Bene Lefi 25 - Baibo Busansulushi Bwa Libuku Ili

Mwaaka wasanu ayobilo

¹ Mpeeke Mwaami Lesa wakaambila Mose paKalundu ka Sinayi ayi,

² “Lwiita bene Isilaeli milasho iyi. Na mukenjile mucishi ncentoomupa nebo neMwaami Lesa, mulyeelete kumpa bulemu kwiinda mukutanoolima myuunda yanu mumwaaka woonse wasanu ayobilo.

³ Mumyaaka yosanwe awomwi, mulaakunooshanga mumyuunda yanu, kutimbula misampi yamweela kushisamu sha minyansa alimwi akutebula shishango shanu.

⁴ Sombi mwaaka wasanu ayobilo ngwakookesha kwa cishi, mwaaka wakabikwa palubasu ayi ngwa Mwaami Lesa. Tamweelete kushanga mumyuunda yanu nabi kutimbula misampi yamweela kushisamu sha minyansa.

⁵ Tamweelete kutebula nabi shishango shakalimenena, nabibo kuyapa shisepo sha minyansa kushisamu shitana kutimboolwa misampi yamweela, ceebo mwaaka uyu ngwakookesha kwa cishi.

⁶ Nacibi kwaamba ayi cishi teshi cikaliimwe mumwaaka uyo, mwebo cilaakumupa shakulya, abasha banu, basebenshi banu, baswamashi mbomwikalaabo,

⁷ banyama banu mbomufubite alimwi abanyama bamuluundu. Shoonse sheshi shikaswe mucishi, shilyeelete kulikwa.

Mwaaka wa Lwaanguluko

⁸ “Mubelenge myaaka yosanwe ayobilo akwiifusha mankanda osanwe awobilo, nkokwaamba ayi pantu pomwi myaaka ilaakuba makumi one ayosanwe alimwi ayone.

⁹ Ono pabushiku bwalikumi mumweenshi wasanu ayobilo, bushiku bwakusalashikwa kuswa kushibiibi, mukatume muntu eshi akanooya cilisha lupeenga mucishi coonse.

¹⁰ Munshila iyi, mulaakupatula mwaaka wamakumi osanwe akwaambilisha lwaanguluko kubantu boonse ba mucishi. Mumwaaka uyu, shoonse shintu shakoolishikwa shilaakubooshekwa kubeene nabi kubamulunyungu lwabo. Uyo woonse wakoolishikwa busha ulaakubooshekwa kumishaabo.

¹¹ Teshi mukashange mumyuunda yanu, kutebula shakulya shakulimenena nabi kuyapa shisepo sha minyansa kushisamu shitana kutimbulwa misampi yamweela.

¹² Anu mwaaka uyu woonse ulaakunoosalalite kuli ndimwe. Mulaakunoolyabo sheesho shilimenena mumyuunda.

¹³ “Mumwaaka ngomunya uyu, myuunda yakoolishikwa ilaakubooshekwa kubeene bataanshi.

¹⁴ Aboobo na moolisha nabi kuula muunda kumwine Isilaelinyinaanu, kuteelesha kunyengelela.

¹⁵ Mulyeelete kuulisha kweelana amyaaka iyo njeshi muunda ukakushe shakulya kootana kushikila Mwaaka wa Lwaanguluko.

¹⁶ Na kucili myaaka iinji, mulaakuulisha maali aanji, sombi na kuli myaaka iniini, aalo maali alaakuceya ceebo citokuulishikwa nshakulya isho nsheshi shikaswe mumuunda uyo.

¹⁷ Tamweelete kunyengelela mwine Isilaelinyinaanu, sombi munyumfwile nebo neLesa wanu. Ndime Mwaami Lesa, Lesa wanu.

Mwiipusho wa pamwaaka wasanu ayobilo

¹⁸ “Amukonkele milawo yoonse ya Mwaami Lesa amilasho yakwe, kwaamba ayi mukanookala kabotu mucishi ico.

