Bene Lefi 8 - Baibo Busansulushi Bwa Libuku Ili

Aloni abana bakwe basankwa mbobakabikwa mubupailishi

¹ Mpomunyaawo Mwaami Lesa wakaambila Mose ayi,

² “Tola Aloni abana bakwe basankwa kumulyango wa Tente ya Cipangano. Ulete shakufwala shabo sha bupailishi, mafuta akunanika, mucende mwaana wa mulambu wakulekelelwa shibiibi, mbelele shisankwa shobilo alimwi amutaanga wa shimaande.

³ Kuswawaawo wiite bene Isilaeli boonse babungane nkomunya uko.”

⁴ Mose wakacita kweelana abwakamwaambila Mwaami Lesa. Ono bene Isilaeli ndibakabungana,

⁵ Mose wakabaambila ayi, “Ono ntoyanda kucita ceeco ncaakaŋambila Mwaami Lesa.”

⁶ Mpeeke Mose wakaleta Aloni alimwi abana bakwe basankwa, akubalwiita ayi basambe amaanshi.

⁷ Lyalo wakafwalika Aloni mwinjila alimwi amungaanjo akuwaanga alaamba mubukome. Wakamufwalika aefodi, akwiicatanya alaamba wa njiyo uyo wakatungwa kabotu.

⁸ Wakamufwalika cakufwala pacaamba akubikawo Ulimu alimwi aTumimu muli ncico.

⁹ Wakamufwalika cisani cakumutwi, kunembo wakabikako keela ka golodi ako kakalinga keshibilo kasalalite kakubengwa, kweelana aMwaami Lesa mbwaakaambila Mose.

¹⁰ Pesule Mose wakabwesa mafuta akunanika, akwaabika paTente ya Cipangano alimwi ashintu shoonse shakalingaamo. Mukucita boobo, shoonse wakashibenga kuMwaami Lesa.

¹¹ Wakabwesa mafuta amwi akwaasanseela mankanda osanwe aobilo pacipaililo ashintu sha ncico, alimwi ambale ifongomene acapanshi ca njiyo kwaamba ayi ashibenge kuMwaami Lesa.

¹² Lyalo wakabika Aloni pabupailishi kwiinda mukumutila mafuta akunanika amwi pamutwi.

¹³ Kuboolaawo, Mose wakaleta bana bakwe Aloni basankwa kunembo akubafwalika minjila, balaamba mumakome alimwi akubaangilila shisooti kumitwi, kweelana aMwaami Lesa mbwaakaambila Mose.

¹⁴ Mpeeke Mose wakaleta mucende mwaana ayi ngwa mulambu wakulekelelwa shibiibi. Lyalo Aloni alimwi abana bakwe basankwa bakabika maansaabo pamutwi wa mucende.

¹⁵ Mose wakacaya mucende uyo, wabwesa bulowa bumwi akusebensesha munwe wakwe pakunanika kumeeca a mumakonko one a cipaililo, kwaamba ayi acibenge kuMwaami Lesa. Bulowa bumwi boonse wakabutila panshi lya cipaililo. Munshila iyi wakacibenga alimwi akucisalasha.

¹⁶ Mpomunyaawo Mose wakabwesa mafuta oonse a kushamukati, cipansha cibotu ca lini, alimwi ansa shobilo amafuta a nshisho, akushitentela pacipaililo.

¹⁷ Pesule wakabwesa shakacaalaako kumucende uyo, kubikaawo acipaya cakwe, nyama alimwi amala, akushitentela pansengwe lya misumba, kweelana aMwaami Lesa mbwaakaambila Mose.

¹⁸ Kuswawaawo Mose wakaleta mbelele isankwa ya mulambu wakutenta, lyalo Aloni abana bakwe basankwa bakabika maansaabo pamutwi wa njiyo.

¹⁹ Mose wakeecaya akusanseela bulowa mumbasu shone shoonse sha cipaililo.

²⁰ Mbelele isankwa ilya wakeetimboola shipansha shipansha, akutenta mutwi, shipanshi shimwi isho alimwi amafuta.

