Bene Lefi 27 - Baibo Busansulushi Bwa Libuku Ili

Milawo ya pashipo shakupa Mwaami Lesa

¹ Mpeeke Mwaami Lesa wakaambila Mose ayi,

² “Lwiita bene Isilaeli ayi na muntu wabengwa kuli ndime neMwaami Lesa ceebo mbwaakashomesha cakulumbila, muntu uyo inga waangululwabo na walipila maali kweelana aayo akasuminishikwa.

³ Musankwa ucite myaaka ili makumi obilo kushika akumakumi osanwe alyomwi, ulyeelete kulipilishikwa maali makumi osanwe a silifa.

⁴ Mwanakashi munene ulyeelete kulipilishikwa maali a silifa ali makumi otatwe.

⁵ Na ulicite myaaka ili yosanwe kushika akumakumi obilo, musankwa ulyeelete kulipilishikwa maali a silifa ali makumi obilo, mwanakashi ndikumi lyomwi.

⁶ Ono na ulicite mweenshi womwi kushika akumyaaka ili yosanwe, musankwa ulyeelete kulipilishikwa maali a silifa ali osanwe, mwanakashi ngamaali otatwe.

⁷ Sombi na ngumuntu ucite myaaka isotoka pamakumi osanwe alyomwi, musankwa ulyeelete kulipilishikwa maali a silifa ali likumi awosanwe, lakwe mwanakashi ndikumi lyomwibo.

⁸ Ono na muntu wakashomesha cakulumbila ngumukandu utakoonshi kulipila maali eelete, uyo wakashomesha ulyeelete kuleta uyo wakashomeshekwa kumupailishi kwaamba ayi akaceesheko maali kweelana a maali ngweenga muntu uyo wakonsha kulipila.

⁹ “Na wakashomesha cakulumbila ayi ulaakubenga munyama umwi uyo utambulwa ayi ngumulambu kuli ndime neMwaami Lesa, munyama wa mbuli wooyo na wapekwa kuli ndime neMwaami Lesa ulaba waangu.

¹⁰ Nkokwaamba ayi uyo wakashomesha cakulumbila teelete kukushawo munyama uyo ngwaakabenga akubikawo umbi. Na wabenga umwi, lyalo banyama boonse bobilo balaba baangu neMwaami Lesa.

¹¹ Sombi na wakashomesha cakulumbila ayi ulaakubenga munyama utasalalite kweelana aMilawo, uyo utatambulwi ayi ngumulambu kuli ndime neMwaami Lesa, muntu uyo ulyeelete kutola munyama kumupailishi.

¹² Lyalo mupailishi ulaakwaamba mweelo wakwe kweelana akubota nabi kubica kwakwe, alimwi mweelo ngweshi akapingule ulaakuba bweenka ubo.

¹³ Ono na muntu uyo ulisuni kuula munyama wakwe alimwi, ulyeelete kulipilishikwa mweelo wapingulwa akwiilikawo comwi ca shosanwe ca nguwo.

¹⁴ “Na muntu umwi wabenga ŋanda yakwe kuli ndime neMwaami Lesa, mupailishi ulaakwaamba mweelo weelete kweelana akubota nabi kubica kwa njiyo, alimwi mweelo ngweshi akapingule ulaakuba bweenka ubo.

¹⁵ Ono na uyo wakeebenga ulisuni kuyuula alimwi, ulyeelete kulipilishikwa mweelo wapingulwa akwiilikawo acomwi ca shosanwe ca nguwo.

¹⁶ “Na muntu wabenga cipansha ca muunda wakwe kuli ndime neMwaami Lesa, mweelo ulaakupingulwa kweelana akufula kwa mbuto ishangwaamo. Nkokwaamba ayi pamakilogilamu oonse ali makumi obilo a bale, ndikumi lyomwi lya maali a silifa.

