimwi ashibiibi shimwi shoonse. Mbweeke ubo mulyeelete kulibenga amyoyo yoonse kuba basha ba bululami, nkokwaamba ayi kucita shintu shisalalite.

²⁰ Ndimwakalinga basha ba bubi, temwakalinga kusebensela bululami.

²¹ Ino ono nimpindunshi njemwakacana mukucita shintu isho shitoomulensha nsoni bulya? Taakuuwo. Mukwiinga mamanino a shintu sha mushobo wooyo ndufu.

²² Ono bulya mwakaangululwa kuswa kububi, muli basha bakwe Lesa. Mpindu yanu mbuumi bululeme ubo buletela buumi butamaani.

²³ Ceebo cilambu ca bubi ndufu, sombi cipo cakwe Lesa mbuumi butamaani kwiinda muli Klistu Jesu Mwaami wesu.