²¹ Mpeeke wakasansha shamukati alimwi amyeendo mumaanshi akutenta shipansha shimwi shoonse sha mbelele pacipaililo ayi ngumulambu wakutenta, bweema bubotu busangalasha Mwaami Lesa. Uyo wakalinga ngumulambu wa shakulya, kweelana aMwaami Lesa mbwaakaambila Mose.

²² Kuboolaawo Mose wakaleta mbelele yabili isankwa ayi njapakubika bantu pabupailishi. Lyalo Aloni abana bakwe basankwa bakabika maansaabo pamutwi wa njiyo.

²³ Mose wakeecaya akubwesa bulowa bumwi wabunanika kukapansha ka panshi ka kutwi wakwe Aloni wakululyo, kucikumo cinene ca kulyaansa lyalulyo, alimwi akucikumo cinene ca kumweendo walulyo.

²⁴ Kuswawaawo, wakaleta bana bakwe Aloni basankwa kunembo akubananika bulowa bumwi kutupansha twa panshi twa matwi abo akululyo, kushikumo shinene sha kumaansa alulyo, alimwi akushikumo shinene sha kumyeendo yakululyo. Lyalo Mose wakasanseela bulowa bumwi boonse mumbasu shone shoonse sha cipaililo.

²⁵ Wakabwesa mafuta, mucila ucite mafuta, mafuta afweka kushamukati, cipansha cibotu ca lini, insa shobilo amafuta a nshisho alimwi amweendo wakululyo wakatako.

²⁶ Ndyaakamana kucita boobo, wakabwesa cimaande comwi kuswa mumutaanga wa shimaande shakabengwa kuMwaami Lesa, cimaande comwi cakapangwa amafuta, alimwi acimaande cipampamene comwi akushibika peculu lya mafuta alimwi amweendo wakululyo wakatako.

²⁷ Shakulya shoonse ishi wakashitambika Aloni abana bakwe basankwa, abo bakashitambeeka kunembo lya Mwaami Lesa ayi ncipo cakutambeeka.

²⁸ Pesule Mose wakabwesa shakulya shoonse isho kuswa kuli mbabo akushitentela pacipaililo peculu lya mulambu wakutenta, ayi ngumulambu wapakubika bantu pabupailishi. Uyo wakalinga mulambu wa cakulya alimwi bweema bwa nguwo bwakasangalasha Mwaami Lesa.

²⁹ Wakabwesa ntiti akwiitambeeka kunembo lya Mwaami Lesa ayi ncipo cakutambeeka. Ico cakalinga cipansha cakwe Mose kuswa kumbelele isankwa yapakubika bantu pabupailishi. Anu Mose wakacita shoonse kweelana aMwaami Lesa mbwaakaambila Mose.

³⁰ Kuswawaawo Mose wakabwesa mafuta akunanika alimwi abulowa bumwi bwakalinga pacipaililo, akubusanseela pali Aloni, bana bakwe basankwa alimwi apashakufwala shabo boonse. Munshila iyo wakabenga mbabo alimwi ashakufwala shabo kuMwaami Lesa.

³¹ Mpeeke Mose wakaambila Aloni abana bakwe basankwa ayi, “Amutole nyama iyi kumulyango wa Tente ya Cipangano, mwiiteleke akwiilya nkomunya uko, pantu pomwi ashimaande shili mumutaanga wa milambu ya pakubika bantu pabupailishi, kweelana abwakaamba Mwaami Lesa.

³² Mutente shoonse sheshi shicaaleewo, nkokwaamba ayi nyama ashimaande.

³³ Tamweelete kuswa kumulyaango wa Tente ya Cipangano kwanshiku shosanwe ashobilo, kushikila kusekelela kwanu kwakubikwa pabupailishi kukamaane.

³⁴ Mwaami Lesa ngowakatulwiita ayi tucite ceeci ncetwacita sunu, kwaamba ayi tukushe shibiibi shanu.

³⁵ Mulyeelete kunooshiite pamulyango wa Tente ya Cipangano malumwi amashiku kwanshiku shili shosanwe ashobilo akucita caamba Mwaami Lesa. Na mukabule kucita boobo, mulaakufwa. Anu Mwaami Lesa mbwaakandwiita ubo.”

³⁶ Aboobo Aloni alimwi abana bakwe basankwa bakacita shoonse shakabaambila Mwaami Lesa kwiinda muli Mose.