Bene Lefi 6 - Baibo Busansulushi Bwa Libuku Ili

¹ Lyalo Mwaami Lesa wakaambila Mose ayi,

² “Mulambu ulyeelete kupekwa na umwi wabisha alimwi akubula kushomeka kuli ndime neMwaami Lesa kwiinda mukukaka kuboosha ceeco cakamupa mwine Isilaelinyina ayi alame, kwiipila mubye, kumucenjeeka,

³ nabi kubeca pacimwi cintu cakalinga kusowekete akulumbila ayi taakwe kucibwesa.

⁴ Ono na wabisha munshila iyi akucaninwa mulandu, ulyeelete kuboosha ncaakeepa nabi kubwesa mukucenjeeka, nabi ceeco ncaakapekwa ayi alame, nabi ceeco cakalinga kusowekete ncaakabwesa,

⁵ nabi cintu cili coonse ncaakalumbililawo cakubeca. Ulyeelete kulipila shoonse shiyandika, akwiilikawo comwi ca shosanwe ca sheesho shintu kumwiine pabushiku bwakubenga mulambu wakumana mulandu.

⁶ Ulyeelete kuleta mbelele isankwa itacite kampenda kali koonse kumupailishi ayi ngumulambu wakumana mulandu kuli ndime neMwaami Lesa. Bubotu bwa njiyo bulyeelete kwishibwa kweelana acipimo cakasuminishikwa.

⁷ Mupailishi ulaakubenga mulambu wa cibiibi ca muntu uyo, aboobo ulaakulekelelwa.”

Milambu yakutenta

⁸ Lyalo mwaami Lesa wakaambila Mose ayi,

⁹ “Lwiita Aloni alimwi abana bakwe ayi iyi njimilawo ya milambu yakutenta. Mulambu wakutenta ulyeelete kucaala pacipaililo mashiku oonse, awalo mulilo ulyeelete kubucesha koonyaka.

¹⁰ Mpeeke mupailishi weenga kaafwete mungaanjo wa cisani citeshimite alimwi akaputula ka mukati ka cisani citeshimite, ulaakukushawo milota ya mulambu wakutenta icaala pacipaililo akwiibika palubasu lwa ncico.

¹¹ Kuswawaawo ulaakufwala shakufwala shimwi akukusha milota iyo pansengwe lya misumba akwiitola kumusena usalalite kweelana amilawo.

¹² Mulilo pacipaililo ulyeelete kunoonyakabo, taweelete kushimika sobwe. Lyoonse macuunsa, mupailishi ulyeelete kubikawo nkuni, kubikawo mulambu wakutenta alimwi akutenta mafuta a mulambu wa bwanabwankashi.

¹³ Anu mulilo ulyeelete kunoonyakabo lyoonse pacipaililo, taweelete kushimika, sobwe.

Shipo sha fulaulo

¹⁴ “Iyi njimilawo ya pacipo ca fulaulo. Bana bakwe Aloni bapailishi balaakucipa kunembo lyangu neMwaami Lesa nkokwaamba ayi kunembo lya cipaililo.

¹⁵ Kuswawaawo ulaakutapula lupaka lwa fulaulo usenkene amafuta, alimwi atununkila kabotu tuliiwo, akushitentela pacipaililo kwaamba ayi cibe cishibilo kwaamba ayi shoonse shapekwa kuli ndime neMwaami Lesa. Anu bweema bwa cipo ico bulansangalasha neMwaami Lesa.

¹⁶ Lyalo bapailishi balaakulya shoonse sheshi shikacaaleewo. Balaakupanga cimaande ico nceshi bakalite mumusena usalalite nkokwaamba ayi mulubansa lwa Tente ya Cipangano,

¹⁷ Tabeelete kupangisha acimena. Nebo neMwaami Lesa ndabapa ayi ncakulya cabo kuswa kucipo ca shakulya. Cipo ico cilisalalite abuumbi, bweenka mbuli milambu yakulekelelwa shibiibi alimwi amilambu yakumana milandu.

¹⁸ Mumyaaka yoonse ili kunembo baana basankwa bamulunyungu lwakwe Aloni balyeelete kunoolya cakulya ici, ayi abalo nceshi cikanoolibo cinebo kuswa kushakulya shipekwa kuli ndime neMwaami Lesa. Uyo woonse weenga wakumya kucipo ca shakulya ulaakucisikwa ceebo cipo ico cilisalalite.”

¹⁹ Mpomunyaawo Mwaami Lesa wakaambila Mose ayi,

²⁰ “Ici ncipo Aloni abana bakwe ncebeelete kupa ndime neMwaami Lesa bushiku mbobabikwa pabupailishi. Womwi awomwi ulyeelete kupa kilogilamu yomwi ya fulaulo, nkokwaamba ayi uunji bweenka mbuli cipo ca fulaulo cipekwa nshiiku shoonse, musa umwi macuunsa, awalo umwi macolesha.

²¹ Fulaulo uyu ulyeelete kusenkanishikwa amafuta alimwi akukangwa paceela ciselebete. Kuswawaawo ukakomoonwe akupekwa ayi ncipo ca fulaulo, bweema busangalasha Mwaami Lesa.

²² Anu mumyaaka yoonse ili kunembo, mupailishi munene woonse wa mulunyungu lwakwe Aloni ulyeelete kupa cipo ico. Cipo ico cilaakutentwa coonse kwaamba ayi cibengwe kuli ndime neMwaami Lesa.

²³ Taaku cipansha nabi comwi ca cipo ca fulaulo ico mupailishi ncaapa ceelete kulikwa. Coonsebo cilyeelete kutentwa.”

Milambu yakulekelelwa shibiibi

²⁴ Mpomunyaawo Mwaami Lesa wakaambila Mose ayi,

²⁵ “Lwiita Aloni alimwi abana bakwe basankwa ayi iyi njimilawo ya pamilambu yakulekelelwa shibiibi. Munyama wa mulambu wakulekelelwa shibiibi ulaakucailwa kunembo lya Mwaami Lesa, uko kucailwa banyama ba milambu yakutenta. Mulambu uyo ulisalalite abuumbi.

²⁶ Mupailishi utoobenga munyama, ulyeelete kulita nyama iyo mumusena usalalite nkokwaamba ayi mulubansa lwa Tente ya Cipangano.

²⁷ Muntu woonse nabi cintu cimwi coonse na shakumya kunyama iyi, shilaakucisikwa ceebo nyama iyi ilisalalite. Na pacakufwala pasamfukila bulowa bwa munyama, cakufwala ico cilyeelete kucapilwa mumusena usalalite.

²⁸ Nongo yoonse mweenga mwatelekelwa nyama, ilyeelete kupwaikwa, na ngumupika wa bulonse wasebenseshekwa, ulyeelete kukutulwa akusukulushikwa mumaanshi.

²⁹ Musankwa woonse wa mumikowa ya bupailishi inga walya mulambu uyu mukwiinga ulisalalite abuumbi.

³⁰ Sombi na bulowa bwa munyama umwi bwaletwa muTente ya Cipangano akusebenseshekwa mukukusha shibiibi muMusena Usalalite, munyama uyo teelete kulikwa, sombi ulyeelete kutentwa.”