Bene Lefi 9 - Baibo Busansulushi Bwa Libuku Ili

Aloni mbwaakabenga milambu

¹ Ono pabushiku bwakaboolaawo ndibakamana kusekelela, Mose wakeeta Aloni abana bakwe basankwa alimwi abamaloba ba bene Isilaeli.

² Wakaambila Aloni ayi, “Ubwese mucende mwaana alimwi ambelele isankwa shoonse shobilo shitacite kampenda kali koonse akushibenga kuMwaami Lesa. Mucende mwaana ngwamulambu wakulekelelwa shibiibi, mbelele isankwa njamulambu wakutenta.

³ Lyalo ulwiite bene Isilaeli ayi babwese mpongo isankwa ibe mulambu wakulekelelwa shibiibi, mwanaaŋombe ucite mwaaka womwi, alimwi amwanaambelele ucite mwaaka womwi boonse bobilo batacite kampenda kali koonse ayi babe mulambu wakutenta,

⁴ kubikaawo amucende alimwi ambelele isankwa ayi shibe mulambu wa bwanabwankashi. Balyeelete kushibenga kuMwaami Lesa pantu pomwi acipo ca fulaulo cisenkene amafuta. Balyeelete kucita shoonse isho ceebo Mwaami Lesa utoobonekela kuli mbabo sunu.”

⁵ Mpeeke shoonse Mose nshaakabaambila bakashileta kunembo lya Tente ya Cipangano, abalo bene Isilaeli boonse bakabungana peenka apo ayi balambile Mwaami Lesa.

⁶ Lyalo Mose wakaamba ayi, “Mwaami Lesa walasha ayi mucite shoonse ishi kwaamba ayi bulemu bwakwe buboneke kuli ndimwe.”

⁷ Kuswawaawo wakaambila Aloni ayi, “Koya kucipaililo ukabenge mulambu wakulekelelwa shibiibi alimwi amulambu wakutenta ayi milambu iyo ikushe shibiibi shako ashibiibi sha bantu boonse. Benga mulambu uyu ayi shibiibi sha bantu shikushikwe, bweenka bwakaamba Mwaami Lesa.”

⁸ Mpomunyaawo Aloni wakaya kucipaililo, akucaya mucende mwaana uyo wakalinga mulambu wakulekelelwa shibiibi shakwe.

⁹ Abalo bana bakwe bakamuletela bulowa, umo mwaakasumpa munwe wakwe, bumwi bulowa wakabubika pameeca a mumakonko a cipaililo. Wakatila bulowa boonse bwakacaala panshi pacipaililo.

¹⁰ Lyalo pacipaililo wakatentawo mafuta a mulambu wakulekelelwa shibiibi, insa alimwi acipansha cibotu ca lini, kweelana aMwaami Lesa mbwaakaambila Mose.

¹¹ Sombi nyama alimwi acipaya, wakashitentela pansengwe ya misumba.

¹² Pesule wakacaya munyama ayi ngumulambu wakutenta waakwe mwiine. Bana bakwe bakamuletela bulowa ubo mbwaakasanseela mumbasu shone shoonse sha cipaililo.

¹³ Bakamutambika mutwi alimwi ashipansha shimwi sha munyama, mpeeke wakashitentela pacipaililo.

¹⁴ Kuswawaawo wakasansha shamukati alimwi amyeendo, akushitentela pacipaililo, peculu lya mulambu wakutenta.

¹⁵ Ndyaakamanisha, wakabengela bantu mulambu. Wakabwesa mpongo ya mulambu wa bantu wakulekelelwa shibiibi, weecaya akwiibenga, bweenka mbwaakabenga mulambu wakwe wakulekelelwa shibiibi.

¹⁶ Wakaleta amunyama wa mulambu wakutenta, akumubenga kweelana amilawo.

¹⁷ Pesule wakapa cipo ca fulaulo akutapulawo lupaka lwa fulaulo alimwi akuutenta pacipaililo. Uku kwakalinga nkwiilika pamulambu wakutenta wa nshiku shoonse.

¹⁸ Lyalo wakacaya mucende ambelele isankwa ayi ngumulambu wa bantu wa bwanabwankashi. Abalo bana bakwe bakamuletela bulowa ubo mbwaakasanseela mumbasu shone shoonse sha cipaililo.

¹⁹ Aloni wakabika mafuta a mucende alimwi ambelele isankwa

²⁰ peculu lya shipansha sha ntiti, akushitola kucipaililo shoonse. Wakatenta mafuta pacipaililo

²¹ akutambeeka ntiti amyeendo yakatako yakululyo kunembo lya Mwaami Lesa ayi ngumulambu wakutambeeka, kweelana abwakamwaambila Mose.

²² Ono Aloni ndyaakamana kubenga milambu yoonse, wakatandabika maansaakwe pabantu akubapa coolwe, lyalo wakaswaawo.

²³ Mpomunyaawo Mose aAloni bakenjila muTente ya Cipangano. Ndibakaswaamo, bakapa coolwe bantu, mpeeke bulemu bwa Mwaami Lesa bwakabonekela kubantu boonse.

²⁴ Paciindi ceenka ico, Mwaami Lesa wakatuma mulilo pamulambu wakutenta alimwi ashipansha sha mafuta pacipaililo ayi shipye. Bantu ndibakabona boobo, boonse bakoolobesha cakukondwa akufukama cakushisha shiwa panshi.