¹⁹ Mucishi mulaakuswa shakulya. Mpeeke mulaakuba ashakulya shoonse nshemusuni alimwi akwikala kabotu uko.

²⁰ “Sombi muntu umwi inga weepusha ayi, ‘Nshakulyanshi sheshi shikabeeko mumwaaka wasanu ayobilo myuunda ndyeshi ikabule kushangwa alimwi ashakulya ndyeshi shikabule kutebulwa?’

²¹ Mwaami Lesa ulaakupa cishi coolwe mumwaaka wasanu awomwi kwaamba ayi mukaswe shakulya shikwana myaaka yobilo.

²² Na mukashange mumyuunda yanu mumwaaka wasanu ayotatwe, mulaakunoocilyabo sheesho nshemwakatebula mumwaaka wasanu awomwi, alimwi mulaakuba ashakulya sheshi shikamushishe kuciindi cakutebula sheesho nshemwakashanga.

Kuboosha myuunda kubeene

²³ “Muunda wanu tooelete kuulishikwa cakutolela limwi ceebo teshi waanu, ngwakwe Lesa. Mwebo mulibo anga mbaswamashi abo mbondakasuminisha kuusebensesha.

²⁴ “Na muunda woolishikwa, mulyeelete kwishiba ayi mwine muunda uyo ulicite nkusu shakuula alimwi.

²⁵ Ono na mwine Isilaeli waba mukandu akuulisha muunda wakwe ceebo ca bukandu, mukwabo mwiine mwiine ulyeelete kuula muunda uyo alimwi.

²⁶ Musankwa utacite mukwabo weenga woola muunda uyo wakoolishikwa, ono kunembo mwiine wabila cakukonsha kuwuula alimwi,

²⁷ ulyeelete kulipila wooyo wakoola kweelana amyaaka yacalaako ayi ushikile Mwaaka wa Lwaanguluko, ciindi ico ncaaelete kubooshelwa muunda wakwe.

²⁸ Sombi na taacite maali akwana kuula muunda uyo alimwi, inga koolibo wa wooyo wakawuula kushikila muMwaaka wa Lwaanguluko. Mumwaaka uyo, ulaakubooshekwa kumwiine.

²⁹ “Na muntu woolisha ŋanda mundabala inene ili mulilinga, ulicite nkusu shakuyuula alimwi kootana kumana mwaaka womwi kuswa pabushiku mboyakoolishikwa.

³⁰ Sombi na wabula kuyuula alimwi mumwaaka ngomunya uyo, taasuminishikwi kuyuula alimwi. Lyalo ilabeta limwi ya wooyo wakoola abamulunyungu lwakwe, nkokwaamba ayi teshi ikabooshekwe muMwaaka wa Lwaanguluko.

³¹ Alo maanda a mumishi atacite malinga alyeelete kubabo anga njimyuunda. Beene maanda bataanshi balicite nkusu shakwaawula, alimwi alyeelete kubooshekwa muMwaaka wa Lwaanguluko.

³² Nacibi boobo, bene Lefi balo balicite nkusu ciindi cili coonse shakuula maandaabo alimwi mumandabala anene ayo ngobakapekwa.

³³ Na ŋanda imwi mumandabala anene aya mwine Lefi wayuulisha, ono yabula kubooshekwa, muMwaaka wa Lwaanguluko ilyeelete kubooshekwa. Mukwiinga maanda ayo bene Lefi ngobacite mumandabalaabo anene nganebo lyoonse pakati ka bene Isilaeli.

³⁴ Sombi musena wakweembelelako ushingulukite mandabalaabo anene teshi ukanokuulishikwaawo. Ngunebo lyoonse alyoonse.

Kukweletesha bakandu

³⁵ “Na mwine Isilaelinyoko ngobambenaakwe waba mukandu akunokwaalilwa kulicafwa, ulyeelete kumucafwa bweenka mbweenga wacafwa musebenshi, kwaamba ayi atolelele kunookala pafwaafwi awebo.