¹⁷ Ono na muunda weendililabo kuubengwa pakumana Mwaaka wa Lwaanguluko, mweelo oonse wapingulwa ulyeelete kulipilwa.

¹⁸ Sombi na wabenga muunda wakwe panembo, mweelo ulaakupingulwa kweelana amyaaka yacaalaako kushika muMwaaka wa Lwaanguluko utoosa. Aboobo mweelo ulaakuceyaako.

¹⁹ Ono na uyo wakoobenga ulisuni kuula alimwi, ulyeelete kulipilishikwa mweelo wapingulwa akwiilikawo comwi ca shosanwe ca nguwo.

²⁰ Lyalo na woolisha kumuntu umwi kaatana kuwuula alimwi kuMwaami Lesa, ingayi lakwe teshi akabeewo ankusu shakuula alimwi.

²¹ PaMwaaka wa Lwaanguluko wakuboolaawo, muunda uyo ulaakubetabo limwi wa Mwaami Lesa. Ulaakupekwa kubapailishi.

²² “Na muntu wabenga muunda kuli ndime neMwaami Lesa uyo ngwaaulabo,

²³ mupailishi ulaakupingula mweelo kweelana amyaaka yacaalaako kushika kuMwaaka wa Lwaanguluko utoosa, alimwi muntu uyo ulyeelete kulipilishikwa mweelo oonse pabushiku bweenka ubo. Alo maali alaba a Mwaami Lesa.

²⁴ MuMwaaka wa Lwaanguluko, muunda uyo ulaakubooshekwa kumwiine nabi kubamulunyungu lwakwe.

²⁵ “Anu myeelo yoonse ilyeelete kupingulwa kweelana acipimo cakasuminishikwa.

²⁶ “Mwanaamunyama woonse wakwiiya ngwa Mwaami Lesa lyoonse, aboobo taaku weenga wamubenga ayi ngumulambu wakulyaaba. Nkokwaamba ayi moombe nabi mwanaambelele nsha Mwaami Lesa.

²⁷ Sombi na ngwakwiiya wa munyama utasalalite kweelana aMilawo, inga woolwa alimwi kweelana amweelo weelete kwiilikaawo acomwi ca shosanwe ca nguwo. Na wabula kuulwa alimwi, inga woolishikwa kumuntu umwi kweelana amweelo weenka wapingulwa.

²⁸ “Sombi taaku muntu nabi womwi weelete kuulisha nabi kucuula alimwi ncaabengabo mwiine kuli ndime neMwaami Lesa, nacibi kwaamba ayi wabenga muntu, munyama nabi muunda. Cintu ico cilabetabo limwi ca Mwaami Lesa.

²⁹ Nabi ngumuntu wabengwabo kuMwaami Lesa teelete kuulwa alimwi, sombi ulyeelete kucaikwa.

³⁰ “Pashintu shoonse shilimwa shili likumi, nacibi kwaamba ayi nshili anga ngamaila nabi shisepo, palyeelete kuswa comwi ca likumi cipekwa kuli ndime neMwaami Lesa.

³¹ Ono na umwi ulisuni kucuula cimwi alimwi, ulyeelete kulipilishikwa mweelo weelete kweelana awooyo wapingulwa akwiilikawo acomwi ca shosanwe ca nguwo.

³² Pashifubwa shili likumi, ca likumi nca Mwaami Lesa, na shifubwa shitoobelengwa, ca likumi ncaangu neMwaami Lesa.

³³ Mwiine teelete kubamba shifubwa ayi isho shitabete kabotu nsheshi shinoosalwa, alimwi teelete kukushawo shimwi ayi abikewo shimwi. Na wakushawo cimwi akubikawo cimbi, lyalo shobilo shoonse shilaba shaangu neMwaami Lesa, alimwi inga taashuuliiwo alimwi.”

³⁴ Iyi njemilawo iyo Mwaami Lesa njaakapa Mose paKalundu ka Sinayi ayi nja bene Isilaeli.