Bene Lefi 3 - Baibo Busansulushi Bwa Libuku Ili

Cipo ca bwanabwankashi

¹ “Ono na umwi muntu wapa ŋombe yakwe ayi ncipo ca bwanabwankashi kuli ndime neMwaami Lesa, ulyeelete kuba mucende nabi mpwishi itacite kampenda kali koonse.

² Muntu uyo ulaakubika maansaakwe pamutwi wa munyama akumucaila pamulyango wa Tente ya Cipangano. Kuswawaawo bana bakwe Aloni bapailishi balaakusanseela bulowa mumbasu shoonse shone sha cipaililo.

³ Lyalo ulyeelete kupa nebo neMwaami Lesa ayi ncipo ca shakulya kuli ndime, shipansha sha munyama ishi. Mafuta oonse a shamukati,

⁴ insa shoonse shobilo amafuta a nshisho alimwi acipansha cibotu ca lini.

⁵ Lyalo shoonse ishi bapailishi balaakushitentela pacipaililo, kubikaawo amilambu yakutenta. Bweema bwa mulambu uyo bulansangalasha neMwaami Lesa.

⁶ “Ono na nimbelele nabi mpongo itoopekwa kuli ndime neMwaami Lesa ayi ncipo ca bwanabwankashi, inga yababo isankwa nabi yanakashi, sombi tayeelete kuba akampenda kali koonse.

⁷ Na muntu wapa mbelele,

⁸ ulyeelete kubika lyaansa lyakwe pamutwi wa njiyo, akwiicaya kunembo lya Tente ya Cipangano. Mpeeke bana bakwe Aloni bapailishi balaakusanseela bulowa bwa njiyo mumbasu shoonse shone sha cipaililo.

⁹ Lyalo ulyeelete kupa nebo neMwaami Lesa ayi ncipo ca shakulya kuli nguwe, shipansha sha munyama ishi. Mafuta a njiyo, mucila woonsebo ucite mafuta kutimbwitabo pafwaafwi amusana, mafuta oonsebo ali kushamukati,

¹⁰ insa shoonse shobilo amafuta a nshisho, alimwi acipansha cibotu ca lini.

¹¹ Lyalo shoonse ishi mupailishi ulaakushitentela pacipaililo ayi ncipo ca shakulya kuli ndime neMwaami Lesa.

¹² “Na muntu wapa mpongo,

¹³ ulyeelete kubika lyaansa lyakwe pamutwi wa njiyo, akwiicaya kunembo lya Tente ya Cipangano. Mpeeke bana bakwe Aloni bapailishi balaakusanseela bulowa bwa njiyo mumbasu shoonse shone sha cipaililo.

¹⁴ Lyalo ulyeelete kupa nebo neMwaami Lesa ayi ncipo ca shakulya kuli nguwe, shipansha sha munyama ishi. Mafuta oonse a shamukati,

¹⁵ insa shoonse shobilo amafuta a nshisho alimwi acipansha cibotu ca lini.

¹⁶ Lyalo shoonse ishi mupailishi ulaakushitentela pacipaililo ayi ncipo ca shakulya kuli ndime neMwaami Lesa. Mafuta oonse ngaangu neMwaami Lesa.

¹⁷ Taaku mwine Isilaeli nabi womwi weelete kulya mafuta nabi bulowa. Uyu ngumulawo bene Isilaeli boonse ngobeelete kukonkela lyoonsebo, kuli koonse nkweenga kababete.”