³⁶ Utamulipilishi kusotoka pasheesho nshewakamupa, sombi unyumfwile nebo neLesa wako ayi mwine Isilaelinyoko ekale pafwaafwi awebo.

³⁷ Na wamukweletesha, utamusesi kwiinda pamaali ngowakamupa. Alimwi na wamuulisha cakulya, utamulipilishi kwiinda pamaali ngomwakapangana.

³⁸ Uyu ngumulawo kuswa kuli ndime neMwaami Lesa wanu, uyo wakamukusha mucishi ca Ijipiti ayi akamupe cishi ca Kenani alimwi akuba Lesa wanu.

Kwaangulula basha

³⁹ “Ono na mwine Isilaelinyoko ngobambenaakwe waba mukandu cakwaamba ayi walyuulisha kuli ndiwe ayi abe musha, utakamusebenseshi mushila ya busha.

⁴⁰ Ulyeelete kwikala awebo anga ngumusebenshi wako, akukusebensela kushikila Mwaaka wa Lwaanguluko.

⁴¹ Paciindi ico lakwe alimwi abana bakwe balyeelete kuboolela kubeshikamukowa akumyuunda ya bamashali bakwe bakulukulu.

⁴² Anu bene Isilaeli mbasha bangu neMwaami Lesa, nebo nendakabakusha mucishi ca Ijipiti. Paceebo ceeci tabeelete kuulishikwa ayi babe basha.

⁴³ Tamweelete kuba alunkutwe kuli mbabo, sombi munyumfwile nebo neLesa wanu.

⁴⁴ Na mulisuni basha basankwa nabi banakashi, mulyeelete kuboola kumishobo imwi imushingulukite,

⁴⁵ alimwi inga mwoola abana ba baswamashi mbomushitaabo. Baana ba mbuli baabo bakashalilwa mucishi canu inga baba banenu.

⁴⁶ Na mwafwa, inga baba ba bana banu akubasebensela mubuumi bwabo boonse. Sombi tamweelete kuba alunkutwe kumwine Isilaelinyinaanu uli woonse.

⁴⁷ “Ono na muswamashi ngoshiitaakwe wabila, sombi mwine Isilaelinyoko waba mukandu akulyuulisha busha kumuswamashi uyo nabi womwi wa muŋanda yakwe,

⁴⁸ ulicite nkusu shakulubulwa nabi wakalyuulisha. Mukwabo umwi

⁴⁹ nabi bashimishaabo, mupyala wakwe nabibo umwi shikamukowa inga wamuula alimwi. Na mwiine waba amaali, ulakonsha kulilubula.

⁵⁰ Ulyeelete kubandika awooyo wakamuula, akubelenga myaaka kuswa ciindi ndyaakalyuulisha kushikila amuMwaaka wa Lwaanguluko. Mpeeke malipilo a kwaangululwa kwakwe alyeelete kuba mumweelo wa maali afola musebenshi.

⁵¹ Ono na kwacaala myaaka iinji kushika muMwaaka wa Lwaanguluko utoosa, ulyeelete kulipila maali aanji kwaamba ayi alubuke, kwiinda aayo ngaakoolwa.

⁵² Sombi na kwacaalabo myaaka iniini, ulyeelete kulipila maali aniini kweelana amyaaka yacaalaako.

⁵³ Ulyeelete kuba anga ngumusebenshi usebensa cipangano ca mwaaka womwi awomwi. Sombi uyo wakamuula teelete kumusebensesha calunkutwe.

⁵⁴ Na taakwe kwaangululwa munshila yomwi ya sheeshi, lakwe abana bakwe balyeelete kwaangululwa muMwaaka wa Lwaanguluko utoosa,

⁵⁵ mukwiinga bene Isilaeli mbasha bangu neMwaami Lesa. Ndime ndakabakusha mucishi ca Ijipiti alimwi ndi Mwaami Lesa, Lesa wabo.”